Kirovo-Čepeck

Kirovo-Čepeck
Кирово-Чепецк

Lidnanznam	Flag
Valdkund	Venäma
Eläjiden lugu (2021)	66,651 ristitud
Pind	53,36 km²
Pämez'	Jelena Savina (reduku 2016—)
Telefonkod	+7−83 361-xx-xxx
Avtokod	43
Aigvö	UTC+3 (MSK+0)

Lidnan kart kaidraižuiženke raudtenke Karintorfannoks (2011)

Kirovo-Čepeck (ven.: Ки́рово-Чепе́цк) om Venäman lidn da lidnümbrik Kirovan agjan keskuzpalas. Se om Kirovan suvipäivnouzmaine ezilidn da aglomeracijan pala, agjan kahtenz' lidn eläjiden lugun mödhe, Kirovo-Čepeckan rajonan administrativižeks keskuseks mugažo (vspäi 1960), ei mülü rajonha.

Istorii

Ezmäižed venälaižiden eländpunktad mainitasoiš 15. voz'sadaspäi. Ust'-Čepeckoje-žilo mainitase 18. voz'sadaspäi, nimitihe jogen mödhe. Virifabrik radaškanzi siš-žo, Ust'-Čepc-žilos (ven.: село Усть-Чепца) vl 1873.

Nügüdläižen eländpunktan aluz om pandud vl 1935 sauvomha da holitamha Kirovan lämuzelektrostancijad turbhan sijaližel löudmižsijal. Vl 1938 himižen tegimen sauvomine zavodihe, nügüd' kaikiš suremb edheotand. Vl 1941 11-kilometrine raudtesarak Čepeckai-lopstancijanke (ven.: Чепецкая) tuli lidnha «Kirov — Perm'»-raudtespäi, stancii radab vemha jüguid vaiše. Kirovo-Čepeckii-radnikžilo sai oficiališt statusad vn 1942 keväz'kus. Radnikžilo sai lidnan statusad vl 1955 nügüdläiženke nimitusenke, Ust'-Čepc-žilo da lähižed küläd oliba mülütadud lidnha sil-žo aigal. Lidn ühtni NSTÜ:n atombomban projektha, i tegimištzonan pala (läz 0,7 km²) om alištunu radioaktivižele redustoitandale. Vspäi 1990 Karintorf-žilo om lidnan palaks, vl 1993 ühtištadihe lidnanke völ kümne eländpunktad (küläd).

Kirovo-Čepeck šingotase himižel tegimištol (polimerad, mineraližed heretused, agrohimikatad, kodihimii), mašinansauvomižel (kommutacine mašiništ aviacijan täht, pressmašiništ, elektrolämbitimed, kolonnad himižtegimiden täht, tegesed ftoroplastaspäi i himižikš seižujiš materialoišpäi), sauvondmaterialiden pästandal (savič, lämuzizoläcii, iknad), sömtegimištol, mugažo meblin (viž), kengiden da sobiden omblendan (kuz') i medicinižprotezoiden (üks') edheotandad ratas lidnas.

Geografijan andmused

Lidn sijadase Vätk- i Čepc-jogiden huril randoil, Čepcan lanktendanno Vätkha huralpäi, 140 m ü.m.t. keskmäižel korktusel. Matkad agjan Kirov-pälidnan röunhasai om 15 km päivlaskmha orhal, keskushesai om 23 km päivlaskmha-lodeheze orhal, 40 km avtotedme vai 42 km raudtedme, se-žo om lähembaine lidn.

Kirovo-Čepeck om lidnümbrikon üks'jäižeks eländpunktaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 80 921 ristitud, vn 2021 — 66 651 ristitud. Kaik 73 279 eläjad oli lidnas vl 2017. Kaikiš suremb lidnan ristitišt oli 95..100 tuhad eläjid vll 1989−1994 (100 tuh. rist. vl 1994).

Rahvahad (2002): venälaižed — 94,7 %, totarlaižed — 1,6 %, udmurtalaižed — 1,2 %, toižed rahvahad — 2,5 %.

Ortodoksižen hristanuskondan nell' jumalanpertid i ph. Mikulai-čudonsädajan naižjumalankodi (vspäi 2004) oma saudud lidnas.

Vätkan avtotegimištoline kolledž om lidnan professionaližen opendusen aluzkundaks.

Galerei

• 
  Lidnan i rajonan ohjandusen sauvuz (2014)
• 
  Kaikiden Venäman Pühämehiden päjumalanpert' (ortodoksine hristanuskond), vn 2013 nägu
• 
  Mineraližiden heretusiden tegim vl 2006
• 
  Keskškol nomer 12 (2014)
• 
  Taholine passažirine jonuz lidnas sen Karintorf-rajonaspäi vl 2011

Irdkosketused

• Lidnümbrikon oficialine sait (k4gorod.gosuslugi.ru). (ven.)
• Lidnan informacine portal (chepetsk.ru). (ven.)