Žukov (lidn)

Žukov
Жуков

Lidnanznam
Valdkund	Venäma
Eläjiden lugu (2023)	15,656 ristitud
Pind	20 km²
Pämez'	Irina Šuvalova (viluku 2006—)
Telefonkod	+7−48 432-xx-xxx
Avtokod	40
Aigvö	UTC+3 (MSK+0)

Žukov (ven.: Жу́ков) om Venäman lidn da lidnankund Kalugan agjan pohjoižpäivnouzmas, Obninskan suvipäivnouzmaine ezilidn. Mülüb Žukovan rajonha, sen administrativine keskuz da kaikiš suremb lidn koumen kesken.

Istorii

Eländpunkt mainitase ezmäižen kerdan vl 1656 kuti žilo udenno Ugodskii-raudantegimenno, se om alusenpanendan oficialine voz'. Ugodskii Tegim-žilo (ven.: Угодский Завод) kändihe rajonan keskuseks vl 1929. Toižen mail'man sodan aigan žilo oli okkupuruidud nacistižen Germanijan sodavägil lühüdaks aigaks vn 1941 lopus. Udesnimitihe Žukovo-žiloks vl 1974 Rusttan armijan Georgii Žukov-sodapämehen (1896−1974) oiktastuseks, hän oli sündnu lähižhe suvižhe Strelkovk-külähä. Ühtištadihe žilod lähiženke lidnanvuiččenke Protv-žilonke (ven.: Протва́) i anttihe lidnan statusad vl 1996 nügüdläiženke nimitusenke.

Žukov šingotase Kalugan radioapparaturan tegimel, metalližkonstrukcijoiden pästandal, sömtegimištol (maidon i mecproduktoiden edheotandad). Kalugan radiotehnine tedoinstitut radab lidnas.

Geografijan andmused

Žukovan rajonan sijaduz agjas vn 2012 kartal

Lidn sijadase rajonan päivlaskmas, Ugodk-jogen randoil (ven.: Угодка 19 km pitte, Okan hurapol'ne bassein), 135 m ü.m.t. keskmäižel korktusel.

Matkad Kalughasai om kuz'kümne kuz' kilometrad suvipäivlaskmha-suvhe orhal vai 88 km avtotel. Lähembaižed lidnad oma Belousovo kahesas kilometras lodeheze orhal vai avtotedme, i Obninsk (raudtestancii) 11 km lodeheze orhal vai 14 km avtotedme. «Obninsk — Serpuhov»-avtote läbitab lidnad.

Tobmuz

Žukov om lidnankundan üks'jäižeks eländpunktaks. Lidnankundan pind — 20 km², sidä kesken pertišton 10,3 km².

Lidnankundan tobmuden pämez' om sen Duman ezimez'. Irina Šuvalova radab Duman ezimehen sen alusenpanendaspäi vn 2006 vilukus. Lidnan Administracijan pämez' om Ol'ga Kim vn 2015 sulakuspäi.

Eläjad

Vl 1939 žilon ristitišt oli 1 987 eläjad, vl 1996 — 4 500 eläjad. Vn 2010 Venäman rahvahanlugemižen mödhe lidnan eläjiden lugu oli 12 131 ristitud, rajonan nelländez, vn 2021 — 16 224 ristitud. Kaik 13 251 eläjad oli lidnas vl 2017. Kaikiš suremb lidnan ristitišt om nügüd'; se oli 13 500 eläjad vll 1999−2000 i om enamba 13 tuhad eläjid vspäi 2017.

Rahvahad (ozutadud rahvahudenke vl 2010): venälaižed — 90,9 %, ukrainalaižed — 2,3 %, tadžikalaižed — 1,0 %, toižed rahvahad — 5,8 %.

Ortodoksižen hristanuskondan nell' pühäpertid oma saudud lidnas: koume jumalanpertid i časoun'.

Openduz

Lapsiden opendusen aluzkundad oma kuz' nimitadud päivkodid, kaks' keskškolad (nomer 1 i 2), kaks' čomamahtoiden školad (nomer 1 i 2), ližaopendusen keskuz G. K. Žukov-maršalan nimed, olimpižen varan «Maršal»-sportškol.

Žukov-lidnan Mehanizacijan da servisan kolledž om lidnan professionaližen opendusen aluzkundaks.

Openduz

• 
  Muštkivi lidnan alusenpanendan sijas (semendku 2010)
• 
  Memorial Georgii Žukov-maršalan muštoks, 2010
• 
  Žukovan keskuzkirjišt vn 2010 semendkus

Irdkosketused

• Lidnan tobmuden aluzkundoiden sait (zhukov.gosuslugi.ru) i sen arhivine versii (my-zhukov.ru, om täuttud vn 2025 kül'mkuhusai). (ven.)