Mineraližed Veded

Mineraližed Veded
Минеральные Воды
	Lidnanznam;
Valdkund	Venäma
Eläjiden lugu (2021)	70,485 ristitud
Pind	51,55 km²
Telefonkod	+7−87 922-xx-xxx
Avtokod	26, 126
Aigvö	UTC+3 (MSK+0)

Mineraližed Veded (ven.: Минера́льные Во́ды, armen.: Միներալնիե Վոդի Mineralnie Vodi) om Venäman lidn Stavropolin randan suves, Mineraližiden Veziden lidnümbrikon (edel 2015. vot — rajonan, mülütihe sihe vl 2010) administrativine keskuz. Mülüb Kavkazižed Mineraližed Veded-regionha.

Istorii

Eländpunktan aluz om pandud vl 1878 kuti Sultanovskii-žilo raudtestancijannoks «Rostov Donal — Vladikavkaz»-jonol. Udesnimitihe sidä Illarionovskii-žiloks vl 1898. Vspäi 1922 om lidnan statusanke da nügüdläiženke nimenke.

Mineraližed Veded šingotasoiš sömtegimišton edheotandoil (leibtegim, veden butiliruindan tegimed, oludentegim, vintegim, konditerine ceh), mugažo kivenümbriradai tegim, Irkutskan raudbetonan tegimen filial i karvfabrik ratas.

Geografijan andmused

Lidn sijadase Kumanjogen oiktal randal (Kaspijan meren bassein), 300 m keskmäižel korktusel valdmeren pindan päl. Matkad Stavropolihesai om 135 km lodeheze orhal vai 170 km avtotedme. Lähembaine lidn om Železnovodsk 15 km suvipäivlaskmha avtotedme.

Edel 2015. vot lidn oli rajonan erigoittud lidnankundaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 76 728 ristitud, rajonan pol'. Vl 2018 lidnan ristitišt oli 74 758 eläjad. Kaikiš suremb lidnan ristitišt oli 88..89 tuhad eläjid vll 1997−2007 (89 336 rist. vl 2004).

Rahvahad (enamba 1% vl 2010): venälaižed — 82,6%, armenijalaižed — 8,7%, ukrainalaižed — 1,3%, grekalaižed — 1,1%, toižed rahvahad — 5,2%, rahvahuden ozutandata — 1,1%.

Ortodoksižen hristanuskondan seičeme pühäpertid^[1] oma olmas lidnas: Jumalanmaman Katken päjumalanpert' (om saudud vll 1990−1997), viž jumalanpertid i ph. Jurgii-vägestusenkandajan časoun'. Armenižen jumalankodikundan «Surb Hač»-pühäpert'^[2] radab. Protestantizman kaks' pühäpertid oma avaitud: seičemenden päivän adventistoiden jumalanpert' i baptistoiden loičendpert'.

Professionaližen opendusen aluzkundad: Mineraližveziden regionaline äiprofil'ne kolledž^[3], raudtetransportan kolledž^[4], Stavropolin randan muzikaližen kolledžan filial, Rostovan torguimiž-ekonomižen tehnikuman filial, üläopendusen aluzkundoiden koume filialad.

Transport

Pened avtobusad i taksid oma kundaližeks transportaks lidnas, avtobusad ühtenzoittas lidnan regionan eländpunktoidenke. Federaline «Kavkaz»-mante (R-217) läbitab lidnad. Mineraližed Veded-raudtestancii radab vl 1875, sen nimituz oli Sultanovskai (ven.: Султановская) vhesai 1922.

Regionan rahvahidenkeskeine civiline Mineraližed Veded-lendimport M. Ju. Lermontovan nimed^[5] (MRV / МРВ / URMM, 2,5 mln passažiroid vl 2019) levineb nelläs kilometras lidnaspäi.

Galerei

Partijan 22. suiman irdal (2012)
Pühän Jumalanmaman Blagoveššenjan jumalanpert' (om letud vll 2010−2012), vn 2022 nägu
Armenine «Surb Hač»-jumalanpert' (Pühä Rist), vn 2019 nägu
Mineraližed Veded-lendimportan terminal vl 2009
Mineraližed Veded-päraudtestancijan sauvuz vl 2008

Homaičendad

Irdkosketused

Mineraližiden Veziden lidnümbrikon tobmuden oficialine sait (min-vodi.ru). (ven.)

Mineraližed Veded Vikiaitas

	Stavropolin randan lidnad
	Blagodarnii \| Budönnovsk \| Georgijevsk \| Ipatovo \| Izobil'nii \| Jessentukad \| Kislovodsk \| Lermontov \| Mihailovsk \| Mineraližed Veded \| Neftekumsk \| Nevinnomissk \| Novoaleksandrovsk \| Novopavlovsk \| Pätigorsk \| Stavropol' \| Svetlograd \| Zelenokumsk \| Železnovodsk

[1] Mineraližiden Veziden pühäpertid sobory.ru-saital. (ven.)

[2] Armenižen jumalankodikundan pühäpertin sait (surbkhach.ru). (ven.)

[3] Mineraližveziden regionaližen äiprofil'žen kolledžan sait (mrmk-college.ru). (ven.)

[4] Mineraližveziden raudtetransportan kolledžan sait (мкжт.рф). (ven.)

[5] Mineraližed Veded-lendimportan sait (mvairport.ru). (ven.)

[1]

[2]

[3]

[4]

[5]