Olenegorsk

Olenegorsk
Оленегорск

Lidnanznam	Flag
Valdkund	Venäma
Eläjiden lugu (2017)	21 039 ristitud
Pämez'	Oleg Samarskii (2 013—)
Telefonkod	+7-81 552-xx-xxx
Avtokod	51
Aigvö	UTC+3 (MSK+0)

Olenegorsk (ven.: Оленегорск, ukr.: Оленєгорськ) om Venäman lidn Murmanskan agjan keskuzpalas. Se om Olenegorskan lidnümbrikon administrativine keskuz, täuz' oficialine nimituz — «Olenegorsk-lidn alištunudenke territorijanke».

Istorii

Saudihe Olen'ja-raudtestancijad (nüg. Olenegorsk-stancii) vl 1916 kaiken Murmanskan raudten ühtes. Nügüd'aigaižen eländpunktan aluz om pandud vl 1949 Olen'ja-radnikžiloks samha raudkivendod. Se sai lidnan statusad nügüdläiženke nimenke vl 1957.

Geografijan andmused

Lidn sijadase Permusjärven suvipäivlaskmaižel randal (ven.: Пермусозеро, 24 km², Vauktan meren bassein), 151 m keskmäižel korktusel valdmeren pindan päl. Kaivuzkombinat sijadase ani lodeheze lidnaspäi, Kahjärven randal (ven.: Кахозеро, 11 km², Barencan meren bassein). Matkad Murmanskhasai om 105 km pohjoižhe raudtedme vai «Kol»-avtotedme. Lähembaine lidn om Mončegorsk 35 km suvipäivlaskmha niil-žo teil.

Visokii-sodaeländpunkt («korged», 6860 rist. vl 2010), kaks' pen't raudtestancijad da pen' Imandr-külä mülüdas lidnümbrikho Olenegorskan ližaks. Lidnümbrikon pind om 1889 nellikkilometrad.

Eläjad

Vn 2010 Venäman rahvahanlugemižen mödhe lidnan eläjiden lugu oli 23 072 ristitud, lidnümbrikon — 30 021 ristitud. Kaikiš suremb lidnan ristitišt oli vl 1992 — 35 800 eläjid. Vl 2017 kaik 29 849 ristitud elädas lidnümbrikos.

Rahvahad (vl 2010, lidnümbrik, enamba 1%, ozutadud rahvahudenke): venälaižed — 89,3%, ukrainalaižed — 5,1%, vaugedvenälaižed — 1,8%, toižed rahvahad — 3,8%.

Ižanduz da transport

Ižandusen päsarakod oma kaivuztegimišt (raudkivendon koncentrat i üläkoncentrat, raudasiž-stroncijasine tuhk), sauvondmaterialiden tehmine (silikatine savič, šebin'), standartatoman mašiništon i varapaloiden pästand kaivuzmetallurgižiden edheotandoiden täht, raudasižed valamižtegesed. Professionaližen opendusen aluzkundad: kaivuztegimišton kolledž, Hibinoiden tehnižen kolledžan filial, Murmanskan, Petroskoin i Moskvan üläopendusen aluzkundoiden koume filialad.

Kundaline avtobusmaršrut ühtenzoitab lidnad aviabazanke. Ezilidnelektrojonuz ajab Murmanskhasai i Apatitoihesai. Aviabaz sijadase Visokii-sodažilos päivnouzmha lidnaspäi, Permusjärven vastrandal. Raudte i «Kol»-avtote oma lidnan päivnouzmaižeks röunaks.

Irdkosketused

• Lidnümbrikon tobmuden aluzkundoiden oficialine sait (olenegorsk.gov-murman.ru). (ven.)