Navašino

Navašino
Навашино

Lidnanznam
Valdkund	Venäma
Eläjiden lugu (2021)	14,664 ristitud
Pind	13 km²
Telefonkod	+7−83 175-xx-xxx
Avtokod	52, 152
Aigvö	UTC+3 (MSK+0)

Navašino (ven.: Нава́шино) om Venäman lidn Alalidnan agjan suvipäivlaskmas. Se om Navašinon lidnümbrikon (edel 2015. vot — rajonan) administrativine keskuz.

Istorii

Eländpunkt om sätud vl 1957 lidnan statusanke kahten radnikžilon ühtištusel: Mordovššikovo (ven.: Мордовщиково) i Lipn' (Липня). Panihe Mordovššikovon alust 19.-20. voz'sadan röunal kuti žilo verfinno, se oli rajonan keskuseks vspäi 1944. Lipn'-žilo mainitaškanzihe vn 1676 valdkundmakskirjas kuti külä. Navašino-raudtestancii radab vspäi 1912, nimitihe lähižen külän mödhe, sid' anttihe lidnale nimed stancijan mödhe.

Navašino šingotase laivansauvomižel (jügulaivad keskmäiženke jügutoitmižvoindanke), sildoiden tehmižel (metalližkonstrukcijad, pullosildad), sauvondmaterialiden pästandal (savič, sauvondblok, kuivad sauvondsegoitused), leibän, matrasoiden i meblin edheotandoil.

Geografijan andmused

Navašinon lidnümbrikon sijaduz agjas vn 2008 kartal

Lidn sijadase ümbrikon lodehes, Okan oiktan hijaman oiktal randal, 85 m ü.m.t. keskmäižel korktusel. Velet'm-jogi (ven.: Веле́тьма 99 km pitte, Okan oiged ližajogi) om lidnan pohjoižröunaks.

Matkad Alauz'lidnhasai om 140 km pohjoižpäivnouzmha orhal, 155 km avtotedme vai 214 km raudtedme. Lähembaižed lidnad oma Kulebaki kaks'kümnes nelläs kilometras suvipäivnouzmha orhal, 30 km avtotedme vai 28 km raudtedme, Viks 25 km suvhe orhal vai 29 km avtotedme, i Murom (Vladimiran agj) seičemes kilometras päivlaskmha-lodeheze orhal, 23 km avtotedme vai 10 km raudtedme.

«Vladimir — Murom — Arzamas»-avtote om Navašinon pohjoižpäivnouzmaižeks röunaks i läbitab lidnan suvipalad. Ühtennimine Navašino-raudtestancii sijadase lidnan keskuzpalas, «Murom — Arzamas»-keskustal.

Eläjad

Vn 2010 Venäman rahvahanlugemižen mödhe lidnan eläjiden lugu oli 16 416 ristitud, lidnümbrikon kaks' koumandest, vn 2021 — 14 664 ristitud. Kaik 15 051 eläjad oli lidnas vl 2017. Kaikiš suremb lidnan ristitišt oli läz 19 tuhad eläjid vll 1989−2001 (19 300 rist. vll 1996−1998).

Rahvahad (2010): venälaižed — 98,8 %, toižed rahvahad — 1,2 %.

Ortodoksižen hristanuskondan kaks' pühäpertid oma saudud lidnas: ph. Sergii Radonežalaižen jumalanpert' (om saudud vll 2016−2018) i puine loičendpert'.

Lapsiden opendusen aluzkundad oma päivkodid, keskškolad. Viksan metallurgižen kolledžan Navašinon filial (edel vn 2020 sügüz'kud Navašinon politehnine tehnikum, edel 2016. vot — laivanmehanine) om lidnan professionaližen opendusen aluzkundaks.

Galerei

• 
  Ird lidnan röunanno (2008)
• 
  Söndtavaroiden lauk vl 2012
• 
  Lidnan tegimištzon, vn 2008 nägu
• 
  Kul'turkeskuz (vn 2008 olend)
• 
  Tehtud Navašinos PK-1-ehtatim Okas päliči Muromas (2008), edel avtotesildan sauvondad vl 2009

Irdkosketused

• Lidnan da lidnümbrikon oficialine sait (navashino.nobl.ru). (ven.)