Kameškovo

Kameškovo
Камешково

Lidnanznam	Flag
Valdkund	Venäma
Eläjiden lugu (2021)	12,028 ristitud
Pind	8,31 km²
Pämez'	Dmitrii Storožev (reduku 2015—)
Telefonkod	+7−49 248-xx-xxx
Aigvö	UTC+3

Kameškovo (ven.: Ка́мешково) om Venäman lidn da lidnankund Vladimiran agjan pohjoižes.

Istorii

Eländpunktan aluz om pandud vl 1892 tekstil'fabrikan radnikžiloks. Kameškovo om Kameškovon rajonan administrativižeks keskuseks vspäi 1940, sen alusenpanendan aigaspäi Ivanovon agjaha. Vn 1944 elokun 14. päiväspäi pandihe Vladimiran agjan alust, i sirtihe lidnad rajonanke sihe. Radnikžilo sai lidnan statusad vn 1951 12. päiväl heinkud Venäman NFST:n Ülembaižen Nevondkundan Prezidiuman käskön mödhe.

Kameškovo šingotase mehanižel tegimel, tekstil'fabrikal da lavakrepindoiden tegimel päedheotandoikš. Kompressorstancii radab «Alauz'lidn — Dmitrov»-gazanveimel.

Geografijan andmused

Lidnan sijaduz rajonas i agjas vn 2006 kartal

Lidn sijadase rajonan keskuzpalan pohjoižpäivnouzmas, tazangištol Kläz'm-jogen (kuz' kilometrad suvhe) i Naromš-jogen (kuz' kilometrad pohjoižhe, ven.: Наромша 31 km pitte) keskes, 100 m ü.m.t. keskmäižel korktusel.

Lähembaine järed lidn om Kovrov, matkad sihesai om kaks'kümne viž kilometrad päivnouzmha avtotedme vai 20 km raudtedme. Matkad Vladimirhasai om nell'kümne kilometrad suvipäivlaskmha.

Tobmuz

Kameškovo om lidnankundan üks'jäižeks eländpunktaks, rajonan üks'jäine lidnankund.

Lidnankundan tobmuden pämez' om sen Deputatoiden nevondkundan ezimez'.

Eläjad

Vn 2010 Venäman rahvahanlugemižen mödhe lidnan eläjiden lugu oli 13 103 ristitud, rajonan kaks' videndest, vn 2021 — 12 028 ristitud. Kaik 12 711 eläjad oli lidnas vl 2017. Kaikiš suremb lidnan ristitišt oli läz 15 tuhad eläjid vozil 1989−1998 (15 100 eläjad vl 1992).

Rahvahad (enamba 0,4 % vl 2021): venälaižed — 84,4 %, totarlaižed — 2,8 %, ukrainalaižed — 0,6 %, toižed rahvahad — 2,8 %, rahvahuden ozutandata — 9,4 %.

Ortodoksižen hristanuskondan Sündun Voznesenjan jumalanpert' om saudud vozil 1904−1906. Ph. Panteleimon-spravitajan kodijumalanpert' om avaitud rajonan läzundkodiš vspäi 2014.

Openduz

Lapsiden opendusen aluzkundad oma severz'-se päivkodid, keskškol nomer 1, aluzškol nomer 3, korrekcine škol nomer 4, sädamižen «Apel'sin»-keskuz, čomamahtoiden škol, lapsiden da norišton «Triumf»-sportškol.

Professionaližen opendusen aluzkundad ratas lähembaižiš lidnoiš.

Galerei

• 
  Puine pertišt i lämoipalonvastaine palakund (2010)
• 
  Sündun Voznesenjan jumalanpert', vn 2021 vai sen aigemba nägu
• 
  Lidnan torguz vl 2010
• 
  Käskuzkundan sauvuz (2023)

Irdkosketused

• Municipaližen «Kameškovo-lidn»-ühtnikan lehtpoled Kameškovon rajonan tobmuden saital (admkam.ru). (ven.)