Vorsm

Vorsm
Ворсма

Lidnanznam
Valdkund	Venäma
Eläjiden lugu (2017)	10 589 ristitud
Pind	22,78 km²
Pämez'	Aleksandr Prokofjev (2 012—)
Telefonkod	+7-83 171-xx-xxx
Avtokod	52, 152
Aigvö	UTC+3 (MSK+0)

Vorsm (ven.: Ворсма) om Venäman lidn Alalidnan agjan päivlaskmas. Se om Pavlovon rajonan lidnankund.

Istorii

Voräs'man tahond mainitase 14.-15. voz'sadoil. Eländpunkt mainitase ezmäižen kerdan vl 1588 kuti Vorsmankülä (ven.: село Ворсма). Sijaline mahuz om vägitoi, järg savi da savik, i 18. voz'sadaspäi pästtas raudasižid tegesid sijaližes soraudaspäi: raudad, veičed, luklod, tuikutimed, sabläd, medicinine instrument.

Vspäi 1926 Vorsm oli žilon statusanke. Vl 1955 se sai lidnan statusad. NSTÜ:n veičiden enambuz tegihe neciš lidnas. Pästtas veičid (kuz' edheotandad) da medicinižid ladlusid tähäsai. Vspäi 2014 mülütihe Vorsmad Venäman monolidnoiden nimikirjuteshe hüvänke socialiženke olendanke. Mugažo leibänedheotand radab.

Geografijan andmused

Lidn sijadase Kišm-jogen randoil (ven.: Кишма / Ворсма 71 km pitte, Okan oiged ližajogi). Jogi läbitab Toskank-vezivaradint lidnan päivnouzmas (Vorsmanjärv, 1,26 km²). Lähembaine lidn om Pavlovo 10 km päivlaskmha avtotedme. Matkad Alauz'lidnhasai om 62 km pohjoižpäivnouzmha avtotedme. Vorsm-raudtestancii sijadase 15 km lodeheze lidnaspäi.

Vorsman lidnankund om olmas vspäi 2004, lidn om sen üks'jäižeks eländpunktaks.

Eläjad

Vl 1931 eläjiden lugu oli 6 300 ristitud. Kaikiš suremb ristitišt oli 13 968 eläjad vl 1979. Vn 2010 Venäman rahvahanlugemižen mödhe eläjiden lugu oli 11 620 ristitud.

Kaks' keskškolad, čomamahtoiden lapsidenškol, sädamižen lapsidenkeskuz, fizkul'turiž-tervehtamižkompleks, 2 štarglavut, futbolklub stadionanke oma avaitud Vorsmas. Ortodoksižen hristanuskondan 2 jumalanpertid oma olmas lidnas.

Irdkosketused

• Lidnankundan lehtpoled Pavlovon rajonan tobmuden aluzkundoiden admpavlovo.ru-saital. (ven.)