Nikol'skan ümbrik

Nikol'skan ümbrik
Никольский округ

Znam	Flag
Valdkund	Venäma
Administrativine keskuz	Nikol'sk
Eläjiden lugu (2023)	18,845 ristitud
Pind	7,476,71 km²

Nikol'skan ümbrik (ven.: Нико́льский о́круг) om ümbrik (edel vn 2023 kezakud — rajon) Venäman Vologdan agjas.

Administrativine keskuz om Nikol'sk-lidn, otab ümbrikon ristitišton kaht videndest.

Istorii

Ümbrikon aluz om pandud kut rajon vn 1924 elokus Pohjoižen Dvinan gubernijha. Sil aigal rajonan pind oli 8863 nellikkilometrad, ristitišt — 59317 eläjad. Vn 1929 heinkun 15. päiväspäi rajon mülüi Pohjoižen randan Pohjoižen Dvinan ümbrikho. Vn 1930 heinkun 30. päiväl heittihe ümbrikod, i voden 1936 tal'vkun 5. päivhäsai rajon mülüi Pohjoižhe randha kut administrativine ühtnik. Vozil 1936−1937 oli Pohjoižen agjan palaks. Vn 1937 sügüz'kun 23. päiväspäi rajon mülüb Vologdan agjaha. Ümbrik om olmas nügüdläižiš röunoiš vspäi 2004.

Geografijan andmused

Nikol'skan ümbrik sijadase agjan suvipäivnouzmas. Pind — 7 476,71 nellikkilometrad. Mecad ottas territorijan 86 % (6448 km²). Koivikod habikoidenke oma enambuses, kavag'mec otab koumandest (kuz', pedai).

Om röunoid seičemenke Venäman ümbrikonke i rajonanke:

• päivnouzmas Kostroman agjan Vohman rajonanke;
• suvipäivnouzmas Kostroman agjan Pavinon rajonanke;
• suves Kostroman agjan Piščugan da Mežan rajonidenke;
• suvipäivlaskmas Kostroman agjan Kologrivan rajonanke;
• päivlaskmas Vologdan agjan Babuškinan ümbrikonke;
• pohjoižes da pohjoižpäivnouzmas Vologdan agjan Kičmengan ümbrikonke.

Reljef om kukhikaz tobjimalaz, pened sod oma sijidme. Pohjoižed Uvalad-ülüden päivlaskmaine pala otab ümbrikon territorijad läz täuzin. Znamasine jogi om Jug sen huranke Šaržen'g-ližajogenke, mülüdas Pohjoižen Dvinan (Jävaldmeren) basseinha. Ümbrikon päivlaskmas Unž-jogi ližajodidenke mülüb Volgan (Kaspijan meren) basseinha. Om läz seičemed sadad penid da surid jogid. Om vähä penid järvid (ühten nellikkilometran penemba pindal). Sod ottas territorijan sadandest.

Londuseližed varad oma turbaz, sauvondmaterialad (letked, saved, gravii), dolomit, mec, reskvezi.

Tobmuz

Vn 2015 kezakun 25. päiväspäi rajonan territorii jagoihe kahesaks municipaližeks ühtnikaks: üks' lidnankund i seičeme küläkundad. Üks' küläkund oli mülütadud toižhe vn 2018 kezakus, üks' lidnankund i kuz' küläkundad jäiba. Kaik ned oma kätud ümbrikon territorialižikš palakundoikš vn 2023 kezakuspäi.

Vs 2008 keväz'kuspäi Väčeslav Panov oli valitud i radoi rajonan da sen administracijan pämehen kahtenden strokun. Rajonan pämehen järgvaličendad oliba vn 2012 keväz'kun 4. päiväl, hänen valdatusiden strok oli viž vot. Nell' administracijan varapämest oliba hänele abhu. Kaik kaks' ohjandust, kahesa palakundad da üks' komitet alištuiba rajonan administracijale.

Käskusenandai tobmuz om Ezitajiden Suim (ven.: Представительное собрание) 19 ühtnijanke. Kaik rahvaz valičeb heid nelläks vodeks. Järgvaličendad sihe oliba vn 2012 keväz'kun 4. päiväl. Väčeslav Podnebesnikov radoi sen ezimehen vl 2015.

Eläjad

Vn 2002 Venäman rahvahanlugemižen mödhe rajonan eläjiden lugu oli 26 461 ristitud, vn 2010 — 24 488 ristitud, vn 2021 — 19 154 ristitud. Kaik 20 115 eläjad oli rajonas vl 2017.

Rahvahad (enamba 0,4 % vl 2021): venälaižed — 97,6 %, toižed rahvahad — 0,8 %, rahvahuden ozutandata — 1,6 %.

Kaik om 214 eländpunktad ümbrikos, niiden kesken üks' lidn, 12 žilod da 201 külä, niišpäi 31 seištas kaikenaigažeta ristitištota. Toižid surid eländpunktoid ei ole.

Ižanduz

Ümbrikon ižandusen päsarakod oma mecan varhapanend da ümbriradmine (pilindmaterialad, strubad brusaspäi), sömtegimišt da maižanduz, omblendtegimišt da turizm.

Irdkosketused

• Nikol'skan ümbrikon tobmuden sait (35nikolskij.gosuslugi.ru) i sen versii edel 2024. vot (nikolskreg.ru). (ven.)
• Nikol'skan ümbrik agjan ohjastusen oficialižel vologda-oblast.ru-portalal. (ven.) (angl.)