Kondrovo

Kondrovo
Кондрово
	Lidnanznam;
Valdkund	Venäma
Eläjiden lugu (2023)	15,734 ristitud
Pind	21,27 km²
Pämez'	Andrei Stepanän; (kül'mku 2025—,; velgusentäutai)
Telefonkod	+7−48 434-xx-xxx
Avtokod	40
Aigvö	UTC+3 (MSK+0)

Kondrovo (ven.: Ко́ндрово) om Venäman lidn da lidnankund Kalugan agjan pohjoižpalas. Se om Dzeržinskijan rajonan administrativine keskuz.

Istorii

Eländpunkt mainitase ezmäižen kerdan voziden 1628−1629 makundan aigkirjas kuti anttud vl 1615 kirjeižen mödhe Kondirevo-žilo (vai Omel'janovskoje, ven.: Кондырево (Омельяновское)). Vl 1785 sauvoškanzihe bumaganfabrikad lähižes Troickoje-žilos. Vl 1799 zavottihe toižen bumaganfabrikan sauvomišt Kondirevo-žilos. Kondrovo sai radnikžilon statusad vl 1929. Vn 1938 25. päiväl keväz'kud ühtištuihe sidä Troickoje-radnikžilonke da kätihe lidnaks. Toižen mail'man sodan aigan lidn oli okkupiruidud nacistižen Germanijan sodavägil (9. reduku 1941 — 19. viluku 1942). Vspäi 1963 saudihe severt-se uzid bumaganedheotandoid da rekonstruiruihe vanhid tegimid.

Kondrovo šingotase cellülozbumagaižel tegimištol, tehtas bumagan toižendoid (viž edheotandad^[1] — gofriruidud bumag, gofrokarton^[2], pergament, nepsudenvastaine bumag, pakuitez), gigijenan tegesiden edheotandal^[3] (pampersad da bumagtegesed), sömtegimištol (leibänkombinat, saguden edheotand). Järed mototrass om tehtud lidnan röunal, se ei olend kävutandas koumetoštkümne vot vhesai 2025, sil vodel Venäman čempionatan motokrossas finalad mäniba täs. Avtorižen pajon jogavozne festival' vedase vspäi 1998.

Geografijan andmused

Lidn sijadase rajonan pohjoižes, Šan'-jogen hural randal tobjimalaz (ven.: Шаня 131 km pitte, Okan hurapol'ne bassein), 140 m ü.m.t. keskmäižel korktusel.

Matkad Kalughasai om koumekümne ühesa kilometrad pohjoižpäivnouzmha orhal, 46 km avtotel vai raudtel. Toižed lähembaižed lidnad oma Juhnov 46 km päivlaskmha-suvipäivlaskmha orhal vai 56 km avtotedme, Medin' 19 km pohjoižhe orhal vai 23 km avtotedme, i Malojaroslavec 41 km pohjoižpäivnouzmha orhal, 60 km avtotedme vai 70 km raudtedme. Govardovo-raudtestancii radab ani suvhe lidnaspäi «Kalug — Väz'm»-keskustal, nell'kilometrine sarak tuleb sišpäi Kondrovoho jüguiden täht.

Tobmuz

Kondrovo om lidnankundan üks'jäižeks eländpunktaks. Lidnankundan pind — 21,27 km² (vl 2010 oli 17,84 km²).

Lidnankundan pämez' om sen Duman ezimez'. Vn 2025 redukuspäi Dum eläb reorganizacijas läbi rajonan toižetamižen tagut ümbrikoks. Edeližed lidnan Duman ezimehed oma Tat'jana Petruhina (heinku 2019 — kül'mku 2025), Andrei Katerinčuk (reduku 2015 — heinku 2019). Lidnan administracii (ven.: городская управа) oli likvidacijan pordhal vspäi 2021 i om likvidiruidud vn 2025 redukus, Tatjana Žukova oli sen jäl'gmäižen pämehen vn 2016 kül'mkuspäi i likvidacižen laudkundan ohjandajan vn 2021 kezakuspäi.

Eläjad

Vl 1939 lidnan ristitišt oli 9 708 eläjad. Vn 2010 Venäman rahvahanlugemižen mödhe lidnan eläjiden lugu oli 16 672 ristitud, rajonan kaks' seičemendest, vn 2021 — 15 734 ristitud. Kaik 15 017 eläjad oli lidnas vl 2017. Kaikiš suremb lidnan ristitišt oli 17..18 tuhad eläjid vll 1989−2003 (18 100 rist. vl 1996).

Rahvahad (ozutadud rahvahudenke vl 2010): venälaižed — 94,8 %, ukrainalaižed — 1,2 %, toižed rahvahad — 4,0 %.

Ortodoksižen hristanuskondan viž pühäpertid^[4] oma kaičenus i saudud lidnas: Eläban Eziauguižen Stroican jumalanpert'^[5] (om saudud vl 1818), Spasan Londuseližen Mel'kuvan jumalanpert' (om vspäi 1820), kodijumalanpert' lapsidenkodinno, kaks' časounäd.

Openduz

Lapsiden opendusen aluzkundad oma koume nimitadud päivkodid, nell' keskškolad (nomer 1..4), lapsiden sädamižen Rovesnik-keskuz («Ühtenigäč»), čomamahtoiden škol, sportškol.

Kalugan industrialiž-pedagogine kolledž, sen Kondrovon filial^[6] (edel vn 2018 heinkud Kondrovon gumanitariž-tehnine kolledž) om lidnan professionaližen opendusen aluzkundaks.

Galerei

Eläban Eziauguižen Stroican jumalanpert', vn 2008 nägu
Troickai-bumaganfabrik vl 2010
Govardovo-raudtestancii vl 2010

Homaičendad

Irdkosketused

Lidnankundan lehtpoled rajonan tobmuden admkondrovo.ru-saital. (ven.)

Kondrovo Vikiaitas

	Kalugan agjan lidnad
	Balabanovo \| Belousovo \| Borovsk \| Jermolino \| Juhnov \| Kalug \| Kirov \| Kondrovo \| Kozel'sk \| Kremönki \| Lüdinovo \| Malojaroslavec \| Medin' \| Meščovsk \| Mosal'sk \| Obninsk \| Sosenskii \| Spas-Demensk \| Suhiniči \| Žizdr \| Žukov \| Tarus

[1] Troickojen bumagfabrikan sait (tbf.ru). (ven.) (angl.)

[2] Kondrovon bumagkompanijan sait (kpcltd.ru). (ven.)

[3] «MV Gigiena»-edheotandan sait (mv-hygiene.ru). (ven.)

[4] Kondrovon pühäpertid sobory.ru-saital. (ven.)

[5] Kondrovo-lidnan Eläban Eziauguižen Stroican jumalanpertin sait (hram-troitsa.cerkov.ru). (ven.)

[6] Päižed tedod Kalugan industrialiž-pedagogižen kolledžan pedcollege.kalugaedu.ru-saital. (ven.)

[1]

[2]

[3]

[4]

[5]

[6]