Ipatovo

Ipatovo
Ипатово

Lidnanznam	Flag
Valdkund	Venäma
Eläjiden lugu (2025)	25,163 ristitud
Pind	16 km²
Telefonkod	+7−86 542-xx-xxx
Avtokod	26, 126
Aigvö	UTC+3 (MSK+0)

Ipatovo (ven.: Ипа́тово) om Venäman lidn Stavropolin randan pohjoižes. Om Ipatovon lidnümbrikon (edel 2017. vot — rajonan) administrativižeks keskuseks da palaks.

Istorii

Eländpunktan aluz om pandud vl 1860, i vhesai 1880 nimitihe sidä Čemrek-küläks (ven.: Чемрек) mahapandud läheli nogaižen ruhtinasen mödhe. Sid' vhesai 1935 nimi oli Vinodel'noje (ven.: Винодельное) vinan varažomiden äjüden taguiči. Udesnimitadud Venäman Rahvahanikoiden sodan Pötr Ipatov-ühtnijan kanzannimen mödhe, hän pölištui külän ümbrištos vl 1918. Vn 1979 tal'vkun 3. päiväspäi Ipatovo om lidnan statusanke.

Ipatovo om maižanduzrajonan keskuz, om sömtegimišton (saguden edheotand, oludentegim, villänpurnud) i sauvondan edheotandoid, kombisötken tegim radab, savičun tegim om sauvomas. Londuseližen gazan löudmižsijad oma läz lidnad. «Kolos»-motobolklub om Venäman lidirujiden koumen kesken.

Geografijan andmused

Ipatovon lidnümbrikon sijaduz randas vn 2010 kartal

Lidn sijadase ümbrikon keskuzpalan päivnouzmas, Kalaus-jogen (Manič-jogen ližajogi) hural randal 100 m kortte valdmeren pindan päl, jogi om päivnouzmaižeks röunaks. Čemrek-oja läbitab kaiked lidnad da lankteb Kalausha.

Matkad Stavropolihesai om 125 km suvipäivlaskmha avtotedme. Lähembaine lidn om Svetlograd vižkümnes kilometras suvhe kaikil teil.

Klimat om terav kontinentaline, kuivan polhe. Ekstremumad oma −35 C° i +45 C°. Paneb sadegid 300..400 mm vodes.

Tobmuz

Ipatovon lidnankund om tühjitadud vn 2017 semendkus. Sen pind oli 30 nellikkilometrad. Kaik koume futorad mülüiba lidnankundha Ipatovon ližaks: Bondarevskii (603 rist. vl 2023), Kočeržinskii (373 rist.) i Vodnii (162 rist.).

Lidnankundan tobmuden pämez' oli Valerii Galaktionov vn 2005 tal'vkuspäi. Lidnan Administracijan pämez' oli Ivan Litvinov vn 2011 semendkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 26 053 ristitud, rajonan kaks' videndest, vn 2021 — 26 122 ristitud. Vl 2017 lidnan ristitišt oli 24 390 eläjad. Kaikiš suremb lidnan ristitišt oli läz 28 tuhad eläjid vozil 1996−2009 (28 800 rist. vl 1998).

Rahvahad (enamba 1 % vl 2010): venälaižed — 95,5 %, toižed rahvahad — 4,0 % ravhahuden ozutandata — 0,5 %.

Ortodoksižen hristanuskondan kaks' jumalanpertid oma avaitud lidnas: Sündun Voznesenjan (om saudud vll 2000−2013) i ph. Feodosii Černigovalaižen.

Openduz

Lapsiden opendusen aluzkundad oma ühesa nimitadud i nomeruidud päivkodid (nomer 1..7, 18, 28), nell' keskškolad (nomer 1, 6, 14, 22), lapsiden ližaopendusen keskuz, čomamahtoiden škol, čomamahtoine škol, lapsiden da norišton sportškol.

Ipatovon äiprofil'ne tehnikum om lidnan professionaližen opendusen aluzkundaks.

Transport

Ipatovo-päraudtestancijan sauvuz vl 2005

Federaline «Astrahan' — Stavropol'»-avtote (R-216) om lidnan pohjoižröunaks. Avtobusstancii om avaitud lidnas.

Ipatovo-raudtestancii (om avaitud vl 1914 kut Vinodel'noje) radab lidnas.

Irdkosketused

• Ipatovon lidnümbrikon tobmuden sait (ipatovo26.gosuslugi.ru) i sen versii edel vn 2023 keväz'kud (ipatovo.org). (ven.)