Lakinsk

Lakinsk
Лакинск

Lidnanznam	Flag
Valdkund	Venäma
Eläjiden lugu (2021)	12,861 ristitud
Pind	9,31 km²
Pämez'	Vladimir Smoržanük (reduku 2020—)
Telefonkod	+7−49 242-xx-xxx
Avtokod	33
Aigvö	UTC+3 (MSK+0)

Lakinsk (ven.: Ла́кинск) om Venäman lidn da lidnankund Vladimiran agjan keskuzpalan päivlaskmas. Mülüb Sobinkan rajonha, sen kahtenz' surtte lidn.

Istorii

Undol-žilo (ven.: село Ундол) mainitase ezmäižen kerdan 15. voz'sadan lopus. Eländpunktan aluz om pandud vl 1927 kuti Lakinskii-radnikžilo läz kudondfabrikad. Eländpunkt om nimitadud Lakin-bol'ševikan mödhe, riktihe händast fabrikas vl 1905. Radnikžilo sai lidnan statusad vl 1969 nügüdläiženke nimenke, mülütihe Undol-žilod lidnha.

Lakinsk šingotase sömän da sötken tegimištol tobjimalaz (snekad, olud, maidproduktad, vermišel' i keitosed, leibänpaštandsegoitused, kalakonservad; premiksad porzhiden täht), puvillkanghiden pästandal, meblin fabrikal, čulkoiden da noskiden edheotandal, mašiništon invalidoiden täht tegimel (invalidižed korjad, ištmed, kaičpud).

Geografijan andmused

Sobinkan rajonan sijaduz agjas vn 2010 kartal

Lidn sijadase rajonan keskuzpalan päivlaskmas, Undolk-jogen randal (ven.: Ундолка 15 km pitte, Kläz'man hura ližajogi), 120 m ü.m.t. keskmäižel korktusel. Kläz'man rand i Sobink-rajonkeskuz oma koumes kilometras suvipäivnouzmha.

Matkad Vladimirhasai om koumekümne kilometrad pohjoižpäivnouzmha.

Tobmuz

Lakinsk om lidnankundan üks'jäižeks eländpunktaks.

Lakinskan Rahvahaližiden deputatoiden nevondkundan ezimez' om lidnankundan pämez', sen edeline ezimez' om Vladimir Novikov (sügüz'ku 2015 — sügüz'ku 2020). Lidnan Administracijan edeližed pämehed oma Natal'ja Nikolajeva (uhoku 2022 — semendku 2023, velgusentäutai), Aleksei Andrianov (kül'mku 2018 — uhoku 2022). Viktor Gračov om lidnankundan Administracijan pämez' vn 2023 semendkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 15 715 ristitud, rajonan ristitišton nelländez, vn 2021 — 12 861 ristitud. Kaik 14 568 eläjad oli lidnas vl 2017. Kaikiš suremb lidnan ristitišt oli 18..19 tuhad eläjid vll 1989−1998 (19 100 rist. vl 1992).

Ortodoksižen hristanuskondan koume pühäpertid oma kaičenus i saudud lidnas: Jumalanmaman Kazanin jumalaižen jumalanpert' (vspäi 1693) i kaks' časounäd.

Openduz i kul'tur

Lidnan büdžetižed aluzkundad oma kaks' keskškolad, čomamahtoiden škol lapsiden täht, lapsidenkodi, lapsiden da alaigäčuiden keskuz, kul'turkeskuz, A. V. Suvorovan muzei, kirjišt, Trud-stadion («Tö»).

Professionaližen opendusen aluzkundad ratas lähembaižiš lidnoiš.

Transport

«Volg»-avtoten (M7-trass) Moskv — Vladimir-pidust läbitab lidnad.

Undol-raudtestancii (ven.: Ундол) sijadase «Moskv — Vladimir»-raudtekeskustal vspäi 1861.

Galerei

• 
  Muštnik lidnan 500-voččele jubilejale (2016)
• 
  Jumalanmaman Kazanin jumalaižen jumalanpert', vn 2011 nägu
• 
  Kezerduzkudondfabrikan sauvuz vl 2018
• 
  Keskškolan nomer 2 kahtenz' korpus edel rekonstrukcijad (2018, radoi vll 1934−2013)
• 
  Puine pertišt vl 2018

Irdkosketused

• Lidnan tobmuden sait (лакинск-адм.рф). (ven.)