Jugorsk

Jugorsk
Югорск
Lidnanznam;	Flag;
Valdkund	Venäma
Eläjiden lugu (2021)	38,238 ristitud
Pind	65,22 km²
Pämez'	Andrei Borodkin; (heinku 2018—)
Telefonkod	+7−34 675-xx-xxx
Avtokod	86, 186
Aigvö	UTC+5 (MSK+2)

Jugorsk (ven.: Юго́рск) om Venäman lidn da lidnümbrik Hantin da Mansin avtonomižen ümbrikon päivlaskmas. Om ümbärtud Sovetskijan rajonan territorijal.

Istorii

Eländpunktan aluz om pandud vl 1962 kuti Komsomol'skii-žilo Ess-raudtestancijanno (nimitihe Ess-jogen mödhe, nüg. Geologičeskai-stancii, ven.: Геологическая) sauvomha da holitamha «Ivdel' — Priobje»-raudted i otmaha kävutamižhe mecan parččomid da gazan löudmižsijid. Vl 1992 žilo sai lidnan statusad, udesnimitihe sen tahondan amuižen nimitusen mödhe (Jugr). Vl 1996 ühtištadihe Mansiiskii-žilod i Komsomol'skii-2-sodažilod lidnanke. Lidnan päiv oigendase joga voden sügüz'kun ezmäižel sobatal, Jugorskan karnaval om sen päižeks aigtegoks.

Jugorsk šingotase gazan pompandal, gazanveimiden sauvondan trestal, sauvondmaterialiden pästandal (materialoiden kombinat, savič) i omblendfabrikal.

Geografijan andmused

Lidn sijadase ümbärdajan rajonan keskuzpalas, Ess-jogen hural randpolel (ven.: Эсс 233 km pitte, Kondan oiged ližajogi, Irtišan hurapol'ne bassein), 110 m korktusel valdmeren pindan päl.

Matkad jogehesai om nell' kilometrad päivlaskmha, Hanti-Mansiiskhasai om 305 km päivnouzmha orhal vai 380 km avtotedme. Lähembaine civiline lendimport sijadase Sovetskii-lidnas (OVS / СОЙ) vižtoštkümnes kilometras päivnouzmpolehe, om reisid Moskvha, Piterihe, tranzitreisid Tümen' — Belojarskii, sijaližid reisid punolendimil. Toižed lähembaižed lidnad oma Nägan' 144 km pohjoižpäivnouzmha orhal vai raudtel, 276 km avtotedme, Urai 154 km suvipäivnouzmha orhal vai 204 km avtol i Ivdel' (Sverdlovskan agj) 171 km suvipäivlaskmha orhal, 187 km avtol vai raudtel.

Klimat om kontinentaline. Voden keskmäine lämuz om −0,7 C°, kezakun +14,5 C°, heinkun +17,5 C°, elokun +13,4 C°, tal'vkun-uhokun −15,1..−16,5 C°. Paneb sadegid 529 mm vodes. Il'man vozne keskmäine relätivine nepsuz om 74,7 %.

Tobmuz

Jugorsk om lidnümbrikon üks'jäižeks eländpunktaks. Lidnümbrikon pind — 152,18 km².

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 34 067 ristitud, vn 2021 — 38 238 ristitud. Kaik 37 150 eläjad oli lidnas vl 2017. Kaikiš suremb lidnan ristitišt om nügüd'.

Ortodoksižen hristanuskondan ph. Sergii Radonežalaižen kafedraline päjumalanpert'^[1] om saudud lidnha vll 1995−2001, sen ližaks časoun' om letud kahesan pühämehen kuvanke.

Kul'turan i joudan budžetižed aluzkundad oma «Nord»-teatrkeskuz, «Jugra Prezent»-kul'turkeskuz, Jugorsk-lidnan istorijan da etnografijan muzei, lidnan keskuzkirjišt, lidnan lapsiden keskuzkirjišt, Jugorskan sportkeskuz, «Nord»-kul'tursportkeskuz, jäpert'kulu.

Openduz

Lapsiden opendusen aluzkundad oma koume päivkodid, toižed skolanedeližed gruppad vides aluzkundas, koume keskškolad (nomer 2, 5, 6), lidnan gimnazii, licei G. F. Atäkševan nimed, ortodoksižen hrstanuskondan privatine gimnazii ph. Sergii Radonežalaižen, lapsiden da norišton «Prometei»-keskuz, čomamahtoiden škol.

Jugorskan politehnine kolledž^[2] i Gazproman openduztegimištoline keskuz oma lidnan professionaližen opendusen aluzkundoikš.

Galerei

Puruvedim-muštnik raudtesauvojile (2010)
Ph. Sergii Radonežalaižen kafedraline päjumalanpert', vn 2010 nägu
«Gazprom Transgaz Jugorsk»-edheotandan päfater vl 2012
MiG-31-lendim muštnikaks (2015)
Geologičeskai-päraudtestancii vl 2010

Homaičendad

Irdkosketused

Jugorsk Vikiaitas

	Hantin da Mansin avtonomižen ümbrikon lidnad
	Belojarskii \| Hanti-Mansiisk \| Jugorsk \| Kogalim \| Langepas \| Läntor \| Megion \| Neftejugansk \| Nižnevartovsk \| Nägan' \| Pit' Jah \| Pokači \| Radužnii \| Sovetskii \| Surgut \| Urai

[1] Jugorskan pühäpertid sobory.ru-saital. (ven.)

[2] Jugorskan politehnižen kolledžan sait (yugorskpk.ru). (ven.)

[1]

[2]