Polärnii

Polärnii
Полярный

Lidnanznam	Flag
Valdkund	Venäma
Eläjiden lugu (2023)	12,154 ristitud
Pind	358,05 km²
Telefonkod	+7−81 551-xx-xxx
Avtokod	51
Aigvö	UTC+3

Polärnii (ven.: Поля́рный) om Venäman lidn Murmanskan agjan pohjoižes. Vspäi 2008 om sodahoštusen lidnaks i mülüb Sauptud administrativiž-territorialižhe «Aleksandrovsk»-ühtnikha (521 km²) territorialižeks ümbrikoks.

Istorii

Eländpunktan aluz om pandud vl 1896 kuti kommertižen Aleksandrovsk-portan žilo Sergei Vitten taričendan mödhe. Se sai oficiališt lidnan statusad vl 1899 üläihastuzavaidusen ühtes. Vl 1926 kätihe Aleksandrovskoje-žiloks, vl 1931 udesnimitihe Polärnoje-žiloks. Vspäi 1939 om lidnan statusanke tošti da nügüdläiženke nimenke.

Pohjoižen laivišton trallaividen baziruindan jädumatoi punkt i laivankohenduztegim oma olmas Polärnii-lidnas, mugažo leibtegim radab.

Geografijan andmused

Lidnan sijaduz SATÜ:s i agjas vn 2025 kartal

Lidn sijadase tundras, SATÜ:n suvipäivnouzmas, Barencan meren Jekaterinan merikaran randal, 20 m ü.m.t. keskmäižel korktusel. Kaikiš korktemb čokkoim om Vestnik-mägenpä 115 metrad korktusel.

Matkad SATÜ:n Snežnogorsk-keskushesai om kahesas kilometras päivlaskmha orhal vai 14 km avtotedme (avtobusad ühtenzoittas lidnoid), Murmanskhasai — koumekümne kilometrad suvipäivlaskmha orhal vai 60 km avtotedme.

Klimat om subarktine meren. Voden keskmäine lämuz om +1,4 C°, kezakun-elokun +8,5..+12,3 C°, tal'vkun-keväz'kun −4,5..−7,8 C°.

«Aleksandrovsk»-SATÜ:n sijaduz agjas (2011)

Eläjad

Vn 2010 Venäman rahvahanlugemižen mödhe lidnan eläjiden lugu oli 17 293 ristitud, vn 2021 — 12 293 ristitud. Kaik 17 568 eläjad oli lidnas vl 2017, 17 494 eläjad vl 2020. Kaikiš suremb lidnan ristitišt oli 27 635 eläjad vl 1989.

Ortodoksižen hristanuskondan kaks' pühäpertid oma saudud i avaitud: ph. Mikulai-čudonsädajan jumalanpert' (om pühästadud vl 1999) i puine časoun' (om letud vll 2014−2017).

Openduz

Lapsiden opendusen aluzkundad oma seičeme nimitadud i nomeruidud päivkodid (nomer 1, 3..5, 13, 15, 56), keskškol nomer 1, gimnazii, lapsiden ližaopendusen keskuz, čomamahtoiden škol, lapsiden da norišton sportškol kahtišti Nevondkundaližen Ühtištusen V.N. Leonov-vägimehen nimed.

Murmanskan arktižen universitetan filial om lidnan professionaližen opendusen aluzkundaks.

Galerei

• 
  Cirkulärine pert' vl 2017
• 
  Sodameriläžundkodin nägu (vn 2017 olend)
• 
  Kolan flotilijan päfater (2006. voz' vai aigemba)
• 
  Lidnan kodirandantedištandmuzei (2017)
• 
  «Kaluga»-, «Lipeck»- i «Jaroslavl'»-VA-laivad Polärnijan merivaldmoidenno vl 2015
• 
  Nevondkundaline lidnanznam (1990)

Irdkosketused

• Aleksandrovsk-SATÜ:n tobmuden aluzkundoiden oficialine sait (zato-a.ru). (ven.)
• Aleksandrovsk-SATÜ:n Deputatoiden nevondkundan oficialine sait (sovet-a.ru). (ven.)