Balabanovo

Balabanovo
Балабаново
Lidnanznam;	Flag;
Valdkund	Venäma
Eläjiden lugu (2018-01-01)	25,608 ristitud
Pind	17,85 km²
Pämez'	Irina Nikiforenko; (reduku 2019—)
Telefonkod	+7−48 438-xx-xxx
Avtokod	40
Aigvö	UTC+3 (MSK+0)

Balabanovo (ven.: Балаба́ново) om Venäman lidn da lidnankund Kalugan agjan pohjoižpäivnouzmas. Se om Borovskan rajonan kaikiš suremb lidn koumespäi, Obninskan pohjoine ezilidn.

Istorii[vajehta | vajehtada lähte]

Eländpunkt mainitase ezmäižen kerdan vl 1584 vai vl 1613 kuti Bolobonovo-külä i sen lähine Jerohino-külä. Šingotaškanzihe raudten sauvondan jäl'ghe vll 1896−1898. Kätihe lidnanvuiččeks žiloks vl 1935. Toižen mail'man sodan aigan lidn oli okkupiruidud nacistoil (21. reduku 1941 — 28. tal'vku 1941). Vs 1972 kezakun 12. päiväspäi om lidnan statusanke. Balabanovo-1-sodalidnut mülüb lidnha vn 2007 kezakuspäi.

Balabanovo šingotase sauvondmaterialiden pästandal (keramine apakut; «Plitspičprom:an» (enččel virifabrik) puižed apakod, pilindmaterialad, brus da pertid sišpäi; «Ruukki»-kompanijan metalližkonstrukcijad), bumagpakuitesen tegimel («Stora Enso»), sömtegimištol (maidtegim, leibtegesed). Punümbriradajan tegimišton tedoinstitut. Läz kümned sodapalakundad seištas lidnas ümbri.

Geografijan andmused[vajehta | vajehtada lähte]

Lidn sijadase rajonan päivnouzmaiženno röunanno, 160 m ü.m.t. keskmäižel korktusel. Istj-jogen oiged rand (ven.: Истья 56 km pitte, Okan hurapol'ne bassein) om lidnan pohjoižröunaks. Matkad Moskvan agjhasai om 8 km pohjoižhe i pohjoižpäivnouzmha orhal. Matkad Kalughasai om 79 km suvhe orhal, 87 km avtotel vai raudtel. Lähembaižed lidnad oma Borovsk-rajonankeskuz 9 km päivlaskmha orhal vai 12 km avtotedme, Jermolino 3 km päivlaskmha orhal vai 6 km avtotedme, i Obninsk 5 km suvhe orhal vai teidme.

Balabanovo-raudtestancii radab lidnan keskuses vspäi 1899 «Moskv — Bränsk»-keskustal. «Moskv — Bränsk»-avtote (M3-trass) läbitab lidnan päivnouzmašt palad, Sur' Moskvan avtorengaz (A-108) ristikoičeb lidnan päivnouzmaspäi päivlaskmha.

Balabanovo om lidnankundan üks'jäine eländpunkt. Lidnankundan pind — 17,85 km², sidä kesken pertišt läz 10 km².

Eläjad[vajehta | vajehtada lähte]

Vl 1939 žilon ristitišt oli 2 632 eläjad. Kaikiš suremb lidnan ristitišt om 25..26 tuhad eläjid vspäi 2010 (26 337 rist. vl 2010 Venäman rahvahanlugemižen mödhe), rajonan kaks' videndest. Ortodoksižen hristanuskondan kaks' pühäpertid om olmas lidnas.

Rahvahad (2010): venälaižed — 88,3%, ukrainalaižed — 2,9%, uzbekad — 1,8%, armenijalaižed — 1,2%, totarlaižed — 1,0%, toižed rahvahad — 4,8%.

Professionaližen opendusen aluzkund om privatine Nügüd'aigaine gumanitarine kolledž^[1] i Moskvan pedagogižen valdkundaližen universitetan filial.

Galerei[vajehta | vajehtada lähte]

Toižen mail'man sodan Velleskaum läz školad
Kundaline kül'bet'
vl 2010
Balabanovo-raudtestancii
vl 2010

Homaičendad[vajehta | vajehtada lähte]

↑ Nügüd'aigaižen gumanitarižen kolledžan sait (college-balabanovo.ru). (ven.)

Irdkosketused[vajehta | vajehtada lähte]

Lidnan tobmuden aluzkundoiden sait (admbalabanovo.ru). (ven.)

Balabanovo Vikiaitas

	Kalugan agjan lidnad
	Balabanovo \| Belousovo \| Borovsk \| Jermolino \| Juhnov \| Kalug \| Kirov \| Kondrovo \| Kozel'sk \| Kremönki \| Lüdinovo \| Malojaroslavec \| Medin' \| Meščovsk \| Mosal'sk \| Obninsk \| Sosenskii \| Spas-Demensk \| Suhiniči \| Žizdr \| Žukov \| Tarus

[1] Nügüd'aigaižen gumanitarižen kolledžan sait (college-balabanovo.ru). (ven.)

[1]