Gräzovecan ümbrik

Gräzovecan ümbrik
Грязовецкий округ
Znam;	Flag;
Valdkund	Venäma
Administrativine keskuz	Gräzovec
Eläjiden lugu (2023)	32,078 ristitud
Pind	5,025,7 km²

Gräzovecan ümbrik (ven.: Гря́зовецкий о́круг) om ümbrik (edel vn 2022 kezakud — rajon) Venäman Vologdan agjas.

Administrativine keskuz om Gräzovec-lidn.

Istorii

Ümbrikon aluz om pandud kut rajon vn 1929 heinkun 15. päiväl Pohjoižen randan Vologdan ümbrikho. Vn 1930 heinkun 30. päiväl heittihe sidä ümbrikod, i vhesai 1936 rajon mülüi Pohjoižhe randha kut administrativine ühtnik, sid' vozil 1936−1937 — Pohjoižhe agjaha. Vn 1937 sügüz'kun 23. päiväspäi mülüb Vologdan agjaha. Ümbrik om olmas nügüdläižiš röunoiš vspäi 2006.

Geografijan andmused

Gräzovecan ümbrik om Vologdan agjan suvine taho. Pind — 5 025,7 km². Sen piduz pohjoižespäi suvhe — 70 km, päivlaskmaspäi päivnouzmha — 150 km. Mec otab territorijan koume nelländest (3723 nellikkilometrad).

Om röunoid seičemenke Venäman ümbrikonke i rajonanke:

suvipäivnouzmas Kostroman agjan Soligaličun da Bujan rajonidenke;
suves Jaroslavlin agjan Lübiman rajonanke;
suvipäivlaskmas Jaroslavlin agjan Pervomaiskii-rajonanke;
päivlaskmas Jaroslavlin agjan Pošehonjen rajonanke;
lodehes da pohjoižes Vologdan agjan Vologdan ümbrikonke;
pohjoižes da pohjoižpäivnouzmas Vologdan agjan Jogidenkeskeiženke ümbrikonke.

Znamasižed joged oma Lež i Monz. Joged mülüdas Suhonan (Jävaldmeren) i Volgan (Kaspijan meren) basseinoihe.

Londuseližed varad oma kivivoi, turbaz, sauvondmaterialad (letked, saved, gravii), mec.

Tobmuz

Vn 2013 keväz'kun 7. päiväspäi rajonan territorii jagoihe seičemeks municipaližeks ühtnikaks: kaks' lidnankundad da viž küläkundad. Vn 2022 kezakuspäi kaik kundad oma kätud ümbrikon territorialižikš palakundoikš.

Mihail Lupandin oli rajonan pämez' vs 2003 tal'vkuspäi, hän-žo radoi Sijaližen Suiman ezimehen vs 2009 keväz'kuspäi.

Käskusenandai tobmuz om ümbrikon parlament — Sijaline Suim (ven.: Земское Собрание) 29 ühtnijanke. Sen aluz om pandud vn 1993 redukun 23. päiväl. Suim om ezmäine mugoine Venälaižes Federacijas, no jätktab edelrevolücišt tradicijad.

Vs 2009 semendkuspäi Andrei Kazunin oli rajonan administracijan pämehen. Kaik viž ohjandust alištuiba rajonan administracijale.

Eläjad

Vn 2002 Venäman rahvahanlugemižen mödhe rajonan eläjiden lugu oli 41 644 ristitud, vn 2010 — 36 820 ristitud, vn 2021 — 32 472 ristitud. Kaik 32 730 eläjad oli rajonas vl 2017. Lidnalaižed ottas koume videndest ristitištos.

Rahvahad (enamba 0,4 % eläjid vl 2021): venälaižed — 96,7 %, toižed rahvahad — 2,5 %, rahvahuden ozutandata — 0,8 %.

Kaik 481 eländpunktad om ümbrikos (niid oli 511 vl 2015), niiden kesken üks' lidn, üks' lidnanvuitte žilo, 26 muite žilod, 435 küläd, seičeme raudtestancijad, kuz' raudtesarakod, Kornil'jevo-sijaine i nell' futorad. Niišpäi 229 seištas kaikenaigaižeta ristitištota: 216 küläd, seičeme žilod, nell' raudtesarakod, Skalino-raudtestancii i Nazark-futor.

Toine sur' eländpunkt om lidnanvuitte Vohtog-žilo (5,8 tuh. rist. vl 2015).

Ižanduz

Ümbrikon ižandusen päsarakod oma mecan ümbriradmine, sauvondmaterialiden tehmine, raudte- da tor'vikveimtransport, maižanduz da sömtegimišt, omblendtegimišt da turizm.

Homaičendad

Irdkosketused