Zavolžje (lidn)

Zavolžje
Заволжье
	Lidnanznam;
Valdkund	Venäma
Eläjiden lugu (2020)	37,588 ristitud
Pind	20,08 km²
Pämez'	Jelena Noskova; (reduku 2020—)
Telefonkod	+7−83 161-xx-xxx
Avtokod	52, 152
Aigvö	UTC+3 (MSK+0)

Zavolžje (ven.: Заво́лжье) om Venäman lidn da lidnankund Alalidnan agjan päivlaskmas. Se om Gorodecan ümbrikon (edel vn 2022 semendkud — rajonan) suremb lidn kahtespäi.

Istorii

Nevondkundaližen ohjastusen käsk Gor'kovskai-gidroelektrostancijan sauvondas om vahvištadud vn 1947 kül'mkus. Eländpunktan aluz om pandud Pestovo-külän sijha vl 1948 kuti sen gidroelektrostancijan (nüg. Alalidnan GES) sauvojiden žilo. Nimitihe Volg-jogen i sijadusen mödhe vastrandal amuižes Gorodec-lidnaspäi, hot' saudihe žilod ühtel randal Alauz'lidnanke. Raudte tuli žilho vn 1948 lopus i ühtenzoiti sidä Alauz'lidnanke. Zavolžjen keskuz om saudud N. Šelomov-arhitektoran mödhe. Odvan energijan purde i enččiden sauvojiden äjüz tegihe hüvikš süikš panemha materialanümbriradmižen edheotandoiden alust. Radnikžilo sai lidnan statusad vl 1964.

Zavolžje šingotase Alalidnan GES:al, mašinansauvomižel (likutimtegim, ujelimtraktoriden tegim, avtokertkäreged, pörutüged), sauvondmaterialiden pästandal (mecan ümbriradmižen tegim, lämuzizoläcii, raudbetontegim), mugažo mebel'fabrik i medicinižen stökolpakuitesen tegim ratas lidnas.

Geografijan andmused

Lidn sijadase rajonan keskuzpalan päivlaskmas, Volgan oiktal randal, 75 m ü.m.t. keskmäižel korktusel.

Jüguraudtestancii nimitase Zavolžje-tovarnai, raudten lopuline punkt om Zavolžje-passažirskai-platform elektrojonusiden täht. Matkad Alauz'lidnan keskushesai om 51 km suvipäivnouzmha orhal, 61 km avtotedme vai 59 km raudtedme. Toižed lähembaižed lidnad oma Gorodec (rajonankeskuz) kaks' kilometrad päivnouzmha orhal vai kahesa kilometrad avtotedme, Balahn 12 km suvipäivnouzmha orhal, avtotedme vai raudtedme, i Čkalovsk 17 km lodeheze orhal vai 39 km avtotedme.

Tobmuz

Zavolžje oli lidnankundan üks'jäižeks eländpunktaks.

Edeline sijaližen ičeohjandusen pämez' om Aleksandr Penskii (lidnan Duman ezimez', sügüz'ku 2015 — kül'mku 2019). Edeline lidnan Adinistracijan pämez' om Oksana Žestkova (sulaku 2016 — eloku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 40 460 ristitud, rajonan nell' ühesandest. Kaik 38 527 eläjad oli lidnas vl 2017. Kaikiš suremb lidnan ristitišt oli 45..46 tuhad eläjid vll 1992−2001 (46 800 rist. vl 1998).

Rahvahad (2010): venälaižed — 98,3 %, toižed rahvahad — 1,7 %.

Ortodoksižen hristanuskondan kaks' jumalanpertid^[1] oma saudud lidnas.

Zavolžjen avtolikutimiden tehnikum^[2] om lidnan professionaližen opendusen aluzkundaks.

Galerei

Lidnan tobmuden sauvuz (2012, ende Gor'kovskai-GES:an kontor)
Eläban Eziauguižen Stroican jumalanpert', vn 2011 nägu
Tegimištzon vl 2012
Zavolžjen avtolikutimiden tehnikum (2005, korpus nomer 1 koumespäi)
«Mandarin»-torguindkeskuz vl 2012

Homaičendad

Irdkosketused

Lidnankundan oficialine sait (zavnnov.ru). (ven.) (om täuttud vn 2022 lophusai)

Zavolžje (lidn) Vikiaitas

	Alalidnan agjan lidnad
	Alauz'lidn \| Arzamas \| Balahn \| Bogorodsk \| Bor \| Čkalovsk \| Dzeržinsk \| Gorbatov \| Gorodec \| Knäginino \| Kstovo \| Kulebaki \| Liskovo \| Lukojanov \| Navašino \| Pavlovo \| Perevoz \| Pervomaisk \| Sarov \| Semönov \| Sergač \| Šahunj \| Zavolžje \| Uren' \| Vetlug \| Viks \| Volodarsk \| Vorsm

[1] Zavolžjen pühäpertid sobory.ru-saital. (ven.)

[2] Zavolžjen avtolikutimiden tehnikuman sait (zamt.nobl.ru). (ven.)

[1]

[2]