Jur'jev Pol'skii

Jur'jev Pol'skii
Юрьев-Польский
Lidnanznam;	Flag;
Valdkund	Venäma
Eläjiden lugu (2021)	17,276 ristitud
Pind	10,2 km²
Pämez'	Aleksandr Vikulov; (reduku 2009—)
Telefonkod	+7−49 246-xx-xxx
Avtokod	33
Aigvö	UTC+3 (MSK+0)

Jur'jev Pol'skii (ven.: Ю́рьев-По́льский, harv. Ю́рьев-Польско́й) om Venäman lidn da lidnankund Vladimiran agjan lodehližen palan pohjoižes. Se om Jur'jev Pol'skijan rajonan administrativižeks keskuseks da palaks.

Istorii

Eländpunktan aluz om pandud vl 1152 Jurii Dolgorukii-ruhtinasen käskön mödhe lidnuseks lidnan statusanke. Nimitihe lidnad Dolgorukijan nimen mödhe. Eziauguižešti mainitihe aigkirjoiš Gürgev, Gergev, ližazihe Pol'skii erištamha Tartuspäi (enččel Jur'jev) i Ivanovon agjan Jur'jevecaspäi. Lidn oli penen Jur'jevan ruhtinazkundan keskusen vozil 1213−1340, oli Vladimiran ruhtinasiden poles, vspäi 1340 Moskvan ruhtinazkundan palaks. Oli mülünu Vladimiran gubernijha makundan lidnaks vspäi 1796.

Lidn eli lujas lämoipalos läbi vl 1871, sen jäl'ghe palanuded torguindrived oma udessaudud kivespäi. Jur'jev Pol'skii-raudtestancii radab vspäi 1898. Kaik 13 kanghiden edheotandad radoiba lidnas 20. voz'sadan augotišes.

Jur'jev Pol'skii šingotase elektromašiništon tegimel sidon sarakon täht, kanghiden «Avangard»-fabrikal (ribuikahad, meblin täht i kebnad kanghad), sömtegimištol (razvitoman maidon tegim, lihakombinat).

Geografijan andmused

Lidn sijadase rajonan keskuzpalas, Kolokš-jogen molembil randoil (ven.: Ко́локша 146 km pitte, Kläz'man hura ližajogi), maižanduzrajonan keskuses, 140 m ü.m.t. keskmäižel korktusel.

Matkad Vladimiraspäi om kuz'kümne kilometrad lodeheze orhal vai 68 km avtotedme. Lähembaižed lidnad om Kol'čugino koumekümnes kilometras suvipäivlaskmha orhal vai avtotedme i Gavrilov Posad (Ivanovon agj) 28 km päivnouzmha orhal vai 42 km avtotel/raudtel.

Tobmuz

Jur'jev Pol'skii om lidnankundan üks'jäižeks eländpunktaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 19 595 ristitud, vn 2021 — 17 276 ristitud. Kaik 18 610 eläjad oli lidnas vl 2017. Kaikiš suremb lidnan ristitišt oli 22 096 eläjad vl 1970 i 22 247 eläjad vl 1989.

Rahvahad (enamba 0,4 % vl 2021): venälaižed — 89,0 %, tadžikalaižed — 0,4 %, toižed rahvahad — 2,6 %, rahvahuden ozutandata — 8,0 %.

Ortodoksižen hristanuskondan nened pühäpertid^[1] oma kaičenus i saudud lidnas: ph. Jurgii-vägestusenkandajan päjumalanpert' (1230−1234), Mikoi-arhangelan mez'jumalankodi i muzei (17. voz'sada, ühtennimine päjumalanpert' i koume jumalanpertid), Jumalanmaman Tulendan Nikonovskii-mez'jumalankodi (kaks' jumalanpertid), phh. Pedroin da Pauloin naižjumalankodi (19. voz'sada, jumalanpertinke, völ kaks' jumalanpertid tarbhaitas restavracijad), Eläban Eziauguižen Stroican päjumalanpert' i kuz' jumalanpertid.

Openduz

Lapsiden opendusen aluzkundad oma kuz' nomeruidud päivkodid (nomer 2, 4, 6..9), koume školad (nomer 1..3), rajonan kul'turan da joudan keskuz, čomamahtoiden škol, lapsiden tervehtamižen da opendusen sportkeskuz.

Industrialiž-gumanitarine kolledž^[2] om lidnan professionaližen opendusen aluzkundaks.

Galerei

Lämoipalonvastaine palakund (2015)
Mikoi-arhangelan mez'jumalankodi i muzei amuižen Kremlin sijas, vn 2018 nägu
Torguindrived vl 2015
Keskškol nomer 1 (2015)
Jumalanmaman Katken (huralpäi) i ph. Nikita-moknikan (oiktalpäi) jumalanpertid vl 2015

Homaičendad

Irdkosketused

Jur'jev Pol'skii-lidnan tobmuden sait (gorod.yp33.ru). (ven.)

Jur'jev Pol'skii Vikiaitas

	Vladimiran agjan lidnad
	Aleksandrov \| Gorohovec \| Gus' Hrustal'nii \| Jur'jev Pol'skii \| Kameškovo \| Karabanovo \| Kiržač \| Kol'čugino \| Kosterövo \| Kovrov \| Kurlovo \| Lakinsk \| Melenkad \| Murom \| Petuškad \| Pokrov \| Radužnii \| Sobink \| Strunino \| Sudogd \| Suzdal' \| Vladimir \| Väznikad

[1] Jur'jev Pol'skijan pühäpertid sobory.ru-saital. (ven.)

[2] Jur'jev Pol'skijan industrialiž-gumanitarižen kolledžan sait (ypigk.spo.obrazovanie33.ru). (ven.)

[1]

[2]