Bel'mopan

Bel'mopan
Belmopan

Flag
Valdkund	Beliz
Eläjiden lugu (2022)	20,754 ristitud
Pind	32,78 km²
Pämez'	Halid Belisle (keväz'ku 2015—)
Telefonkod	+501−8
Aigvö	UTC−6

Bel'mopan (angl.: Belmopan [ˌbɛlmoʊˈpɑːn]) om ripmatoman Belizan pälidn vspäi 1981. Mülüb Kajo-ümbrikho.

Istorii

Eländpunktan aluz om pandud vl 1970 kuti merentagaižen territorijan uz' pälidn, sikš miše vanh pälidn alištub torokoile i üks' mugoine Hetti-torok pani sidä mantazole vl 1961. Valitihe tarhad kahesakümnes kahtes kilometras päivlaskmha Belizaspäi, 76 m ü.m.t. keskmäižel korktusel. Nimitihe ut pälidnad Beliz-jogen i sen Mopan-ližajogen mödhe, hot' Mopan lankteb Belizha ülezjogen Bel'mopanaspäi.

Valdkundan parlament i administracii, Latinižen Amerikan sur'oigendusiden i konsulusiden sauvused sijadasoiš Bel'mopanas. AÜV:oiden sur'oigenduzkund om sirtud udhe pälidnha vl 2006, no toižiden verhiden maiden konsulusiden enambuz sijadase vanhas Beliz-pälidnas.

Geografijan andmused

Lidnan sijaduz Kajo-ümbrikos i Beliz-valdkundas vn 2012 kartal

Uz' pälidn sijadase valdkundan keskuzpalas, Kajo-ümbrikon pohjoižpäivnouzmas, Beliz-jogen oiktal randal. «Päivlaskmaine»-avtote ühtenzoitab valdkundan kaikiš surembidenke Beliz- i San Ignasio-lidnoidenke.

Klimat om tropine neps mussonine, lühüdanke kuivsezonanke uhokus-sulakus (41..55 mm kus). Päiväline keskmäine lämuz om +23..+28 C° vodes läbi, enamba semendkus (+28,1 C°). Paneb sadegid 1944 mm vodes, enamba kezakus-redukus (220..280 mm kus).

Eläjad da ižanduz

Vl 2009 eläjiden lugu oli 13,000 ristitud. Kaik 20,621 eläjad oli lidnas vl 2016. Kaikiš suremb lidnan ristitišt om nügüd'.

Äjad eläjišpäi ratas valdkundan aluzkundoiš. Belizan universitetan (angl.: University of Belize) päkampus om saudud Bel'mopanha. Ei ole tegimišton edheotandoid, no industrialine puišt om sauvomas i kävutadas lidnad logistižeks keskuseks (angarad da varažomad).

Galerei

• 
  Lidnan administracijan holitišiden sauvuz (Belmopan Civic Center, 2015)
• 
  Ripmatomuden torg (heinku 2015)
• 
  Lidnan torguz vl 2015 (Garden City Market)
• 
  Belizan futbolan federacijan stadion (FFB Stadium, semendku 2019)

Irdkosketused

• Lidnan tobmuden oficialine sait (belmopancitycouncil.org). (angl.)
• Lidnan informaciž-turistine sait (belmopanonline.com). (angl.)