Sosnovk (lidn, Venäma)

Sosnovk
Сосновка

Valdkund	Venäma
Eläjiden lugu (2021)	8,428 ristitud
Pind	20 km²
Pämez'	Najil' Sajitov (keväz'ku 2016—)
Telefonkod	+7−83 334-xx-xxx
Avtokod	43
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Sosnovk (ven.: Сосно́вка «pedai»-pun nimitusespäi, mugažo totaran kelel) om Venäman lidn da lidnankund Kirovan agjan suvipäivnouzmaižes čogas. Mülüb Vätkan Polänin rajonha, sen üks'jäine lidn da kaikiš suremb eländpunkt.

Istorii

Eländpunkt mainitase ezmäižen kerdan 17. voz'sadan lopus kuti Sosnovk-külä. Möhemba se šingotihe tegimištžiloks: vl 1763 vas'kentegim radaškanzi, vl 1830 kervačunkudondan fabrik oli avaitud, vspäi 1905 mecpilindtegim radoi. «Moskv — Kazan' — Jekaterinburg»-raudte läbiti žilod vl 1915, saudihe Sosnovk-stancijad. Vspäi 1924 laivansauvomižen verf' om saudud, kätihe tegimeks Toižen mail'man sodan aigan. Radnikžilo sai lidnan statusad vn 1962 29. päiväl keväz'kud. Vspäi 2007 avtotesild ühtenzoitab Vätkan randoid kahtes kilometras päivlaskmha lidnaspäi.

Sosnovk šingotase mecanümbriradajal kombinatal, mecan oigendamižen bazal, laivansauvomižen tegimel (pästli motorvenehid, astjoid il'mpölusel, seižub radmata).

Geografijan andmused

Vätkan Polänin rajonan sijaduz agjas vn 2010 kartal

Lidn sijadase rajonan päivnouzmas, Vätk-jogen hural randal i sen Pižmank-ližajogen (udm.: Пыжман 49 km pitte) oiktal randpolel, 80 m ü.m.t. keskmäižel korktusel.

Matkad Udmurtijan röunhasai om seičeme kilometrad päivnouzmha orhal, agjan Kirov-keskushesai om 278 km pohjoižhe-lodeheze orhal, 352 km avtotedme vai 596 km raudtedme. Lähembaižed lidnad oma Vätkan Poläni kümne kilometrad päivlaskmha orhal, 21 km avtotedme vai 14 km raudtedme, i Kukmor (Tatarstan) 25 km päivlaskmha-suvipäivlaskmha orhal, 35 km avtotedme vai 30 km raudtedme.

Tobmuz

Sosnovk om lidnankundan üks'jäižeks eländpunktaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 11 960 ristitud, rajonan kaks' videndest, vn 2021 — 8 428 ristitud. Kaik 11 254 eläjad oli lidnas vl 2017. Kaikiš suremb lidnan ristitišt oli 15..16 tuhad eläjid vll 1967−1992 (16 748 eläjad vl 1970).

Rahvahad (ozutadud rahvahudenke vl 2010): venälaižed — 66,8 %, totarlaižed — 28,8 %, udmurtalaižed — 1,7 %, toižed rahvahad — 2,7 %.

Openduz

Lapsiden opendusen aluzkundad oma päivkodid, keskškol.

Sosnovkan laivansauvomižen tehnikum om lidnan professionaližen opendusen aluzkundaks.

Irdkosketused

• Lidnankundan lehtpoled rajonan oficialižel vpolyansky-rayon.ru-saital. (ven.)