Budönnovsk

Budönnovsk
Будённовск
Lidnanznam;	Flag;
Valdkund	Venäma
Eläjiden lugu (2025)	56,258 ristitud
Pind	62,1 km²
Pämez'	Vitalii Man'ko; (kül'mku 2018—)
Telefonkod	+7−86 559-xx-xxx
Avtokod	26, 126
Aigvö	UTC+3 (MSK+0)

Budönnovsk (ven.: Будённовск) om Venäman lidn da lidnankund Stavropolin randan päivnouzmas. Se om Budönnovskan rajonan administrativine keskuz, mülüb rajonha.

Istorii

Nügüdläižen eländpunktan aluz om pandud vl 1799 Pühä Rist-nimenke (ven.: Святой Крест) da lidnan statusanke. Vll 1921−1935 i 1957−1973 lidnan nimi oli Prikumsk, sikš miše enzne nimi oli religiozine. Vll 1935−1957 nimitihe i vs 1973 kül'mkun 30. päiväspäi nimitadas Budönnovsk:aks Semön Budönnii-sodakäsknikan (1883−1973) oiktastuseks, ajeli lidnan läbi vl 1935.

Budönnovsk šingotase himižen sarakon edheotandoil (plastmassan «Stavrolen»-tegim^[1]), sömtegimištol i meblin tehmižel.

Geografijan andmused

Lidn sijadase rajonan keskuzpalas, kukhikahal tazangištol, stepin i pol'letetazangišton zonoiden röunal, Kumanjogen hural randal i Buivol-järven (ven.: Буйвола) randal, 135 m ü.m.t. keskmäižel korktusel.

Matkad Stavropolihesai om 175 km päivlaskmha orhal vai 210 km avtotedme. Lähembaižed lidnad oma Neftekumsk seičemekümnes kilometras päivnouzmha, Zelenokumsk 55 km suvipäivlaskmha i Blagodarnii 70 km lodeheze, lendimport — 130 km suvipäivlaskmha avtotedme Mineraližed Veded-lidnanno.

Tobmuz

Budönnovsk om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline lidnan Administracijan pämez' om Valerii Ševčenko (kül'mku 2015 — reduku 2018). Lidnan Duman ezimez' om Gennadii Bespalov vn 2017 tal'vkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 64 624 ristitud, rajonan viž ühesandest, vn 2021 — 58 103 ristitud. Vl 2017 lidnan ristitišt oli 62 715 eläjad. Kaikiš suremb lidnan ristitišt oli 65 687 eläjad vl 2002.

Rahvahad (enamba 0,4 % vl 2021): venälaižed — 83,6 %, armenijalaižed — 5,0 %, darginalaižed — 2,0 %, tabasaranalaižed — 0,8 %, avarad — 0,7 %, azerbaidžanlaižed — 0,7 %, čiganalaižed — 0,5 %, toižed rahvahad — 3,1 %, rahvahuden ozutandata — 3,6 %.

Ortodoksižen hristanuskondan kuz' pühäpertid^[2] oma saudud: koume jumalanpertid i koume časounäd. Armenižen jumalankodikundan kaks' pühäpertid oma letud lidnas.

Openduz

Lapsiden opendusen aluzkundad oma päivkodid, keskškolad.

Lidnan professionaližen opendusen aluzkundad oma Budönnovskan politehnine^[3] i medicinine^[4] kolledžad, «Progress»-openduzkeskuz, Stavropolin kooperativižen tehnikuman filial, Stavropolin valdkundaližen pedagogižen institutan filial^[5] i Kavkazan rahvahiden sebrusen institutan filial.

Galerei

Lidnan tobmuden sauvuz (2017)
Jumalanmaman Kazanin jumalaižen jumalanpert', vn 2012 nägu
Lapsiden sädamižen pert' (2017)
Budönnovskan rajonan läžundkodi 2000-nzil vozil
Budönnovsk-päraudtestancijan sauvuz vl 2009

Homaičendad

Irdkosketused

Budönnovskan municipaližen ümbrikon sait (abmosk.ru). (ven.)

Budönnovsk Vikiaitas

	Stavropolin randan lidnad
	Blagodarnii \| Budönnovsk \| Georgijevsk \| Ipatovo \| Izobil'nii \| Jessentukad \| Kislovodsk \| Lermontov \| Mihailovsk \| Mineraližed Veded \| Neftekumsk \| Nevinnomissk \| Novoaleksandrovsk \| Novopavlovsk \| Pätigorsk \| Stavropol' \| Svetlograd \| Zelenokumsk \| Železnovodsk

[1] «Stavrolen»-edheotandan sait (stavrolen.lukoil.ru). (ven.)

[2] Budönnovskan pühäpertid sobory.ru-saital. (ven.)

[3] Budönnovskan politehnižen kolledžan sait (rpk49.ru). (ven.)

[4] Budönnovskan medicinižen kolledžan sait (budmed.ru). (ven.)

[5] Stavropolin valdkundaline pedagogine institut, Budönnovskan filialan sait (budfil.sspi.ru). (ven.)

[1]

[2]

[3]

[4]

[5]