Murom

Murom
Муром

Lidnanznam	Flag
Valdkund	Venäma
Eläjiden lugu (2017)	109 809 ristitud
Pind	43,78 km²
Pämez'	Jevgenii Ričkov (2 011—)
Telefonkod	+7-49 234-xx-xxx
Avtokod	33
Aigvö	UTC+3 (MSK+0)

Murom (ven.: Муром [ˈmurəm]) om Venäman lidn Vladimiran agjan suvipäivnouzmaiženno röunanno Alalidnan agjanke. Se om agjan koumanz' lidn eläjiden lugun mödhe, om olmas Muroman lidnümbrikon i Muroman rajonan administrativižeks keskuseks, ei mülü rajonha.

Istorii

Eländpunkt mainitase ezmäižen kerdan vl 862 «Aigvoziden starinos» (amuižven. Повѣсть времѧнныхъ лѣтъ) alištunuziden Rürik-ruhtinasele lidnoiden keskes. 10.-11. voz'sadoil Murom — torguindan järed keskuz. Vozil 1127—1392 oli Muroman ruhtinazkundan keskusen.

Vspäi 1778 tegihe makundan lidnaks Vladimiran gubernijas. Vll 1792 i 1805 lujad lämoipalod mureniba vanhad puišt pertištod radialiženke planiruindanke, i vn 1788 generaližen planan uz' oigedsaumaine irdoiden planiruind om oletadud 19. voz'sadal.

Geografijan andmused

Lidn sijadase tazos tahondas, Okanjogen hural randal, 115 m ü.m.t. keskmäižel korktusel. Matkad Vladimirhasai om 120 km lodeheze orhal vai 135 km avtotedme. Lähembaine lidn om Navašino (Alalidnan agj) 5 km päivnouzmha orhal, raudtedme vai avtotedme.

Koume žilod da 6 küläd mülüdas lidnümbrikho Muroman ližaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 116 075 ristitud, lidnümbrikon — 125 231 ristitud. Kaikiš suremb lidnan ristitišt oli vl 1996, 143 tuhad eläjid, necil vodel ühtištuihe lidnanvuittušt Verbovskii-žilod lidnanke. Vl 2017 kaik 118 743 ristitud elädas lidnümbrikos.

Ortodoksižen hristanuskondan viž amušt jumalankodid, äiluguižed jumalanpertid da časounäd oma olmas lidnas, mugažo islaman pühäpert' vspäi 2007.

Ižanduz da transport

Ižandusen päsarakod oma radioladimiden tehmine, transportmašiništ (lämuzvedimed, kärauzimed), metalližkonstrukcijoiden tehmine, sauvondmaterialiden tegimed (faner, raudbeton, katusenmaterialad), tekstil'tegimišt, sömtegimišt (leibän i jauhon pästand). Professionaližen opendusen aluzkundad: industrialine, radioelektronižen ladimidensauvomižen i tegimištoliž-gumanitarine tehnikumad, medicine i pedagogine kolledžad, üläopendusen Moskvan i Vladimiran aluzkundoiden koume filialad.

Avtobusad da taksid oma kundaližeks transportaks lidnas. Vl 1880 raudte ühtenzoiti lidnad Kovrovanke. Vspäi 1910 Murom I-raudtestancii da vspäi 1912 raudtesild Okas päliči oma olmas Moskv — Kazan' raudtel, kiruhjonused ajeltas sil. Rippui avtotesild ühtenzoitab Okan randoid vn 2009 redukuspäi. Jogiport om lidnas, voib kävutada sidä jüguiden täht, no vaiše turistlaivad ujudas.

Irdkosketused

• Lidnümbrikon tobmuden aluzkundoiden oficialine sait (murom.info). (ven.)