Belojarskii (lidn)

Belojarskii
Белоярский (ven.)
Нуви сӑңхум (hant.)

Lidnanznam
Valdkund	Venäma
Eläjiden lugu (2021)	19,994 ristitud
Pind	72,15 km²
Pämez'	Jevgenii Pakulev (kezaku 2019—)
Telefonkod	+7−34 670-xx-xxx
Avtokod	86, 186
Aigvö	UTC+5 (MSK+2)

Belojarskii (ven.: Белоя́рский, hant.: Нуви сӑңхум) om Venäman lidn da lidnankund Hantin da Mansin avtonomižen ümbrikon lodehes. Se om Belojarskijan rajonan administrativine keskuz.

Istorii

Eländpunktan aluz om pandud vl 1969 pedroiden paimendusen Huv Sanghum-tahondha («pit'k kall'» hantin kelel) sauvomha da holitamha londuseližen gazan veimen palad kompressorstancijanke sil. Vl 1988 žilo sai lidnan statusad.

Belojarskii šingotase kivivoin da gazan pompandal, sömtegimištol (leibän edheotand i maidtegim), sauvondmaterialiden pästandal (raudbeton, asfal't).

Geografijan andmused

Belojarskijan rajonan sijaduz avtonomižes ümbrikos vn 2013 kartal

Lidn sijadase rajonan päivlaskmas, Päivlaskmaižen Sibirin tazangištol, 22 m korktusel valdmeren pindan päl, Kazim-jogen (ven.: Казы́м) hural randal (Obin oiged ližajogi).

Matkad Obinjogehesai om kuz'kümne kilometrad päivlaskmha Kazim-laivjogedme, Hanti-Mansiiskhasai om 325 km suvhe-suvipäivnouzmha orhal vai 566 km avtotedme. Lähembaine lidn om Nägan' 186 km suvhe-suvipäivlaskmha orhal vai 280 km avtol. Regionaline civiline lendimport (БЛР) om saudud lidnan suvipäivnouzmas, om reisid Näganihesai.

Klimat om kontinentaline. Voden keskmäine lämuz om −2,0 C°, heinkun +17 C°, kezakun i elokun +12..+13 C°, vilukun −22 C°, tal'vkun i uhokun −16..−17 C°. Paneb sadegid 547 mm vodes.

Tobmuz

Belojarskii om lidnankundan üks'jäižeks eländpunktaks.

Lidnankundan pämez' om sen Deputatoiden nevondkundan ezimez'. Edeline lidnan pämez' om Vladimir Vasik (sügüz'ku 2013 — 2018). Lidnan Administracijan pämez' om Najil' Basirov (Наиль Басыров) vn 2011 uhokuspäi.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 20 283 ristitud, rajonan kaks' koumandest, vn 2021 — 19 994 ristitud. Kaik 20 142 eläjad oli lidnas vl 2017. Kaikiš suremb lidnan ristitišt oli 20 tuh. eläjid da sen enamba vll 2007−2017 (20 282 rist. vl 2016).

Rahvahad (enamba 0,5 % vl 2010): venälaižed — 68,7 %, ukrainalaižed — 8,2 %, totarlaižed — 5,3 %, hantilaižed — 2,7 %, vaugedvenälaižed — 1,8 %, kumikad — 1,7 %, baškiralaižed — 1,6 %, kirgizlaižed — 1,2 %, armenijalaižed — 0,6 %, čuvašalaižed — 0,6 %, tabasaranalaižed — 0,5 %, toižed rahvahad — 4,8 %, rahvahuden ozutandata — 2,3 %.

Ortodoksižen hristanuskondan kaks' pühäpertid oma avaitud lidnas: ph. Serafim Sarovalaižen (saudihe vll 2002−2003 voziden 1996−2001 palanuden puižen sijas) i Kaikiden pühämehiden (2017). Islaman pühäpert' om letud vn 2007 jäl'ghe.

Lapsiden opendusen aluzkundad oma päivkodid, keskškolad. Belojarskijan politehnine kolledž om lidnan professionaližen opendusen aluzkundaks.

Galerei

• 
  Belojarskijan rajonan administracijan sauvuz (2021)
• 
  Ph. Serafim Sarovalaižen jumalanpert', vn 2010 nägu
• 
  «Rostelekom:an» Hantin da Mansin filialan palakundan sauvuz (2021)
• 
  Üks' torguindkeskusišpäi (2021)
• 
  Kul'turan da lebun «Kamerton»-keskuz (2021)
• 
  Belojarskii-aerovagzalan sauvuz, vn 2021 nägu

Irdkosketused

• Belojarskii-lidnan tobmuden sait (admbelgor.ru). (ven.)