Vaškiden rajon

Vaškiden rajon
Вашкинский район

Znam	Flag
Valdkund	Venäma
Administrativine keskuz	Lipin Bor
Eläjiden lugu (2015)	7,202 ristitud
Pind	2,884 km²

Vaškiden rajon (ven.: Вашкинский район) om rajon Vologdan agjas.

Vs 1938 kezakuspäi administrativine keskuz om Lipin Bor-žilo (rajonan ristitišton pol').

Istorii

Rajonan aluz om pandud vl 1927 elokun 1. päiväl Leningradan agjan Čerepovecan ümbrikho Vaškid-külän keskuseks (upotihe sidä Vaugedjärven tazopindan libutamižen aigan Volgan-Baltijanmeren veziten sauvomha). Vl 1930 heinkun 23. päiväl heitihe ümbrikod, i vhesai 1937 rajon mülüi Leningradan agjaha kuti administrativine ühtnik. Vs 1937 sügüz'kun 23. päiväspäi mülüb Vologdan agjaha. Vozil 1963−1964 rajonan territorii mülüi Belozerskan rajonha. Rajon om olmas nügüdläižiš röunoiš vspäi 1965.

Geografijan andmused

Vaškiden rajon sijadase agjan lodehes, päivnouzmha da pohjoižhe Vaugedjärven randalpäi. Rajonidenkeskeine röun läbitab järved lodehespäi suvipäivnouzmha. Pind — 2 884 nellikkilometrad. Mec otab territorijan koume nelländest (2148 km²), kavag'mecad (kuz', pedai) da koivikod oma enambuses.

Om röunoid 3 Vologdan agjan rajonanke:

• päivnouzmas Kirillovan rajonanke;
• suves da päivlaskmas Belozerskan rajonanke;
• pohjoižes Vitegran rajonanke.

Kirillovan kukkazsel'g mäneb rajonan päivnouzmaspäi keskushe. Reljef om tazo da sokaz toižil polil. Znamasine jogi om Kemanjogi. Kaik om 125 järved rajonas.

Londuseližed varad oma turbaz, sauvondmaterialad (letked, saved, gravii, dolomit), mec, kala, reskvezi.

Vs 2015 kezakun 25. päiväspäi rajonan territorii alajagase 3 küläkundha.

Tobmuz

Vs 2009 redukun 11. päiväspäi Aleksandr Ivanov om valitud i radab rajonan da sen administracijan pämehen kahtenden strokun. Rajonan pämehen järgvaličendad oliba vl 2013 sügüz'kun 8. päiväl. Kaks' administracijan varapämest oma hänele abhu. Viž ohjandust alištudas rajonan administracijale.

Käskusenandai tobmuz om Ezitajiden Suim (ven. Представительное собрание) 15 ühtnijanke. Kaik rahvaz valičeb heid nelläks vodeks. Järgvaličendad sihe oliba vl 2015 sügüz'kun 13. päiväl (kudenz' kucund). Andrei Fomin radab sen ezimehen vl 2015 kül'mkun 27. päivälpäi.

Vs 2014 elokun 8. päiväspäi Kundaline Nevondkund (ven. Общественный Совет) radab rajonas (7 ühtnijad).

Eläjad

Vn 2010 Venäman rahvahanlugemižen mödhe eläjiden lugu oli 9 116 ristitud. Nügüd' se om kaikiš pen' rajon agjas eläjiden lugun mödhe (7202 rist. vl 2015).

Kaik om 198 eländpunktad rajonas, sidä kesken 5 žilod da 194 küläd. Toižid surid eländpunktoid ei ole.

Ižanduz

Rajonan ižandusen päsarakod oma mecan varhapanend da ümbriradmine pilindmaterialoihe, jogitransport, sömtegimišt, maižanduz da kalanpüdand, turizm.

Federaline «Vologd — Vitegr — Medvežjegorsk»-avtote asfal'tižbetonižen alusenke läbitab rajonan territorijad.

Irdkosketused

• Vaškiden rajonan oficialine sait (lipinbor.ru). (ven.)
• Vaškiden rajon agjan ohjastusen oficialižel vologda-oblast.ru-portalal. (ven.) (angl.)