Pučež

Vikipedii-späi
Pučež
Пучеж
Lidnanznam
Valdkund Venäma
Eläjiden lugu (2021) 6,010 ristitud
Pind 6,41 km²
Pučež Пучеж
Pämez' Jelena Šumakova
(viluku 2016—)
Telefonkod +7−49 345-xx-xxx
Avtokod 37
Aigvö UTC+3 (MSK+0)


Pučež (ven.: Пу́чеж) om Venäman lidn da lidnankund Ivanovon agjan päivnouzmas. Se om Pučežan rajonan administrativine keskuz (vspäi 1929).

Istorii[vajehta | vajehtada tekst]

Pučežan rajonan kodirandantedištandmuzei (2020)

Eländpunkt mainitaškanzihe vspäi 1594 vn 1614 dokumentas kuti Pučišše-slabad (ven.: слобода Пучище). Nügüdläine nimituz om sadud posadan statusanke vl 1745. Ezmäine pölvhankuidun fabrik oli saudud žilos vl 1862. Sai lidnan statusad vl 1919 vai oficialižešti vl 1925. Gor'kijan vezivaradimen täutmine jätkustui vll 1955−1957, upotihe vanhad lidnad (torgovanoiden pertid, kivižed jumalanpertid) siš täuzin. Pučež-lidn om saudud udel tahol vspäi 1947 edel vezivaradimen täutmišt.

Pučež šingotase pölvhankuidun tehmižel i nelläl omblendedheotandal, sömtegimištol (sagudtegim[1], leibänkombinat) i turizmal.

Geografijan andmused[vajehta | vajehtada tekst]

Lidn sijadase rajonan päivnouzmas, Volgan Gor'kijan vezivaradiman oiktal randal, 100 m ü.m.t. keskmäižel korktusel. Mecad ümbärtas lidnad päivlaskmaspäi. Matkad Alalidnan agjhasai om 8..10 km päivnouzmha Volgan vastrandannoks, Ivanovohosai om 133 km päivlaskmha orhal vai 156 km avtotel. Toižed lähembaižed lidnad oma Jurjevec 39 km pohjoižhe orhal vai 52 km avtotedme i Čkalovsk (Alalidnan agj) 25 km suvhe orhal vai 44 km avtotedme. Turistlaivad kävutadas lidnan jogivaldmoid. Lähembaine raudtestancii radab Zavolžje-lidnas (Alalidnan agj) 77 km suvhe avtotedme.

Pučež om lidnankundan üks'jäine eländpunkt. Rajun lind om kuvatud lidnanznamal.

Eläjad[vajehta | vajehtada tekst]

Vl 1939 lidnan ristitišt oli 7 273 eläjad. Vn 2010 Venäman rahvahanlugemižen mödhe lidnan eläjiden lugu oli 8 588 ristitud, rajonan viž kahesandest. Kaikiš suremb ristitišt oli enamba 12 tuhad eläjid vll 1970−1998 (12 976 rist. vl 1979).

Rahvahad (2010): venälaižed — 98,2%, toižed rahvahad — 1,8%.

Ortodoksižen hristanuskondan koume jumalanpertid[2] oma olmas lidnas: ph. Jurgii Vägestusenkandajan (puine, ei ole väges), ph. Serafim Sarovalaižen, Spasan Toižetamižen (puine). Spasan Toižetamižen päjumalanpert' i nell' jumalanpertid oma kadonuded.

Professionaližen opendusen lähembaižed aluzkundad ratas lähembaižiš lidnoiš.

Homaičendad[vajehta | vajehtada tekst]

  1. Pučežan sagudtegimen sait (puchezh-cheese.ru). (ven.)
  2. Pučežan pühäpertid sobory.ru-saital. (ven.)

Irdkosketused[vajehta | vajehtada tekst]



Ivanovon agjan lidnad
Furmanov | Gavrilov Posad | Ivanovo | Jurjevec | Juž | Kinešm | Kohm | Komsomol'sk | Navoloki | Plös | Privolžsk | Pučež | Rodniki | Šui | Zavolžsk | Teikovo | Vičug