Snežnogorsk

Snežnogorsk
Снежногорск

Lidnanznam	Flag
Valdkund	Venäma
Eläjiden lugu (2017)	12 696 ristitud
Pind	23,1 km²
Telefonkod	+7-81 530-xx-xxx
Avtokod	51
Aigvö	UTC+3 (MSK+0)

Snežnogorsk (ven.: Снежногорск) om Venäman lidn Murmanskan agjan pohjoižes. Vspäi 2008 mülüb Sauptud administrativiž-territorialižhe «Aleksandrovsk»-ühtnikha (521 km²) territorialižeks ümbrikoks. SATÜ:n administracii sijadase neciš lidnas.

Istorii

Ende Ščitovai-žilo (ven.: посёлок Щитовая) oli lidnan sijas vspäi 1933, tegihe pumetoid laivišton amblusiden täht da azuihe kalaverkoid. Nügüd'aigaižen eländpunktan aluz om pandud vl 1970 kuti sauptud žilo holitamha vedenalaižiden atomlaivoiden «Nerpa»-kohenduztegint (saudihe vspäi 1964). Vl 1973 nimitihe Vjužnii-žiloks, vai Murmansk-60 kirjeižiden täht. Vspäi 1994 nimitase nügüdläižikš oficialižešti. Utiliziruidas VA-laivid i sauvoihe kalatezlaivid «Nerpa»-kohenduztegimel, se om Severodvinskan «Tähthaine»-edheotandan filialaks.

Geografijan andmused

Lidn sijadase tundran sambnuden vulkanan pautkil 174 metrhasai kortte, koumel terrasal. Snežnogorsk om ümbärtud penil järvil erazvuiččenke formanke, kävutadas jomižvedeks. Matkad Barencan meren jädumatoman Olen'jan lahten Kut-merikaran randhasai i tegimhesai om 4 km pohjoižpäivnouzmha, SATÜ:n Polärnii-lidnhasai om 8 km päivnouzmha orhal vai 14 km avtotedme (avtobusad ühtenzoittas lidnoid), SATÜ:n Gadžijevo-lidnhasai om 12 km pohjoižpäivnouzmha avtol, Murmanskhasai — 26 km suvipäivlaskmha orhal vai 58 km avtotedme.

Klimat om subarktine meren.

Eläjad

Vn 2010 Venäman rahvahanlugemižen mödhe eläjiden lugu oli 12 683 ristitud. Kaikiš suremb ristitišt oli 16 300 eläjad vl 1996. Ortodoksižen hristanuskondan ph. Jurgijan pühäpert' om saudud vl 1998. Murmanskan kooperativižen tehnikuman filial (vspäi 1997) i Murmanskan pedagogižen kolledžan filial ratas lidnas professionaližen opendusen aluzkundoikš.

Irdkosketused

• Aleksandrovsk-SATÜ:n tobmuden aluzkundoiden oficialine sait (zato-a.ru). (ven.)
• Aleksandrovsk-SATÜ:n Ezitajiden Nevondkundan oficialine sait (советзато.рф). (ven.)