Kogalim

Kogalim
Когалым (ven.)
Коголым (hant.)

Lidnanznam	Flag
Valdkund	Venäma
Eläjiden lugu (2021)	61,441 ristitud
Pind	153,5 km²
Pämez'	Timur Agadullin (tal'vku 2024—)
Telefonkod	+7−34 667-xx-xxx
Avtokod	86, 186
Aigvö	UTC+5 (MSK+2)

Kogalim (ven.: Когалы́м, tot.: Когалым, hant.: Коголым, ukr.: Когалим) om Venäman lidn da lidnümbrik Hantin da Mansin avtonomižen ümbrikon keskuzpalan pohjoižpäivnouzmas. Om ümbärtud Surgutan rajonan territorijal.

Istorii

Eländpunktan aluz om pandud vl 1975 kuti Kogalimskai-raudtestancii olnudel sauvomas «Surgut — Korotčaevo»-raudtel, vspäi 1976 oli Kogalimskii-žilo, hantin kelen коголым-sana znamoičeb «nova». Vspäi 1978 otaškanzihe kävutamižhe kivivoin sijaližid järedoid löudmižsijid. Vn 1985 15. päiväl elokud žilo sai lidnan statusad ümbrikon alištusenke.

Kogalim šingotase kivivoin samižel («Lukoil-Päivlaskmaine Sibir'»-kompanijan päedheotandad), ventil'likutimiden tegimel, sauvondmaterialiden tehmižel (plastiktorved), sömän pästandal (maidtegim) i himižreagentoiden tegimel.

Geografijan andmused

Lidnan sijaduz avtonomižes ümbrikos vn 2013 kartal

Lidn sijadase ümbärdajan rajonan pohjoižpäivnouzmas, Ingujagun-jogen hural randal tobjimalaz (235 km pitte, Obin oigedpol'ne bassein), 80 m korktusel valdmeren pindan päl. Om ümbärtud penil järvil.

Matkad Hanti-Mansiiskhasai om 321 km suvipäivlaskmha orhal vai 468 km avtotedme. Lähembaine lidn om Pokači 82 km suvipäivnouzmha orhal vai 140 km avtol. Regionaline lendimport (KGP / КОГ) om saudud kudes kilometras suvhe lidnaspäi, tehtas reisid Moskvha, Ufaha, Samarha i Iževskha.

Klimat om terav kontinentaline, tal'v om hätkeline da vilu. Voden keskmäine lämuz om −2,4 C°, kezakun-elokun +14,1..+17,4 C°, tal'vkun-uhokun −19,2..−23,2 C°. Ekstremumad oma −51,7 C° (tal'vku) i +35,3 C° (heinku). Kezaaigan minimum om −3,2 C° (kezaku), tal'vaigan maksimum om +2,5 C° (uhoku). Ei voi panda haloid heinkus-elokus (elokun minimum om +1,6 C°), läz ei olele sulasäd tal'vkus (maksimum +0,1 C°) i vilukus. Paneb sadegid 555 mm vodes, enamba kezakus-elokus (74..91 mm kus), vähemba vilukus-keväz'kus (19..24 mm kuidme). Kun keskmäine relätivine nepsuz vajehtase 71..72 % röunoiš semendkus-heinkus, 82..88 % sügüz'kus-uhokus, 77..79 % toižiš kuiš.

Tobmuz

Ortjagun-žilo (142 rist. vl 2017) mülüb lidnümbrikho Kogaliman ližaks. Lidnfartaliden pind om läz 35 km².

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Nikolai Pal'čikov (kül'mku 2015 — tal'vku 2024), Vladimir Stepura (radoi vn 2015 kül'mkuhusai). Lidnan Duman ezimez' om Alla Govoriščeva vn 2015 kül'mkuspäi. Edeline Duman ezimez' om Nikolai Pal'čikov (sulaku 2013 — kül'mku 2015).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 58 181 ristitud, lidnümbrikon — 58 337 ristitud, vn 2021 — 61 441 ristitud. Vl 2017 kaik 64 704 ristitud elihe lidnas i 64 846 ristitud kaikes lidnümbrikos. Kaikiš suremb lidnan ristitišt oli 67 727 eläjad vl 2020.

Rahvahad (lidn, enamba 0,8 % vl 2010): venälaižed — 57,8 %, ukrainalaižed — 10,0 %, totarlaižed — 9,2 %, azerbaidžanlaižed — 3,8 %, baškiralaižed — 3,7 %, kumikad — 2,1 %, moldovalaižed — 1,7 %, čečenalaižed — 1,6 %, čuvašalaižed — 1,1 %, avarad — 1,0 %, vaugedvenälaižed — 0,9 %, marilaižed — 0,9 %, lezgilaižed — 0,9 %, toižed rahvahad — 4,8 %, rahvahuden ozutandata — 0,5 %.

Ortodoksižen hristanuskondan kaks' pühäpertid, protestantizman jumalanpert' (videnkümnenden päivän polenpidajad) i islamanuskojiden mečet' oma saudud lidnha.

Openduz

Lapsiden opendusen aluzkundad oma ühesa nimitadud päivkodid, lapsen šingotesen keskuz, edelškoližen vaumičendan keskuz, kahesa keskškolad (nomer 1, 3, 5..7, 8 (kaks' adresad), 9, 10 (päivkodinke)), lapsiden sädamižen pert', čomamahtoiden škol, keliden London Express-škol, Akademija-openduzkeskuz, Dvorec sporta-sportškol («Sportpert'kulu»).

Lidnan professionaližen opendusen aluzkundad oma politehnine kolledž i Neftegaz-openduzkeskuz. Kaik nell' universitetoiden filialad (Tümen', Tomsk, Perm') ratas lidnas.

Galerei

• 
  Lidnan administracijan sauvuz (2011)
• 
  Pühän Jumalanmaman Emäganpäivän jumalanpert', vn 2005 nägu (om saudud vll 1995−1998)
• 
  Kernan i šoiduiden flüidoiden tedoiduzkeskuz (2013)
• 
  Ted Kogalim-päraudtestancijal vl 2010
• 
  Kogalim-lendimport vl 2005

Irdkosketused

• Lidnan tobmuden aluzkundoiden oficialine sait (admkogalym.ru). (ven.)