Malmiž

Malmiž
Малмыж

Lidnanznam	Flag
Valdkund	Venäma
Eläjiden lugu (2021)	6,931 ristitud
Pind	15 km²
Pämez'	Natal'ja Pliškina (semendku 2023—, Наталья Плишкина)
Telefonkod	+7−83 347-xx-xxx
Avtokod	43
Aigvö	UTC+3 (MSK+0)

Malmiž (ven.: Малмы́ж, mugažo totaran i nitmarin kelil) om Venäman lidn da lidnankund Kirovan agjan suvipäivnouzmas. Se om Malmižan rajonan administrativine keskuz.

Istorii

Ende lidn oli marilaižiden Malmižan ruhtinazkundan keskuseks (1320-nded voded — 1553). Nimituz libub marin kelen малымаш-sanaspäi «ösija», «lebun sija». Eländpunkt mainitase ezmäižen kerdan vn 1553 käskös alištamha varmitadud tahondad Moskvan carile. Alištuz mäni jügedas, i saudihe venälašt lidnust vl 1580. Mülütihe lidnad Kazanin makundha vl 1584. Malmiž sai lidnanznamad vl 1780 lidnan oficialiženke statusanke. Puine lidnuz paloi lophu vl 1785.

Malmiž om ümbärtud maižanduzrajonal, šingotase sömtegimištol (leibäntegim, spirttegim, voitegim) i dizel'likutimiden kohenduzmehanižel tegimel (vspäi 1931). Kazanin jarmank i Sabantui-praznik oleskeldas lidnas.

Geografijan andmused

Lidnan sijaduz rajonas i agjas vn 2006 kartal

Lidn sijadase rajonan suvipäivlaskmas, Vätk-jogen oiktal randpolel i sen Šošm-ližajogen (109 km pitte, tot.: Шушма) oiktal randal, 100 m ü.m.t. keskmäižel korktusel.

Matkad Tatarstanan röunhasai om kahesa kilometrad päivlaskmha orhal, agjan Kirov-pälidnhasai om 239 km pohjoižhe orhal vai 282 km R169-avtotedme. Lähembaižed lidnad oma Uržum 77 km pohjoižhe-lodeheze orhal vai 91 km avtotedme, Vätkan Poläni 41 km suvipäivnouzmha orhal vai 58 km avtotedme i Kukmor (Tatarstan) 40 km suvhe orhal vai 55 km avtotedme.

Tobmuz

Malmiž om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline lidnan pämez' om Oksana Alöškina (kül'mku 2017 — sulaku 2023). Lidnankundan Duman ezimez' om Radif Gatijatullin vn 2022 redukuspäi. Edeližed Duman ezimehed oma Lüdmila Valieva (kül'mku 2019 — reduku 2022), Fatima Ašrapova (radoi vn 2019 kül'mkuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 8 265 ristitud, rajonan koumandez, vn 2021 — 6 931 ristitud. Kaik 7 531 eläjad oli lidnas vl 2017. Kaikiš suremb lidnan ristitišt oli 10..11 tuhad eläjid vll 1970−2001 (11 462 eläjad vl 1979).

Rahvahad (2010): venälaižed — 58,1 %, totarlaižed — 36,0 %, marilaižed — 3,7 %, udmurtalaižed — 1,7 %, toižed rahvahad — 0,5 %.

Ortodoksižen hristanuskondan kaks' pühäpertid oma kaičenus lidnas: Jumalannägundan päjumalanpert' (om avaitud, saudihe vll 1788−1802) i ph. Mitrofan Voronežalaižen jumalanpert' (om letud vl 1844, udessündutadas).

Lapsiden opendusen aluzkundad oma koume päivkodid (nomer 1, 2, 4), licei, keskškol nomer 2, čomamahtoiden škol, lapsiden da norišton sportškol. Lähembaine professionaližen opendusen aluzkund sijadase Savali-žilos kaks' kilometrad lodeheze lidnaspäi, se om Savalin politehnine tehnikum.

Irdkosketused

• Lidnankundan oficialine sait (malmyzh.gosuslugi.ru). (ven.)
• Lidnan i sen rajonan tobmuden sait (malmyzh43.gosuslugi.ru). (ven.)