Severomorsk

Severomorsk
Североморск

Lidnanznam	Flag
Valdkund	Venäma
Eläjiden lugu (2023)	43,394 ristitud
Pind	60 km²
Pämez'	Oleg Prasov (tal'vku 2020—)
Telefonkod	+7−81 537-xx-xxx
Avtokod	51
Aigvö	UTC+3 (MSK+0)

AÜV:oiden USS Yorktown (CG-48)-raketkreiser Severomorskas vn 1992 kezal

Severomorsk (ven.: Северомо́рск, ukr.: Сєвєроморськ) om Venäman lidn Murmanskan agjan pohjoižes. Se om Severomorskan lidnümbrikon (alištub agjale) da SATÜ:n (alištub federacijan tobmudele) administrativižeks keskuseks da palaks vn 1996 tal'vkuspäi, agjan koumanz' lidn eläjiden lugun mödhe.

Lidn om Venäman Pohjoižen laivišton päsodameribazaks.

Istorii

Eländpunktan aluz om pandud vl 1896 Vajeng-külähä (ven.: Ваенга, saam. vajongg — «pohjoižpedran emäč»), nimitihe langenijan merhe jogen mödhe (ven.: Ва́енга 25 km pitte). Vn 1947 1. päiväl semendkud sirtihe Vajeng-žilho Pohjoižen laivišton bazad Polärnii-lidnaspäi. Vn 1951 18. päiväl sulakud radnikžilo sai lidnan statusad nügüdläiženke nimenke.

Severomorsk šingotase sodameribazal, laivankohendusen i sauvondan edheotandoil, maidtegimel. Ende kolbastegim, leibtegim i alkogolitomiden jomiden tegim radoiba lidnas mugažo.

Geografijan andmused

Lidnan sijaduz ümbrikos i agjas vn 2025 kartal

Lidn sijadase ümbrikon pohjoižes, Barencan meren jädumatoman Kolan lahten randal, 31 m ü.m.t. keskmäižel korktusel.

Matkad Murmanskan röunhasai om seičeme kilometrad päivlaskmha, keskuzpalhasai — 25 km suvipäivlaskmha.

Tobmuz

Lidnümbrikon sijaduz vn 2011 agjan kartal

Lidnanvuitte Safonovo-žilo, Severomorsk-3- da Ščukozero-eländpunktad mülüdas lidnümbrikho da SATÜ:hü Severomorskan ližaks. Lidnümbrikon pind — 480 km².

Edeline SATÜ:n pämez' om Vladimir Jevmen'kov (reduku 2017 — kül'mku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 50 060 ristitud, lidnümbrikon — 67 331 ristitud. Vn 2021 rahvahanlugemižen mödhe 43 327 elajad oli lidnas i 50 796 ristitud elihe kaikes lidnümbrikos. Vl 2017 kaik 51 209 ristitud elihe lidnas i 60 423 ristitud kaikes lidnümbrikos. Kaikiš suremb lidnan ristitišt oli 67 100 eläjad vl 1992. Vspäi 2015 lidnanvuitte Rosläkovo-žilo (8928 rist. vl 2014) mülüb Murmanskha mikrorajonaks.

Rahvahad (lidnümbrik, enamba 1 % vl 2010, ozutadud rahvahudenke): venälaižed — 85,0 %, ukrainalaižed — 8,0 %, vaugedvenälaižed — 1,8 %, totarlaižed — 1,0 %, toižed rahvahad — 4,2 %.

Ortodoksižen hristanuskondan kahesa pühäpertid oma avaitud lidnas: ph. Ondrijan Ezikuctud kafedraline päjumalanpert' (om letud vll 2003−2016), koume jumalanpertid, kaks' kodipühäpertid, kaks' časounäd. Islaman loičendpert' radab.

Openduz

Lapsiden opendusen aluzkundad oma päivkodid, Ščukozeron aluzškol nomer 6, seičeme keskškolad (nomer 7 i 10..12 lidnas, nomer 2 i 5 Safonovo-žilos, nomer 8 Severomorskas-3), gimnazii nomer 1, licei nomer 1, ehtal'ne keskškol nomer 1, Severomorskan täuden päivän škol, lapsiden sädamižen pert', muzikškol E. S. Pasternakan nimed, čomamahtoine škol, kaks' čomamahtoiden školad (Severomorskan-3 i Safonovo-žilon), lapsiden da norišton koume sportškolad (lidnas, nomer 1..3), noriden tehnikanradajiden keskuz.

Lähembaižed professionaližen opendusen aluzkundad sijadasoiš Murmanskas. Murmanskan industrialižen kolledžan palakund (edel 2015. vot Severomorskan tehnologine kolledž) radab Murmanskan Rosläkovo-rajonas (vhesai 2015 oli erigoittud žiloks).

Galerei

• 
  Keskškol nomer üks', 2010
• 
  Venäman sodamerilaivišton openduzpalakund (2010)
• 
  Severomorsk-sodabazan merivaldmad i muštnik merimehele vl 2006
• 
  Rossija-kinoteatr («Venäma», vn 2005 olend)
• 
  Pohjoižen laivišton il'mvägiden muzejan päsauvuz, 2006
• 
  Lidnümbrikon röunad agjas vn 2006 kartal

Irdkosketused

• Municipaližen «Severomorsk-SATÜ»-ühtnikan tobmuden aluzkundoiden oficialine portal (citysever.ru). (ven.)