Kislovodsk

Kislovodsk
Кисловодск

Lidnanznam	Flag
Valdkund	Venäma
Eläjiden lugu (2021)	127,521 ristitud
Pind	71,83 km²
Pämez'	Jevgenii Moiseev (tal'vku 2021—)
Telefonkod	+7−87 937-xx-xxx
Avtokod	26, 126
Aigvö	UTC+3 (MSK+0)

Kislovodsk (ven.: Кислово́дск, kar. da balk.: Нарсана) om Venäman lidn, lidnümbrik da lebutaho Stavropolin randan suvipäivlaskmas. Se om randan koumanz' lidn eläjiden lugun mödhe. Mülüb Kavkazižed Mineraližed Veded-regionha.

Istorii

Eländpunktan aluz om pandud vl 1803. Se sai lidnan statusad vl 1903.

Kislovodsk šingotase lebuturizmal (enamba 40 sanatorijad, puišt 9,6 km²), mebel'fabrikal, porcellanan edheotandal i sömtegimištol (mineraline «Narzan»-vezi, tomatpast i makaronad).

Geografijan andmused

Lidn sijadase Podkumk-jogen oiktal randal tobjimalaz (ven.: Подкумок, Kuman oiged ližajogi), Suren Kavkazan ezimägištol, 750..1200 m korktusil, 815 m ü.m.t. keskmäižel korktusel.

Matkad Karačajan da Čerkesijan röunhasai om kümne kilometrad päivlaskmha, Stavropolihesai om 234 km lodeheze.

Tobmuz

Kaik kümne žilod mülüdas lidnümbrikho Kislovodskan ližaks (edel 2020. vot oli seičeme žilod). Lidnümbrikon pind om 71,83 km².

Edeline lidnümbrikon pämez' om Aleksandr Kurbatov (tal'vku 2015 — tal'vku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 128 553 ristitud, lidnümbrikon — 135 368 ristitud. Vl 2018 kaik 129 593 ristitud elihe lidnas i 136 386 ristitud kaikes lidnümbrikos. Kaikenaigaižen ristitišton lugu vajehtase 128..130 tuhad eläjid röunoiš vspäi 2002, kaikiš suremb oli 130 007 ristitud vl 2015.

Rahvahad (lidnan eläjad, enamba 0,4 % vl 2010): venälaižed — 76,4 %, armenijalaižed — 9,1 %, karačailaižed — 4,2 %, ukrainalaižed — 1,3 %, abazilaižed — 1,1 %, gruzijalaižed — 0,9 %, osetinalaižed — 0,5 %, čerkesalaižed — 0,5 %, azerbaidžanlaižed — 0,5 %, lakalaižed — 0,4 %, čečenalaižed — 0,4 %, totarlaižed — 0,4 %, toižed rahvahad — 3,9 %, rahvahuden ozutandata — 0,4 %.

Ortodoksižen hristanuskondan 17 pühäpertid oma olmas lidnas: Ph. Mikulai-čudonsädajan kafedraline päjumalanpert' (letihe vll 1993−2008), kümne jumalanpertid i kuz' časounäd. Armenižen jumalankodikundan Surb Vardan Mamikonän-jumalanpert' om avaitud. Protestantizman kaks' jumalanpertid oma saudud: seičemenden päivän adventistoiden i baptistoiden. Islaman pämečet' radaškanzi vl 2019.

Lapsiden opendusen aluzkundad oma severz'-se päivkodid, keskškolad. Kislovodskan kaks' mediciništ kolledžad i äiprofil'ne tehnikum oma lidnan professionaližen opendusen aluzkundoikš.

Vozil 2008 da 2014 Kaikenvenälaižen školopenikoiden olimpiadan venäkel'tme lopimetap mäni neciš lidnas.

Galerei

• 
  Kislovodskan «Krepost'»-kodirandantedištandmuzei (2008, Lidnuz)
• 
  Ph. Mikulai-čudonsädajan kafedraline päjumalanpert', vn 2016 nägu
• 
  Surb Vardan Mamikonän-jumalanpert', vn 2009 nägu
• 
  «Luč»-sanatorii vl 2001 (Sädeg)
• 
  Narzanan pävannad Kurortnii-bul'varal vl 2011
• 
  «Grand Hotel»-adivpert' vl 2013
• 
  Cirk (2021)
• 
  «Rossija»-kinoteatr (2016, Venäma)
• 
  Kervačte vl 2012
• 
  Kislovodsk-päraudtestancijan sauvuz vl 2017

Irdkosketused

• Kislovodsk-lidnan-kurortan Duman oficialine internet-ezitaikund (dumaksl.ru). (ven.)
• Lidnan-kurortan Administracijan oficialine sait (kislovodsk-kurort.org). (ven.)