Lüdinovo

Lüdinovo
Людиново

Lidnanznam	Flag
Valdkund	Venäma
Eläjiden lugu (2023)	35,276 ristitud
Pind	43 km²
Pämez'	Igor' Sinicin (tal'vku 2020—)
Telefonkod	+7−48 444-xx-xxx
Avtokod	40
Aigvö	UTC+3 (MSK+0)

Lüdinovo (ven.: Люди́ново) om Venäman lidn da lidnankund Kalugan agjan suvipäivlaskmas. Se om agjan koumanz' lidn eläjiden lugun mödhe, Lüdinovon rajonan administrativine keskuz da pala.

Istorii

Eländpunkt mainitase ezmäižen kerdan vl 1626 kuti pen' meckülä nügüdläiženke nimitusenke. Kaks' vezivaradint om saudud senno 18. voz'sadal. Vl 1738 kaugedraudan valamižtegimen aluz om pandud Sukremlin vezivaradimen (alajoksmuses) randal, vl 1745 — raudtegim Lüdinovon vezivaradimenno (ülezjogen, 8,7 km², levitadud Lompad'-järv'). Venäman (nügüdläižiš röunoiš) ezmäižed rel'sad, puruvedimed i purulaivad oliba sätud žilon tegimil. Vl 1929 kätihe radnikžilod rajonan keskuseks. Vspäi 1938 om lidnan statusanke. Enzne Sukreml'-radnikžilo mülüb Lüdinovoho. Toižen mail'man sodan aigan lidn oli okkupiruidud nacistižen Germanijan sodavägil, päzutihe vn 1943 9. sügüz'kud.

Lüdinovo šingotase Sukremlin kaugedraudan valamižtegimel, mašinansauvomižel (lämuzvedimed, agregatad), kabeläntegimel, sömtegimištol (leibänkombinat), mugažo omblendfabrik radab lidnas.

Geografijan andmused

Lüdinovon rajonan sijaduz agjas vn 2012 kartal

Lidn sijadase rajonan keskuzpalan suves, kahten vezivaradimen i Nepolot'-jogen randoil (ven.: Неполоть, enččel Lompad'-jogi, Bolvan ližajogi, Desnan hurapol'ne bassein), 180 m ü.m.t. keskmäižel korktusel. Bolv-jogi om lidnan suvipäivlaskmaižeks röunaks.

Matkad Bränskan agjan röunhasai om seičeme kilometrad suvipäivlaskmha orhal. Matkad Kalughasai om 138 km pohjoižpäivnouzmha orhal, 173 km avtotel vai 180 km raudtel. Lähembaižed lidnad oma Žizdr 23 km suvipäivnouzmha orhal vai 27 km avtotedme, Dät'kovo (Bränskan agj) 30 km suvhe orhal vai 36 km teidme, i Kirov 24 km pohjoižhe vai 29 km teidme.

Lüdinovo I-raudtestancii radab lidnan suves vspäi 1934 «Väz'm — Bränsk»-keskustal, edel 1963. vot sen nimituz oli Lüdinovo muite. Toine raudtestancii om Lüdinovo-II lidnan lodehes vspäi 1934, edel 1963. vot sen nimituz oli Lompad', mugažo Verbickai-platform radab vspäi 1952.

Tobmuz

Lüdinovo om lidnankundan üks'jäižeks elänzoittud punktaks, mugažo Kolotovk-külä om kaikenaigaižeta ristitištota. Lidnankundan pind — 46,89 km².

Lidnankundan tobmuden pämez' om sen Duman ezimez'. Edeline Duman ezimez' om Tat'jana Prohorova (reduku 2015 — tal'vku 2020). Lidnan erigoittud Administracii om likvidiruidud vn 2017 sügüz'kule, Petr Prokonin radoi likvidacižen laudkundan ohjandajan vn 2016 uhokuspäi.

Eläjad

Vl 1939 lidnan ristitišt oli 17 581 eläjad. Vn 2010 Venäman rahvahanlugemižen mödhe lidnan eläjiden lugu oli 40 530 ristitud, rajonan ühesa kümnendest, vn 2021 — 35 874 ristitud. Kaik 38 846 eläjad oli lidnas vl 2017. Kaikiš suremb lidnan ristitišt oli 44 700 eläjad vl 1992.

Rahvahad (ozutadud rahvahudenke vl 2010): venälaižed — 96,9 %, toižed rahvahad — 3,1 %.

Rahvahad (enamba 0,4 % vl 2021): venälaižed — 93,2 %, ukrainalaižed — 0,4 %, toižed rahvahad — 2,6 %, rahvahuden ozutandata — 3,8 %.

Ortodoksižen hristanuskondan seičeme pühäpertid oma kaičenus i saudud lidnas: nell' jumalanpertid i koume časounäd.

Openduz

Lapsiden opendusen aluzkundad oma kahesa nimitadud i nomeruidud päivkodid (nomer 2, 3, 5, 6, 11..14), koume aluzškolad (nomer 5, 8, 12), viž keskškolad (nomer 1..4, 6), Lüdinovon škol-internat, lapsiden sädamižen pert', čomamahtoiden škol, olimpižen varan «Triumf»-sportškol M. A. Uhinan nimed.

Lüdinovon industrialine tehnikum om lidnan professionaližen opendusen aluzkundaks.

Galerei

• 
  Jumalanmaman Kazanin jumalaižen pühäpert' (1802), vn 2014 nägu
• 
  Sukremlin kaugedraudan valamižtegim vl 2014
• 
  Lüdinovskoje (Lompad')-järven randird (2008)
• 
  Lüdinovo II-päraudtestancijan sauvuz vl 2019

Irdkosketused

• Lidnan da sen ümbrikon tobmuden sait (lyudinovo-r40.gosweb.gosuslugi.ru) i sen vanhtunu versii (адмлюдиново.рф), om täuttud vn 2022 lophusai. (ven.)