Šui (lidn)

Šui
Шуя

Lidnanznam	Flag
Valdkund	Venäma
Eläjiden lugu (2021)	55,225 ristitud
Pind	33,29 km²
Pämez'	Natal'ja Korägina (heinku 2018—)
Telefonkod	+7−49 351-xx-xxx
Avtokod	37
Aigvö	UTC+3 (MSK+0)

Šui (ven.: Шу́я) om Venäman lidn da lidnümbrik Ivanovon agjan keskuzpalan suves. Se om agjan koumanz' lidn eläjiden lugun mödhe, om Šujan rajonan administrativižeks keskuseks mugažo (ei mülü sihe).

Istorii

Borisoglebskai-slabad (ven.: Борисоглебская слобода) oli olmas edel lidnad 14. voz'sadan keskespäi, nimitihe jumalanpertin pühämehiden mödhe. Eländpunkt mainitase ezmäižen kerdan Nikonan aigkirjas vl 1539 kuti muretud kazanižel Safa-Girei-hanal Šui-lidn. Nimituz libub Tez-laivjogen huras sijadusespäi Kläz'man joksendha kacten (ven.: ошую «huralpäi»). Šuiskijad-ruhtinased valdoičiba lidnal kaks' voz'sadad, hö mainitasoiš vspäi 1403. Lidn oli jarmankoiden i pölvhankanghiden tehmižen keskuz.

Šui šingotase «Akvarius»-kompanijan kompjuteroiden tehmižel, tekstil'mašinoiden tegimel, sitcan fabrikal i omblendedheotandoil, tal'jankoiden i lapsenmeblin tegimel, sauvondmaterialiden pästandal (puižed apakod), alkogoližiden jomiden tegimel, mugažo kombisötken tegim radab lidnas.

Geografijan andmused

Lidnan sijaduz agjas vn 2010 kartal

Lidn sijadase Tez-jogen molembil randoil (ven.: Те́за 192 km pitte, Kläz'man hura ližajogi), 100 m ü.m.t. keskmäižel korktusel. Toižed joged oma langenii Tezha Seh (ven. Сеха) i sen Motovilih-ližajogi (ven. Мотовилиха).

Matkad Ivanovon röunhasai om kaks'kümne kilometrad lodeheze orhal, 22 km avtotel vai raudtel, keskuzpalhasai — 29 km lodeheze orhal vai 31 km avtotel. Toine lähembaine lidn om Kohm vižtoštkümne kilometrad päivlaskmha-lodeheze orhal, 17 km avtotedme vai raudtedme. Šui-raudtestancii radab lidnan päivlaskmas «Ivanovo — Vladimir»-keskustal. «Ivanovo — Alauz'lidn»-avtotekeskust ümbärdab lidnad suvespäi.

Tobmuz

Šui om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeline Administracijan pämez' om Sergei Roščin (reduku 2015 — heinku 2018). Lidnan Duman ezimez' om Jurii Danilov vn 2020 redukuspäi. Edeližed Duman ezimehed oma Il'ja Kuz'min (sügüz'ku 2017 — reduku 2020), Dmitrii Platonov (reduku 2015 — eloku 2017), Tat'jana Alekseeva (radoi vn 2015 redukuhusai).

Eläjad

Vl 1939 lidnan ristitišt oli 57 910 eläjad. Vn 2010 Venäman rahvahanlugemižen mödhe lidnan eläjiden lugu oli 58 486 ristitud, vn 2021 — 55 225 ristitud. Kaik 58 723 eläjad oli lidnas vl 2017. Kaikiš suremb lidnan ristitišt oli 70..72 tuhad eläjid vll 1973−1987 (72 tuh. eläjid vll 1979−1987).

Rahvahad (2010): venälaižed — 97,1 %, toižed rahvahad — 2,9 %.

Ortodoksižen hristanuskondan Sündun Eläbzdusen kafedraline päjumalanpert', Mikulai-čudonsädajan päjumalanpert', vižtoštkümne jumalanpertid, časoun' i Kaikiden Pühämehiden naižjumalankodi oma kaičenus i saudud lidnas.

Lapsiden opendusen aluzkundad oma seičemetoštkümne nomeruidud päivkodid (nomer 2, 4, 6, 8, 14, 19, 20, 23, 25, 28, 31, 34, 36..40), augotižškol nomer 18, nell' aluzškolad (nomer 10, 11, 15, 17), kuz' keskškolad (nomer 2, 4, 7, 8, 9, 20), gimnazii nomer 1, lapsiden sädamižen keskuz, lapsiden da norišton sportškol, lapsiden tervehtamižopenduzsportkeskuz. Professionaližen opendusen aluzkundad oma Šujan tehnologine kolledž, Šujan äiprofil'ne kolledž, Ivanovon profopendusen koume filialad.

Galerei

• 
  Lidnümbrikon tobmuden sauvuz (2015, ende Kalužskijad-torgovanoiden pert')
• 
  Sündun Eläbzdusen kafedraline päjumalanpert', vn 2021 nägu
• 
  Torguindkeskuz i sömfabrikan sauvuz vl 2020
• 
  Konstantin Bal'montan literaturan i kodirandan tedištandmuzei (2015, edel Oktäbrin revolücijad lidnan tobmuden pert')
• 
  Šui-päraudtestancii vl 2021

Irdkosketused

• Lidnümbrikon tobmuden aluzkundoiden sait (okrugshuya.ru). (ven.)