Kol'čugino

Kol'čugino
Кольчугино
Lidnanznam;	Flag;
Valdkund	Venäma
Eläjiden lugu (2021)	39,410 ristitud
Pind	31 km²
Pämez'	Oleg Savel'jev; (reduku 2021—)
Telefonkod	+7−49 245-xx-xxx
Avtokod	33
Aigvö	UTC+3 (MSK+0)

Kol'čugino (ven.: Кольчу́гино) om Venäman lidn da lidnankund Vladimiran agjan lodehes. Se om Kol'čuginon rajonan administrativine keskuz.

Istorii

Eländpunktan aluz om pandud vl 1871 kut radnikžilo läz vas'kentegint. Se sai lidnan statusad vn 1931 20. päiväl keväz'kud.

Kol'čugino šingotase mujumetalltegesiden pästandal (mujumetalližtorved, metalližed kodiastjad), elektrotehnižel sarakol (elektrolikutimed i dizel'elektrostancijad, kabeläd), hobedaižtegesiden koumel tegimel, specialižiden ühthesuladusiden tegimel^[1], raudbetonantegimel, sömtegimištol (leibänkombinat, lihakombinat, maidproduktad i jähine, kalapreservad), omblendfabrikal, meblin fabrikal (laudad da ištmed).

Geografijan andmused

Lidn sijadase Pekš-jogen oiktal randal (ven.: Пекша 127 km pitte, Kläz'man hura ližajogi, Volgan bassein), 175 m ü.m.t. keskmäižel korktusel. Vl 1977 Kol'čuginon vezivaradim om täuttud necil jogel, vedase ani pohjoižhe lidnaspäi.

Matkad Vladimirhasai om 74 km suvipäivnouzmha. Lähembaižed lidnad oma Jur'jev Pol'skii 29 km pohjoižpäivnouzmha orhal, 32 km avtol vai raudtel, Kiržač 35 km päivlaskmha-suvipäivlaskmha orhal vai 37 km avtotel, Aleksandrov 42 km päivlaskmha-lodeheze orhal vai 47 km mantedme.

Tobmuz

Litvinovo-žilo (100 rist. vl 2021) da kahesa pen't küläd mülüdas lidnankundha Kol'čuginon ližaks. Lidnankundan pind — 40,72 nellikkilometrad.

Lidnankundan pämez' om Rahvahan deputatoiden nevondkundan ezimez'. Edeline lidnankundan pämez' om Jelena Savinova (reduku 2013 — reduku 2021). Lidnan erigoittud Administracii om tühjitadud vn 2018 uhokus, sen jäl'gmäine pämez' i likvidator oli Tat'jana Čeburova vn 2017 uhokuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 45 776 ristitud, lidnankundan — 46 236 ristitud. Kaik 43 543 eläjad oli lidnas vl 2017. Kaikiš suremb lidnan ristitišt oli 47 100 eläjad vl 2003.

Rahvahad (lidnalaižed, enamba 0,4 % vl 2021): venälaižed — 89,1 %, tadžikalaižed — 2,9 %, armenijalaižed — 0,9 %, ukrainalaižed — 0,5 %, totarlaižed — 0,4 %, toižed rahvahad — 2,4 %, rahvahuden ozutandata — 3,8 %.

Ortodoksižen hristanuskondan seičeme pühäpertid^[2] oma kaičenus i saudud lidnas: Jumalanmaman Katken jumalanpert', Jumalanmaman Vladimiran jumalaižen jumalanpert' (om sauvomas), viž časounäd.

Lapsiden opendusen aluzkundad oma 19 päivkodid, kuz' keskškolad (nomerad 1, 2, 4, 5, 6, 7), čomamahtoiden škol, lapsiden da norišton sportškol. Kol'čuginon politehnine kolledž^[3] om lidnan professionaližen opendusen aluzkundaks.

Transport

Avtobusad (ühesa maršrutad) da taksid oma kundaližeks transportaks lidnas.

Ühtennimine Kol'čugino-raudtestancii sijadase «Aleksandrov — Ivanovo»-raudtekeskustal.

Galerei

Vezičuhunduz (2012)
Jumalanmaman Katken jumalanpert', vn 2019 nägu
Istorine Beliševad-torgovanoiden pert' (2019)
Keskškol nomer 6 vl 2018
Suksiden da biatlonan stadion (2021, parkran)

Homaičendad

Irdkosketused

Lidnankundan tobmuden sait (gorod.kolchadm.ru). (ven.)

Kol'čugino Vikiaitas

	Vladimiran agjan lidnad
	Aleksandrov \| Gorohovec \| Gus' Hrustal'nii \| Jur'jev Pol'skii \| Kameškovo \| Karabanovo \| Kiržač \| Kol'čugino \| Kosterövo \| Kovrov \| Kurlovo \| Lakinsk \| Melenkad \| Murom \| Petuškad \| Pokrov \| Radužnii \| Sobink \| Strunino \| Sudogd \| Suzdal' \| Vladimir \| Väznikad

[1] Kol'čuginon specialižiden ühthesuladusiden tegimen sait (kzss.ru). (ven.)

[2] Kol'čuginon pühäpertid sobory.ru-saital. (ven.)

[3] Kol'čuginon politehnižen kolledžan sait (кольчугпк.рф). (ven.)

[1]

[2]

[3]