Panam (lidn)

Panam
Ciudad de Panamá

Lidnanznam	Flag
Valdkund	Panam
Eläjiden lugu (2023)	1,086,990 ristitud
Pind	86,6 km²
Pämez'	Hose Luis Fabrega (heinku 2019—, José Luis Fábrega)
Telefonkod	+507−2xx-xxxx
Aigvö	UTC−5

Sil sanal voib olda toižid znamoičendoid; miše nähta niid, tulgat tänna.

Panam-lidnan keskuzpalan kart (2015)

Panam (isp.: Ciudad de Panamá [sjuˈða(ð) ðe panaˈma]) om Panaman Tazovaldkundan pälidn da kaikiš suremb lidn. Se om Panaman agjan administrativižeks keskuseks da palaks mugažo.

Istorii

Eländpunktan aluz om pandud vn 1519 25. päiväl elokud kuti Nuestra Sen'jora de la Asunsjon de Panam-baz (isp.: Nuestra Señora de la Asunción de Panamá) vedamha kuldad da hobedad Peruspäi Ispanijha. Vanh lidn (isp.: Panama la Vieja «Panama la Vjeha») oli muretud Genri Morgan-piratan joukul i paloi vl 1611, jändused oma kaičenus seičemes kilometras pohjoižpäivnouzmha udes lidnaspäi (vspäi 1613). 1940−1970-nzil vozil AÜV:oiden saubaližed sodameribazad sijazisoiš lidnan territorijal.

Panam-lidn šingotase rahvahidenkeskeižel finansižel rajonal, merikanalal i meriportal, sirdanuzil penziimehil da turizmal. Valdkundan opendusen päkeskuz ispanijan i anglijan kelil, AÜV:oiden nellän universitetan filialad oma avaitud Panamas.

Geografijan andmused

Lidn sijadase Panaman lahten randal, Panaman kanalan tün'valdmerižen agjan päivnouzmaižel randal tobjimalaz, 0..700 m korktusil, kaks' metrad ü.m.t. keskmäižel korktusel.

Klimat om subekvatorialine neps, vai tropižen savannan mussonižen klimatan röunal. Sä om pil'vekaz päiči kuivas sezonas. Kun keskmäine lämuz vajehtub +27,0..+28,9 C° röunoiš vodes läbi. Paneb sadegid 1907 mm vodes, enamba semendkus-kezakus (225..235 mm kus) i sügüz'kus-kül'mkus (252..331 mm kus), kuiv sezon oleskeleb vilukus-keväz'kus (52 mm pordos).

Tobmuz

Panaman ümbrikon korregimento:d (2009)

Lidnan pämez' om Panaman ümbrikon pämez' (isp.: Alcalde Mayor del Distrito de Panamá, vai Alcalde de la Ciudad de Panamá, lühüdaks Alcalde de Panamá). Edeline lidnan pämez' om Hose Isabel' Blandon Figeroa (José Isabel Blandón Figueroa, heinku 2014 — kezaku 2019).

Eläjad

Vl 2011 lidnan eläjiden lugu oli 813 097 ristitud, vl 2013 — 880 691 ristitud. Kaik 1,5 mln eläjid om ezilidnoidenke 2081 km² pindal (Panaman ümbrik i San Migelito-ümbrik, 2019, vl 2013 oli 1,3 mln), valdkundan koumandez.

Transport

Avtobusad, ehtatimed da taksid oma kundaližeks transportaks lidnas. Vspäi 2014 metropoliten radab, kaks' jonod oma vspäi 2019 (32 stancijad, 39,8 km raudted), koumanz' jono om sauvomižes.

Rahvahidenkeskeine civiline Tokumen-lendimport (isp.: Tocumen, PTY / MPTO) sijadase 30 km pohjoižpäivnouzmha Panam-lidnan keskuzpalaspäi ühtennimižes lidnas. Tehtas reisid Suviamerikan da Pohjoižamerikan maidme tobjimalaz.

Galerei

• 
  Istorine rajon (2007)
• 
  Lidnan finansine rajon vl 2016
• 
  Suvikoridoran merisild vl 2005

Irdkosketused

• Panaman municipijan tobmuden sait (mupa.gob.pa). (isp.)