Medin'

Medin'
Медынь
	Lidnanznam;
Valdkund	Venäma
Eläjiden lugu (2023)	8,042 ristitud
Pind	15 km²
Pämez'	Eduard Kiričenko; (reduku 2015—)
Telefonkod	+7−48 433-xx-xxx
Avtokod	40
Aigvö	UTC+3 (MSK+0)

Medin' (ven.: Меды́нь) om Venäman lidn da lidnankund Kalugan agjan pohjoižes. Se om Medinin rajonan administrativine keskuz.

Istorii

Eländpunkt mainitase ezmäižen kerdan voziden vn 1386 dokumentoiš Medinin udes alištuses Moskvan ruhtinasen tobmudele Smolenskan sijas. Nimitihe meden tehmižen mödhe vai jogen mödhe, goläd'-heimon sanoišpäi (nüg. litv.: medė «mec», medynas «mecakišt»). 17. voz'sadan augotišes Medin' oli pandud mantazole i kadoti lidnan statusad, vodele 1660 žilo jäi eläjita mustmoran jäl'ghe. Medin' sai makundan lidnan oficiališt statusad vl 1777. Šingoti virifabrikoil 20. voz'sadan augotišes. Toižen mail'man sodan aigan lidn oli okkupiruidud nacistižen Germanijan sodavägil (12. reduku 1941 — 14. viluku 1942).

Medin' šingotase mecan ümbriradmižel, meblinfabrikal i sömtegimištol (maidtegim, jähižen edheotand). Meden tehmižen keskuz voz'sadoiš. Universaližen (Venän) toran mail'man čempionatan sija vll 2012 i 2015−2017 (kül'mku). Znamasine rajonan kul'turkeskuz^[1].

Geografijan andmused

Lidn sijadase rajonan suves, Medink-jogen hural randal tobjimalaz (ven.: Медынка 51 km pitte, Okan hurapol'ne bassein), 200 m ü.m.t. keskmäižel korktusel.

Matkad Kalughasai om 57 km suvipäivnouzmha-suvhe orhal vai 63 km avtotel. Lähembaižed lidnad oma Kondrovo (raudtestancii) 19 km suvhe orhal vai 23 km avtotedme, i Malojaroslavec (raudtestancii) 39 km päivnouzmha orhal vai avtotedme. «Moskv — Roslavl'»-avtote (A-130) läbitab lidnan keskuzpalad.

Tobmuz

Medin' om lidnankundan üks'jäižeks eländpunktaks.

Lidnankundan tobmuden pämez' om sen Duman ezimez'. Edeline Duman ezimez' om Rena Prokšina, radoi vn 2015 redukuhusai. Lidnankundan erigoittud Administracii om likvidiruidud vn 2016 kezakus, Sergei Kumancov oli sen likvidatoran vn 2015 semendkuspäi.

Eläjad

Vl 1939 lidnan ristitišt oli 5 829 eläjad. Vn 2010 Venäman rahvahanlugemižen mödhe lidnan eläjiden lugu oli 8 300 ristitud, rajonan kaks' koumandest, vn 2021 — 8 200 ristitud. Kaik 8 032 eläjad oli lidnas vl 2017. Kaikiš suremb lidnan ristitišt om läz vai enamba kahesad tuhad eläjid vspäi 1970 (8 872 rist. vl 1979).

Rahvahad (2010): venälaižed — 88,9 %, armenijalaižed — 2,9 %, vaugedvenälaižed — 1,8 %, ukrainalaižed — 1,3 %, uzbekad — 1,2 %, toižed rahvahad — 3,9 %.

Ortodoksižen hristanuskondan nell' pühäpertid^[2] om kaičenus i saudud lidnas: koume jumalanpertid, Karpan i Papilan časoun' (1854) vn 1812 13. redukud muštoks. Niiden ližaks phh. Šol'oin i Konstantinan päjumalanpert' (1777) om muretud i ei ole väges.

Lapsiden opendusen aluzkundad oma severz'-se nimitadud päivkodid, keskškol, sädamižen pert', čomamahtoiden škol, rajonan sportškol. Professionaližen opendusen aluzkund om Federaližen aznoičendsisteman radnikoičendan profškol nomer 56.

Galerei

Sijaližen tobmuden pert' (2012)
Kazanin Jumalanmaman jumalanpert' (1836), vn 2012 nägu
Medink-jogi vl 2010
Avtobusstancii vl 2011

Homaičendad

Irdkosketused

Lidnan da sen rajonan tobmuden sait (medyn-r40.gosweb.gosuslugi.ru). (ven.)

Medin' Vikiaitas

	Kalugan agjan lidnad
	Balabanovo \| Belousovo \| Borovsk \| Jermolino \| Juhnov \| Kalug \| Kirov \| Kondrovo \| Kozel'sk \| Kremönki \| Lüdinovo \| Malojaroslavec \| Medin' \| Meščovsk \| Mosal'sk \| Obninsk \| Sosenskii \| Spas-Demensk \| Suhiniči \| Žizdr \| Žukov \| Tarus

[1] Lidnan muzejiž-ozutelendkeskusen sait (mvc-medin.kaluga.muzkult.ru). (ven.)

[2] Medinin pühäpertid sobory.ru-saital. (ven.)

[1]

[2]