Zapolärnii

Zapolärnii
Заполярный

Lidnanznam	Flag
Valdkund	Venäma
Eläjiden lugu (2023)	14,231 ristitud
Pind	12 km²
Telefonkod	+7−81 554-xx-xxx
Avtokod	51
Aigvö	UTC+3 (MSK+0)

Zapolärnii (ven.: Заполя́рный) om Venäman lidn Murmanskan agjan lodehes. Mülüb Pečengan ümbrikho (edel vn 2020 semendkud rajon), sen üks'jäine lidn da kaikiš enamba elänzoittud punkt.

Istorii

Eländpunktan aluz om pandud sauvomha küllästamižkombinatad vas'ken da nikelin löudmižsijanno Ždanovan nimel nimitadud vl 1955. Kirjutihe žilod Zapolärnijaks vl 1956, kätihe radnikžiloks vl 1957. Zapolärnii sai lidnan statusad vl 1963. Sen kartte Gornii-radnikžilo (edel 1958. vot Pil'gujärvi) om mülütadud lidnha vl 1967.

Zapolärnii šingotase Kolan kaivuzmetallurgižel kompanijal («Noril'skii nikel'»-koncernan pala), sen «Pohjoine»-kaivuz, küllästamižtegim i suladuzcehan poltandtarh ratas lidnas. Kivenümbriradai tegim om saudud.

Geografijan andmused

Pečengan ümbrikon sijaduz agjas vn 2011 kartal

Lidn om röunanverine, sijadase ümbrikon pohjoižpalan keskuses, 116 m ü.m.t. keskmäižel korktusel.

Matkad Nikel'-rajonkeskushesai om kaks'kümne viž kilometrad päivlaskmha avtotedme, Murmanskhasai om 102 km suvipäivnouzmha orhal vai 160 km avtotedme. Om kümne kilometrad pohjoižhe orhal Norvegijan valdkundröunhasai. Lähembaine lidn om Zaozörsk 63 km päivnouzmha orhal vai 87 km avtotedme. Zapolärnai-raudtestancii om «Nikel' — Kol»-keskustal.

Tobmuz

Zapolärnii oli lidnankundan üks'jäižeks eländpunktaks, kund om likvidiruidud vl 2021. Lidnankundan pind oli 416,5 km².

Jäl'gmäine lidnan Administracijan pämez' oli Andrei Kuznecov (tal'vku 2015 — sügüz'ku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 15 288 ristitud, rajonan ristitišton kaks' videndest, vn 2021 lidnan — 14 791 ristitud. Kaik 15 194 eläjad oli lidnas vl 2017. Kaikiš suremb lidnan ristitišt oli 23 564 eläjad vl 1989.

Ortodoksižen hristanuskondan Eläban Eziauguižen Stroican puine uz' jumalanpert' om letud vll 2014−2019.

Lapsiden opendusen aluzkundad oma seičeme nomeruidud päivkodid (nomer 2, 4..6, 8, 27, 38), aluzškol (nomer 22), kaks' keskškolad (nomer 9 i 19), lapsiden sädamižen pert' nomer 2, muzikškol nomer 2, čomamahtoine škol nomer 2. Professionaližen opendusen aluzkundad ratas lähembaižiš lidnoiš. Ende Mončegorskan politehnižen kolledžan filial oli lidnas.

Galerei

• 
  Torguindkeskuz vl 2021
• 
  Namajogi (2004, ven.: Намайоки)
• 
  Kaivuden nägu vl 2009
• 
  «Oktäbr'»-kul'turkeskuz lidnan pätorgul (kezaku 2021)
• 
  Lebuzon, 2021

Irdkosketused

• Lidnan informacine sait (zapolyarniy51.ru.today). (ven.)
• Pečengan ümbrikon tobmuden sait (pechengamr.gov-murman.ru). (ven.)