Karabanovo (Vladimiran agj)

Karabanovo
Карабаново

Lidnanznam	Flag
Valdkund	Venäma
Eläjiden lugu (2021)	13,150 ristitud
Pind	11,11 km²
Pämez'	Lüdmila Jemel'janova (kezaku 2018—)
Telefonkod	+7−49 244-xx-xxx
Avtokod	33
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Karabanovo (ven.: Караба́ново) om Venäman lidn da lidnankund Vladimiran agjan päivlaskmas, sen Aleksandrovan rajonas.

Istorii

Eländpunkt mainitase ezmäižen kerdan vl 1630, om nimitadud sodabajarišton ezitajiden, pidajan Karabanovad-kanzan mödhe. Vl 1846 Baranovad-torgovanad sauvoiba kudondfabrikad külänno. Vl 1871 raudte tuli külähä Aleksandrovaspäi i vedihe vagonoid hebovägel, vl 1893 ezmäine jonuz vedimenke ajoi küläs läbi. Radnikžilo sai lidnan statusad vl 1938.

Nügüd'aigan (vl 2022) puvillkombinat seižub radmata. «Spartak»-omblendfabrik radab lidnas (sobad magaduzsijiden täht i koditekstil').

Geografijan andmused

Aleksandrovan rajonan sijaduz agjas vn 2010 kartal

Lidn sijadase rajonan suves, Hahkjogen randoil (ven.: Серая 60 km pitte, Kläz'man hurapol'ne bassein). Matkad Aleksandrov-rajonkeskushesai om ühesa kilometrad pohjoižhe.

Karabanovo om lidnankundan üks'jäižeks eländpunktaks.

Eläjad

Vn 2010 Venäman rahvahanlugemižen mödhe eläjiden lugu oli 14 868 ristitud, vn 2021 — 13 150 ristitud. Kaik 14 817 eläjad oli lidnas vl 2017. Kaikiš suremb lidnan ristitišt oli 19 tuhad eläjid vl 1967.

Ortodoksižen hristanuskondan kaks' pühäpertid oma saudud lidnas: Eläban Eziauguižen Stroican jumalanpert' i pen' časoun'. Se jumalanpert' oli saudud vozil 1876−1880, muretihe mantazole vl 1937, om udessündutadud vll 1991−2011.

Openduz

Lapsiden opendusen aluzkundad oma koume nomeruidud päivkodid (nomer 28..30), koume keskškolad (nomer 7, 8, 9), ližaopendusen Dar-keskuz («Lahj»), muzikškol, sportškol N. T. Maninan nimed.

Lähembaižed professionaližen opendusen aluzkundad ratas Aleksandrov-rajonkeskuses.

Transport

Maršruttaksid oma kundaližeks transportaks lidnas. Karabanovo-raudteplatform (oli stancijaks edel 2008. vot) om Moskvan raudten Surel renghal, sen «Aleksandrov — Orehovo-Zujevo»-pidustal.

Galerei

• 
  Pühän Stroican jumalanpert', vn 2013 nägu
• 
  Kul'turkeskuz Torgovai-torgul (vn 2016 olend)
• 
  Karabanovo-raudteplatform Moskvan raudten Surel renghal vl 2015

Irdkosketused

• Lidnan tobmuden aluzkundoiden oficialine sait (городкарабаново.рф). (ven.)