San Sal'vador

San Sal'vador
San Salvador
Lidnanznam;	Flag;
Valdkund	Sal'vador
Eläjiden lugu (2015)	257,754 ristitud
Pind	72,25 km²
Pämez'	Ernesto Muišondt; (semendku 2018—.; Ernesto Muyshondt)
Telefonkod	+503
Aigvö	UTC−6

San Sal'vador (isp.: San Salvador) om Sal'vadoran pälidn da kaikiš suremb lidn. Se om ühtennimižen departamentan administrativižeks keskuseks mugažo.

Istorii

Eländpunktan aluz om pandud vn 1525 sulakus ispanijalaižil, anastadud indejalaižil Kuskatlan-pälidnan sijha.

Vspäi 1821 San Sal'vador om Sal'vadoran pälidnaks.

Geografijan andmused

Lidn sijadase valdkundan keskusen päivlaskmas, Amakas-jogen alangištos, ühtennimižen vulkanan pautkenno, 658 m ü.m.t. keskmäižel korktusel.

Klimat om subekvatorialine neps, om kaks' sezonad. Kun keskmäine lämuz om +22..+24 C° vodes läbi. Paneb sadegid 1734 mm vodes, kuiv sezon om kül'mkus-sulakus (2..36 mm kus). Minimaline fiksiruidud lämuz om +7,2 C°. Lujad manrehkaidused oleldas, oliba vozil 1798, 1854, 1873, 1965 da 1987. Tropižed torokad oma paksud nepsakahan sezonan aigan.

Eläjad

Vl 1900 138 tuh. ristitud elihe lidnas da sen ümbrištos. Vl 2015 lidnalaižiden lugu oli 257 754 ristitud. Kaik 1,7 mln ristituid elädas lidnaglomeracijas vl 2015 (590 km²), se om kaikutte nellänz' ristit valdkundas.

Religijan mödhe vl 2015 eläjiden enambuz oli hristanuskojikš (85%, sidä kesken 56% katolikoid da 29% protestantoid), mugažo om äi religijatomid (11%).

Edeline lidnan pämez' om Najib Bukele (2015-2018), vspäi 2019 hän om valitud da radab Sal'vador-valdkundan prezidentan.

Transport

Avtobusad, kiruhavtobusad (SITRAMSS) da taksid oma kundaližeks transportaks lidnas ezilidnoidenke. San Sal'vador om valdkundan järed avtotesol'm. Raudten maršrutad ühtenzoittas aglomeracijan erazvuiččid agjoid vspäi 2007.

Pen' regionaline Ilopango-lendimport (MSSS) sijadase lidnan päivnouzmas. Se om soda- da čarterreisiden täht Sal'vadoradme, lähižihe pälidnoihe — Tegusigal'p, Gvatemal.

Rahvahidenkeskeine soda- da civiline Oskar Arnul'fo Romeron nimel nimitadud lendimport (SAL, 3,7 mln passažiroid vl 2019), ende El' Sal'vador da Komalapa, sijadase 50 km suvhe lidnan keskusespäi, Tünen valdmeren randpoles. Sišpäi tehtas reisid AÜV:oihe, Kanadha, Meksikha, Keskuzamerikan äjihe maihe, Bogotaha i Madridha.

Homaičendad

Irdkosketused

Lidnan ohjastusen oficialine sait (sansalvador.gob.sv). (isp.)

San Sal'vador Vikiaitas

	Pohjoižamerikan pälidnad
	Baster \| Bel'mopan \| Bridžtaun \| Gvatemal-lidn \| Havan \| Kastri \| Kingstaun \| Kingston \| Managua \| Mehiko \| Nassau \| Ottav \| Panam-lidn \| Port-o-Prens \| Port of Spein \| \| Rozo \| San Hose \| San Sal'vador \| Santo Domingo \| Sent Džons \| Sent Džordžes \| Tegusigal'p \| Vašington