Vauged Holunic

Vauged Holunic
Белая Холуница

Lidnanznam	Flag
Valdkund	Venäma
Eläjiden lugu (2021)	9,997 ristitud
Pind	12 km²
Pämez'	Stanislav Kašin (keväz'ku 2012—)
Telefonkod	+7−83 364-xx-xxx
Avtokod	43
Aigvö	UTC+3 (MSK+0)

Vauged Holunic (ven.: Бе́лая Холуни́ца) om Venäman lidn da lidnankund Kirovan agjan keskuzpalan pohjoižpäivnouzmas. Se om Vauktan Holunican rajonan administrativine keskuz.

Istorii

Eländpunkt aluz om pandud vl 1764 kuti žilo sauvomha da holitamha Novotroickii Holunickii (Beloholunickii)-raudantegint, nimitihe jogen mödhe. Uiton ezmäine puine padosein oli saudud sil-žo vodel. Manmehed Uz'lidnan i Vologdan gubernijoišpäi oliba ezmäižil sirdanuzil mehil. Vll 1928−1965 eländpunkt oli lidnanvuiččeks Beloholunickii-žiloks. Se sai lidnan statusad nügüdläiženke nimenke vl 1965.

Beloholunickii-tegim pästi raudad vhesai 1909. Vll 1916−1941 tegim pästaškanzi maižanduzinventarid (adrad). Vl 1941 libutimtransportižen mašiništon tegim Nikopolišpäi (Ukrain) oli evakuiruidud sihe, siš aigaspäi tehtihe metalližkonstrukcijoid tobjimalaz (erazvuiččed konvejerad, mägilibutimed), mugažo čomamahtolišt valamišt. Vspäi 2017 tegim eläb bankrotnendas läbi, no radab.

Vauged Holunic šingotase mecanümbriradmižen kombinatal i omblendfabrikal (vspäi 2018).

Geografijan andmused

Lidn sijadase rajonan suvipäivlaskmas, Vauged Holunic-jogen (168 km pitte, Vätkan hura ližajogi) i sen Beloholunickii-uiton-vezivaradimen (16 km²) randoil, 140 m ü.m.t. keskmäižel korktusel. Matkad agjan Kirov-pälidnhasai om 73 km suvipäivlaskmha-päivlaskmha orhal vai 81 km «Kirov — Perm'»-avtotedme. Lähembaine lidn om Slobodskoi 40 km päivlaskmha-suvipäivlaskmha orhal vai 45 km avtotedme.

Ühesa küläd mülüdas lidnankundha Vauktan Holunican ližaks, sidä kesken kaks' küläd seištas kaikenaigaižeta ristitištota. Lidnankundan pind — 510 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 11 232 ristitud, lidnankundan — 12 308 ristitud, rajonan koume videndest. Kaikiš suremb lidnan ristitišt oli enamba 13 tuhad eläjid vll 1979−1996 (13 400 eläjad vl 1992). Kaik 10 517 ristitud elihe lidnas i 11 526 ristitud kaikes lidnankundas vl 2017.

Ortodoksižen hristanuskondan kaks' jumalanpertid oma avaitud lidnas: Hristan Eläbzdusen (om saudud vn 2006 jäl'ghe) i Kaikiden Pühämehiden (kaumžomal, letihe vll 1864−1868, kellčuhunduz 1887).

Professionaližen opendusen aluzkund om Vätkan avtotegimištoližen kolledžan (Kirovo-Čepeck) filial.

Galerei

• 
  Kodirandantedištandmuzei (om saudud 1893, ende tegimen kontor)
• 
  Hristan Eläbzdusen jumalanpert', vn 2017 nägu
• 
  Kaikiden Pühämehiden jumalanpert' lidnan kaumištol, vn 2017 nägu
• 
  Kul'turkeskuz (2012, om saudud vl 1955)
• 
  Lidnan uiton damb ühtennimižel jogel vl 2013

Irdkosketused

• Lidnankundan lehtpoled Vauktan Holunican rajonan oficialižel bhregion.ru-saital. (ven.)
• Vauktan Holunican kodirandantedištandmuzejan sait (bhmuzey.ru). (ven.)