Malojaroslavec

Vikipedii
Mine navigeerimisribale Mine otsikasti
Malojaroslavec
Малоярославец
 Lidnanznam
Coat of Arms of Maloyaroslavets (Kaluga region).svg
 Flag
Flag of Maloyaroslavets (Kaluga oblast).svg
Valdkund Venäma
Eläjiden lugu (2018-01-01) 27 448 ristitud
Pind 18,08 km²
Malojaroslavec Малоярославец
Pämez' Ol'ga Žukova
(reduku 2 015—)
Telefonkod +7-48 431-xx-xxx
Avtokod 40
Aigvö UTC+3 (MSK+0)


Malojaroslavec (ven.: Малояросла́вец) om Venäman lidn, lidnankund da avtotesol'm Kalugan agjan pohjoižpäivnouzmas, Obninskan suvipäivlaskmaine ezilidn. Se om agjan videnz' lidn eläjiden lugun mödhe, Malojaroslavecan rajonan administrativine keskuz. Om «sodahoštusen lidn»-arvnimenke vspäi 2012.

Istorii[redaktiruida | redaktiruida purde]

Eländpunktan aluz om pandud kuti puine lidnuz Vladimir Serpuhovalaine (Rohked)-ruhtinasel 14. voz'sadan lopus, nimiti Jaroslavl:ikš ičeze nelländen Jaroslav-poigan oiktastuseks. Lidnuz mainitase ezmäižen kerdan vl 1402 kuti Jaroslavec Borovskii vai muite Jaroslavec (ven.: Ярославец), se om lidnan alusenpanendan oficialine voz'. Udesnimitihe nügüdläižikš ühtnendan jäl'ghe vl 1485 Moskvan ruhtinazkundanke erištamha Jaroslavlišpäi. Malojaroslavec sai makundan lidnan statusad vl 1776. Vn 1812 Tatanmaižen sodan aigan tora tegihe lidnanno, anastihe sidä severt-se kerdad i muretihe täuzin. Toižen mail'man sodan aigan lidn oli okkupiruidud nacistoil (18. reduku 1941 — 2. viluku 1942).

Malojaroslavec šingotase sauvondmaterialiden pästandal (mecanpilind, metalližiden konstrukcijoiden viž tegint), meblinfabrik radab.

Geografijan andmused[redaktiruida | redaktiruida purde]

Lidn sijadase rajonan pohjoižpäivnouzmas, Luž-jogen alajoksmusen oiktal randal (ven.: Лужа 159 km pitte, Okan hurapol'ne bassein), 190 m ü.m.t. keskmäižel korktusel. Lužan pened Legoik-ližajogi (ven. Легойка) i Kariž-ližajogi (ven. Карижа) sebaitas lidnad. Matkad Kalughasai om 56 km suvhe orhal, 63 km avtotel vai raudtel. Lähembaine lidn om Obninsk 13 km pohjoižpäivnouzmha orhal vai 18 km teidme. Malojaroslavec-raudtestancii radab lidnan päivnouzmas «MoskvBränsk»-keskustal vspäi 1999. «Moskv — Bränsk»-avtotekeskust (M3 «Ukrain») mäneb 3 km suvipäivnouzmha lidnaspäi. «Moskv — Roslavl'»-avtote läbitab lidnan pohjošt mugažo.

Malojaroslavec om lidnankundan üks'jäine eländpunkt. Lidnankundan pind — 18,08 km².

Eläjad[redaktiruida | redaktiruida purde]

Vl 1939 lidnan ristitišt oli 11 729 eläjad. Vn 2010 Venäman rahvahanlugemižen mödhe lidnan eläjiden lugu oli 30 392 ristitud, rajonan viž ühesandest. Kaikiš suremb lidnan ristitišt oli 30..31 tuhad eläjid vll 2000−2011 (31 606 rist. vl 2002). Ortodoksižen hristanuskondan ph. Mikulain Černoostrovkii-naižjumalankodi (vspäi 1610) nellänke pühäpertinke, kaks' päjumalanpertid, nell' jumalanpertid i kaks' časounäd oma olmas lidnas.

Professionaližen opendusen aluzkund om privatižen Moskvan finansiž-juridižen akademijan i sen universitetan Kalugan filial.[1]

Galerei[redaktiruida | redaktiruida purde]

Homaičendad[redaktiruida | redaktiruida purde]

  1. Moskvan finansiž-juridižen akademii i sen universitet — Kalugan filialan sait (kl.mfua.ru). (ven.)

Irdkosketused[redaktiruida | redaktiruida purde]



Kalugan agjan lidnad
Balabanovo | Belousovo | Borovsk | Jermolino | Juhnov | Kalug | Kirov | Kondrovo | Kozel'sk | Kremönki | Lüdinovo | Malojaroslavec | Medin' | Meščovsk | Mosal'sk | Obninsk | Sosenskii | Spas-Demensk | Suhiniči | Žizdr | Žukov | Tarus