Rossoš

Rossoš
Россошь
Lidnanznam;	Flag;
Valdkund	Venäma
Eläjiden lugu (2021)	60,879 ristitud
Pind	59,06 km²
Pämez'	Alla Zagraničnova; (viluku 2021—)
Telefonkod	+7−47 396-xx-xxx
Avtokod	36, 136
Aigvö	UTC+3 (MSK+0)

Rossoš (ven.: Ро́ссошь, ukr.: Розсош) om Venäman lidn, lidnankund da transporttesol'm Voronežan agjan suvipäivlaskmas. Se om agjan kahtenz' lidn eläjiden lugun mödhe, Rossošin rajonan administrativine keskuz.

Istorii[vajehta | vajehtada tekst]

Eländpunktan aluz om pandud kuti slabad 17. voz'sadan keskes. Nimituz libub ukrainan розсоха-sanaspäi «sarak» (kahten jogen ühthejoksmuz), edel Sured sodad ukrainalaižed oliba enambuses Rossošin ristitištos. Raudte tuli sihe vl 1870, päraudtestancijan sauvuz om letud vl 1871. Rossoš sai lidnan statusad vl 1923. Toižen mail'man sodan aigan lidn oli okkupiruidud nacistoil, päzutihe vn 1943 vilukus.

Rossoš šingotase mineraližiden heretusiden tegimel^[1], sauvondmaterialiden pästandal (mouckivi, savič), sömtegimištol (maidkombinat, sömkombinat, voitegim), mugažo vedimdepo radab lidnas. Slobodan ukrainan kul'turan jogavozne festival' oleli lidnas 2000-nzil vozil.

Geografijan andmused[vajehta | vajehtada tekst]

Lidn sijadase rajonan keskuzpalan lodehes, Must Kalitv-jogen hural randal (ven.: Чёрная Калитва 162 km pitte, Don-jogen oiged ližajogi) sen huran Rossoš-ližajogen (70 km pitte) lanktendanno, 85 m ü.m.t. keskmäižel korktusel.

Matkad Voronežhasai om 167 km pohjoižhe orhal, 210 km avtotel vai 214 km raudtel. Lähembaine lidn om Pavlovsk 49 km pohjoižpäivnouzmha orhal vai 75 km avtotedme. Rossoš-raudtestancii radab lidnan päivnouzmas «Voronež — Rostov Donal»-keskustal.

Tobmuz[vajehta | vajehtada tekst]

Rossoš om lidnankundan üks'jäižeks eländpunktaks. Lidnankundan pind — 59,06 km².

Lidnankundan tobmuden pämez' om sen Rahvahandeputatoiden nevondkundan ezimez'. Edeline lidnan pämez' om Eduard Markov (sügüz'ku 2015 — viluku 2021). Lidnan Administracijan pämez' om Vladimir Kobilkin vn 2018 vilukuspäi. Edeline Administracijan pämez' om Jurii Mišankov, radoi vn 2018 vilukuhusai.

Eläjad[vajehta | vajehtada tekst]

Vl 1939 lidnan ristitišt oli 17 200 eläjad. Vn 2010 Venäman rahvahanlugemižen mödhe eläjiden lugu oli 62 865 ristitud, rajonan kaks' koumandest, vn 2021 — 60 879 ristitud. Vl 2017 lidnan ristitišt oli 62 884 eläjad. Kaikiš suremb lidnan ristitišt oli 62..64 tuhad eläjid vll 1996−2020 (64 400 rist. vl 2001).

Rahvahad (2010): venälaižed — 84,6 %, ukrainalaižed — 12,9 %, toižed rahvahad i rahvahuden ozutandata — 2,5 %.

Ortodoksižen hristanuskondan seičeme pühäpertid^[2] oma kaičenus i saudud lidnas: Ill'a-endustajan päjumalanpert' (om saudud vll 2001−2006) i kuz' jumalanpertid. Niiden ližaks Ristan Zdviženjan jumalanpert' ei ole kaičenus.

Lapsiden opendusen aluzkundad oma severz'-se päivkodid, keskškolad nomer 1, 2, 6, 9, 10, 25, liceid nomer 4 i 11, čomamahtoiden škol, sportškol. Professionaližen opendusen aluzkundad oma Rossošin kaks' kolledžad (liha- da maidtegimišton^[3], medicinine^[4]) i kaks' tehnikumad (himiž-mehanine^[5], maižanduz- i sauvondtransportan^[6]), mugažo Gubernijan pedagogižen kolledžan filial.

Galerei[vajehta | vajehtada tekst]

Päraudtestancijan torg (2009)
Vedimdepo vl 2012
Ph. Aleksandr Nevalaižen hibjan sirdandan Piterihe jumalanpert'-kellčuhunduz läz avtostancijad, vn 2021 nägu
Rossoš-päraudtestancii vl 2011

Homaičendad[vajehta | vajehtada tekst]

Irdkosketused[vajehta | vajehtada tekst]

Lidnankundan tobmuden aluzkundoiden sait (rossosh.gosuslugi.ru) i sen vanh versii (rossosh.ru). (ven.)

Rossoš Vikiaitas

	Voronežan agjan lidnad
	Bobrov \| Bogučar \| Borisoglebsk \| Buturlinovk \| Ertil' \| Kalač \| Liski \| Novohopörsk \| Novovoronež \| Ostrogožsk \| Pavlovsk \| Povorino \| Rossoš \| Semiluki \| Voronež

[1] Rossošin mineraližiden heretusiden tegimen sait (minudo.ru). (ven.)

[2] Rossošin pühäpertid sobory.ru-saital. (ven.)

[3] Rossošin liha- da maidtegimišton kolledžan sait (rkmmp.obrvrn.ru). (ven.)

[4] Rossošin medicinižen kolledžan sait (rossmed.vrn.eduru.ru). (ven.)

[5] Rossošin himiž-mehanižen tehnikuman sait (rhmt.obrvrn.ru). (ven.)

[6] Rossošin maižanduz- i sauvondtransportan tehnikuman sait (rtsist.obrvrn.ru). (ven.)

[1]

[2]

[3]

[4]

[5]

[6]