Meščovsk

Meščovsk
Мещовск

Lidnanznam
Valdkund	Venäma
Eläjiden lugu (2023)	3,722 ristitud
Pind	5 km²
Pämez'	Galina Golikova (eloku 2016—)
Telefonkod	+7−48 446-xx-xxx
Avtokod	40
Aigvö	UTC+3 (MSK+0)

Jumalanmaman Blagoveššenjan päjumalanpert' (vanh), vn 2018 nägu

Meščovsk (ven.: Мещо́вск) om Venäman lidn da lidnankund Kalugan agjan keskuzpalas. Se om Meščovskan rajonan administrativine keskuz.

Istorii

Eländpunkt mainitase ezmäižen kerdan vl 1238 kuti Tarusan ruhtinazkundan jagusen keskuz. Lidn alištui Suren Litvanman ruhtinazkundan tobmudele 15. voz'sadal, sil-žo aigal mainitaškanzihe aigkirjoiš avaros Mezsčevsk, Mezeck, Mezečesk, Meščersk-nimitusidenke (ven.: Мезсчевск, Мезецк, Мезеческ, Мещерск). Vspäi 1776 om makundan lidnan oficialiženke statusanke. Toižen mail'man sodan aigan lidn oli okkupiruidud nacistoil lühüdaks pordoks (reduku 1941 — 6. viluku 1942), no oli muretud lujas.

Meščovsk šingotase valdkundaližil holitišil. Nevondkundaližen aigan nened sarakod radoiba: sömtegimišt (trahmalantegim), omblendedheotandad, sauvondmaterialiden pästand (sauvondmujud, asfal't).

Geografijan andmused

Lidn sijadase rajonan keskuzpalas, Turei-jogen oiktal randal (ven.: Турея 21 km pitte, Okan hurapol'ne bassein), 215 m ü.m.t. keskmäižel korktusel. Vezivaradim om saudud jogel lidnan päivlaskmas.

Matkad Kalughasai om 67 km päivnouzmha-pohjoižpäivnouzmha orhal vai 84 km avtotel. Lähembaižed lidnad oma Mosal'sk 27 km lodeheze orhal vai koumekümne kilometrad avtotedme, i Suhiniči (raudtestancii) 25 km pohjoižhe orhal vai 41 km avtotedme. Lidn ühtenzoitase «Moskv — Bränsk»-avtotenke (M3 «Ukrain»), matkad sihesai om 15 km.

Tobmuz

Kaik 14 žilod i 34 küläd mülüdas lidnankundha Meščovskan ližaks. Lidnankundan pind — 38,62 km².

Lidnankundan tobmuden pämez' om sen Duman ezimez'. Edeline Duman ezimez' om Aleksandr Glinkov, radoi vn 2016 elokuhusai. Lidnankundan Administracii om likvidiruidud vn 2024 kezakus. Natal'ja Anoškina radoi sen likvidacižen laudkundan ohjandajan vn 2020 redukuspäi. Edeline Administracijan pämez' oli Igor' Retuev (kül'mku 2015 — reduku 2020).

Eläjad

Vl 1857 lidnan ristitišt oli 5 429 eläjad, vl 1939 — 3 629 eläjad. Vn 2010 Venäman rahvahanlugemižen mödhe lidnan eläjiden lugu oli 4 100 ristitud, rajonan koumandez, lidnankundan — 5 880 ristitud, vn 2021 lidnan — 3 810 ristitud. Kaik 4 037 ristitud elihe lidnas i 5 874 ristitud kaikes lidnankundas vl 2017. Kaikiš suremb lidnan ristitišt oli läz 5 400 eläjad vll 1857−1859 i vll 1989−1996.

Rahvahad (2010): venälaižed — 91,3 %, armenijalaižed — 2,7 %, ukrainalaižed — 2,3 %, toižed rahvahad — 3,7 %.

Ortodoksižen hristanuskondan Jumalanmaman Blagoveššenjan kaks' päjumalanpertid oma kaičenus i saudud lidnas — vanh i uz', mugažo ph. Jurgijan mez'jumalankodi radab lidnanno.

Lapsiden opendusen aluzkundad oma päivkodi, keskškol, škol-internat, čomamahtoiden škol. Kirovan industrialiž-pedagogine kolledž, sen Meščovskan strukturine alajaguz om lidnan professionaližen opendusen aluzkundaks.

Irdkosketused

• Lidnan tobmuden aluzkundoiden sait (mehovsk.ru). (ven.) (angl.) (saks.)