Vožegan rajon

Vožegan rajon
Вожегодский район

Znam	Flag
Valdkund	Venäma
Administrativine keskuz	Vožeg
Eläjiden lugu (2015)	15,218 ristitud
Pind	5,752 km²

Vožegan rajon (ven.: Вожегодский район) om rajon Vologdan agjas.

Administrativine keskuz om lidnanvuitte Vožeg-žilo.

Istorii

Rajonan aluz om pandud vl 1929 heinkun 15. päiväl Pohjoižen randan Vologdan ümbrikho. Sil aigal rajonan ristitišt oli 59 tuhad eläjid. Vl 1930 heinkun 30. päiväl heitihe ümbrikod, i vhesai 1936 rajon mülüi Pohjoižhe randha kuti administrativine ühtnik, sid' vozil 1936−1937 — Pohjoižhe agjaha. Vs 1937 sügüz'kun 23. päiväspäi mülüb Vologdan agjaha. Rajon om olmas nügüdläižiš röunoiš vspäi 1937.

Geografijan andmused

Vožegan rajon sijadase agjan pohjoižes, päivnouzmha Vože-järvespäi. Pind — 5 752 nellikkilometrad. Mec otab territorijan seičeme kahesandest (5014 km²), kavag'mecad oma enambuses. Sod — 8%. Rajonan piduz pohjoižespäi suvhe — 34 km, päivnouzmaspäi päivlaskmha — 131 km.

Om röunoid kudenke Venäman rajonanke:

• päivnouzmas Vologdan agjan Verhovažjen rajonanke;
• suvipäivnouzmas Vologdan agjan Sämžan rajonanke;
• suves Vologdan agjan Harovskan rajonanke;
• suvipäivlaskmas Vologdan agjan Kubenansun rajonanke;
• päivlaskmas Vologdan agjan Kirillovan rajonanke;
• pohjoižes Arhangel'skan agjan Konošan rajonanke.

Reljef om kukhikaz tobjimalaz, sokaz sijidme. Ülävagan ülüz seižub päivnouzmpoles. Znamasižed joged oma Kuben (Suhonan bassein) da Vožeg (Änižjogen bassein). Kaik om 87 järved rajonas. Kaikiš suremb niišpäi om Vože-järv (Čarondan), sen päivnouzmaine pala sodunudenke randanke mülüb rajonha. Kaik joged mülüdas Jävaldmeren basseinha.

Londuseližed varad oma turbaz, sauvondmaterialad (gravii, letked, saved), gaž, tuf, mec, kala, reskvezi.

Vs 2015 kezakun 1. päiväspäi rajonan territorii jagase 8 municipaližeks ühtnikaks: üks' lidnkund da 7 küläkundad.

Tobmuz

Vs 2008 kül'mkun 14. päiväspäi Sergei Semennikov om valitud i radab rajonan da sen administracijan pämehen kahtenden strokun. Rajonan pämehen järgvaličendad oliba vl 2012 keväz'kun 4. päiväl. Kaks' administracijan varapämest oma hänele abhu. Nell' ohjandust, 10 palakundad, 1 komitet da 1 radnikoičend alištudas rajonan administracijale.

Käskusenandai tobmuz om Ezitajiden Suim (ven. Представительное собрание) 17 ühtnijanke. Kaik rahvaz valičeb heid nelläks vodeks. Järgvaličendad sihe oliba vl 2012 keväz'kun 4. päiväl (videnz' kucund). Aleksandr Karpov radab sen ezimehen vl 2012 keväz'kun 29. päivälpäi.

Eläjad

Vn 2010 Venäman rahvahanlugemižen mödhe eläjiden lugu oli 16 790 ristitud.

Kaik om 309 eländpunktad rajonas, sidä kesken 1 lidnanvuitte žilo, 12 tošt žilod da 296 küläd. Toine sur' eländpunkt om Kadnikovskii-žilo-raudtestancii (2,2 tuh. rist. vl 2002).

Ižanduz

Rajonan ižandusen päsarakod oma raudtetransport, mecan varhapanend da ümbriradmine (pilindmaterialad, strubad), sömtegimišt, maižanduz da kalanpüdand, omblendtegimišt da turizm.

Irdkosketused

• Vožegan rajonan oficialine sait (vozhega.ru). (ven.)
• Vožegan rajon agjan ohjastusen oficialižel vologda-oblast.ru-portalal. (ven.) (angl.)