Olenegorsk

Olenegorsk
Оленегорск

Lidnanznam	Flag
Valdkund	Venäma
Eläjiden lugu (2025)	20,364 ristitud
Pind	38,8 km²
Pämez'	Sergei Pašinskii (kezaku 2024—)
Telefonkod	+7−81 552-xx-xxx
Avtokod	51
Aigvö	UTC+3 (MSK+0)

Olenegorsk (ven.: Оленего́рск, ukr.: Оленєгорськ) om Venäman lidn Murmanskan agjan keskuzpalas. Se om Olenegorskan lidnümbrikon administrativine keskuz, täuz' oficialine nimituz — «Olenegorsk-lidn alištunudenke territorijanke».

Istorii

Saudihe Olen'j-raudtestancijad (ven.: Оле́нья, nüg. Olenegorsk-stancii) vl 1916 kaiken Murmanskan raudten ühtes. Nügüd'aigaižen eländpunktan aluz om pandud vl 1949 Olen'j-radnikžiloks (Оленья) samha raudkivendod. Se sai lidnan statusad nügüdläiženke nimenke vl 1957.

Olenegorskan ižandusen päsarakod oma kaivuztegimišt (raudkivendon koncentrat i üläkoncentrat, raudasiž-stroncijasine tuhk), sauvondmaterialiden tehmine (silikatine savič, šebin'), standartatoman mašiništon i varapaloiden pästand kaivuzmetallurgižiden edheotandoiden täht, raudasižed valamižtegesed.

Geografijan andmused

Lidnan sijaduz ümbrikos i agjas vn 2025 kartal

Lidn sijadase ümbrikon päivlaskmas, Permusjärven suvipäivlaskmaižel randal (ven.: Пермусозеро 24 km² pindanke, Vauktan meren bassein), 151 m ü.m.t. keskmäižel korktusel. Kaivuzkombinat sijadase ani lodeheze lidnaspäi, Kahjärven randal (ven.: Кахозеро 11 km² pindanke, Barencan meren bassein).

Matkad Murmanskhasai om ühesakümne nell' kilometrad pohjoižhe orhal, 105 km raudtedme vai «Kol»-avtotedme. Lähembaine lidn om Mončegorsk 35 km suvipäivlaskmha niil-žo teil.

Tobmuz

Olenegorskan ümbrikon sijaduz agjas vn 2011 kartal

Visokii-sodaeländpunkt («korged», 6860 rist. vl 2010), kaks' pen't raudtestancijad da pen' Imandr-külä mülüdas lidnümbrikho Olenegorskan ližaks. Lidnümbrikon pind om 1889 nellikkilometrad.

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Ivan Lebedev (tal'vku 2021 — kezaku 2024), Oleg Samarskii (sügüz'ku 2013 — reduku 2021). Lidnümbrikon Deputatoiden nevondkundan ezimez' om Jelena Potaš vn 2023 redukuspäi. Edeline lidnan nevondkundan ezimez' om Aleksandr Läpko, oli radnikusel vn 2023 redukuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 23 072 ristitud, lidnümbrikon — 30 021 ristitud, vn 2021 lidnan — 21 438 ristitud. Vl 2017 kaik 21 039 ristitud elihe lidnas i 29 849 ristitud kaikes lidnümbrikos. Kaikiš suremb lidnan ristitišt oli 35 800 eläjid vl 1992.

Rahvahad (lidnümbrik, enamba 1 % vl 2010, ozutadud rahvahudenke): venälaižed — 89,3 %, ukrainalaižed — 5,1 %, vaugedvenälaižed — 1,8 %, toižed rahvahad — 3,8 %.

Ortodoksižen hristanuskondan koume jumalanpertid oma saudud lidnas: kaks' jumalanpertid i časoun'.

Openduz

Lapsiden opendusen aluzkundad oma seičeme nimitadud i nomeruidud päivkodid (nomer 2, 6, 9, 12..15), kaks' aluzškolad (nomer 7 i 21), koume keskškolad (nomer 4 i 22 lidnas, nomer 13 Visokii-eländpunktas), korrekcine škol-internat, školanirdpol'žen radon keskuz, muzikškol, čomamahtoine škol, čomamahtoiden škol Visokii-eländpunktas, lapsiden da norišton Olimp-sportškol.

Professionaližen opendusen aluzkundad: kaivuztegimišton kolledž, Hibinoiden tehnižen kolledžan filial, Murmanskan, Petroskoin i Moskvan üläopendusen aluzkundoiden koume filialad.

Transport

Kundaline avtobusmaršrut ühtenzoitab lidnad aviabazanke. Aviabaz sijadase Visokii-sodažilos päivnouzmha lidnaspäi, Permusjärven vastrandal.

Ezilidnelektrojonuz ajab Murmanskhasai i Apatitoihesai. Raudte i «Kol»-avtote oma lidnan päivnouzmaižeks röunaks.

Galerei

• 
  Il-76-lendim Olen'j-sodail'mbazas
• 
  Ph. Dmitrii Prilukilaižen jumalanpert' (ortodoksine hristanuskond), vn 2017 nägu
• 
  Komsomol'skii-kar'jer vl 2006
• 
  Stadion (vn 2007 olend)
• 
  Olenegorsk-päraudtestancii vl 2017

Irdkosketused

• Lidnümbrikon tobmuden sait (olenegorsk.gov-murman.ru). (ven.)
• Lidnan informacine sait (olenegorsk.murman.ru). (ven.)