Sudogd

Sudogd
Судогда

Lidnanznam
Valdkund	Venäma
Eläjiden lugu (2021)	10,408 ristitud
Pind	12,41 km²
Pämez'	Natal'ja Teplova (tal'vku 2015—)
Telefonkod	+7−49 235-xx-xxx
Avtokod	33
Aigvö	UTC+3 (MSK+0)

Sudogd (ven.: Су́догда) om Venäman lidn da lidnankund Vladimiran agjan keskuzpalas. Se om Sudogdan rajonan administrativine keskuz da üks'jäine lidn.

Istorii

Eländpunkt mainitase ezmäižen kerdan vl 1552 kuti Jamskai-slabad (ven.: Ямская слобода). 17. voz'sadal — Sudogodskai-slabad, nimitadud jogen mödhe. Se sai lidnan statusad vl 1778 nügüdläiženke nimenke. Lujad lämoipalod oliba lidnas vozil 1806 (pertid da jumalanpertid puspäi paloiba lophu) i 1838. Vl 1879 saudihe pölvhan kuidfabrikad, vl 1897 — butulktegint.

Sudogdan ižandusen päsarakod oma sauvondmaterialiden pästand (stökol- da bazal'tkuid, katuzlehtesed, tehnižed kanghad 1960-nziš vozišpäi) i stökolplastikan pästand, mugažo omblendfabrik i maidtegim ratas lidnas. Vedadas avtokrossan voibištelendoid.

Geografijan andmused

Lidnan sijaduz rajonas i agjas

Lidn sijadase Sudogd-jogen randal (116 km pitte, Kläz'man oiged ližajogi, Volgan bassein), 100 m ü.m.t. keskmäižel korktusel. Istorine keskuz sijadase Sudogdan hural randal, uded fartalad — oiktal randpolel.

Matkad Vladimirhasai om nell'kümne kilometrad lodeheze. «Vladimir — Murom»-avtotekeskust ümbärdab lidnad pohjoižespäi.

Tobmuz

Sudogd om lidnankundan üks'jäižeks eländpunktaks.

Lidnankundan tobmuden pämez' om sen Rahvahandeputatoiden nevondkundan ezimez'. Lidnan erigoittud Administracii om likvidiruidud vn 2019 redukus, Jelena Lübimova radoi sen jäl'gmäižen pämehen vn 2015 kül'mkuspäi i oli Administracijan likvidacižen laudkundan ohjandajaks vn 2016 redukuspäi. Nügüd' rajonan administracii tegeb sen velgusidme.

Eläjad

Vn 2010 Venäman rahvahanlugemižen mödhe lidnan eläjiden lugu oli 11 848 ristitud, vn 2021 — 10 408 ristitud. Kaik 10 527 eläjad oli lidnas vl 2017. Kaikiš suremb lidnan ristitišt oli enamba 14 tuhad eläjid vozil 1989−2001.

Rahvahad (enamba 0,4 % vl 2021): venälaižed — 86,3 %, toižed rahvahad — 2,0 %, rahvahuden ozutandata — 11,7 %.

Ortodoksižen hristanuskondan kaks' pühäpertid oma avaitud lidnas: ph. Jekaterinan päjumalanpert' (1806−1814, udessündutadud vll 1891, 1999−2013) i ph. Aleksandr Nevalaižen jumalanpert' (1870).

Lapsiden opendusen aluzkundad oma severz'-se päivkodid, aluzškol, kaks' keskškolad (nomer 1 i 2), privatine Pühän Jekaterinan ortodoksižen hristanuskondan škol, čomamahtoiden škol (ende muzikškol i čomamahtoine škol eriži), lapsiden da norišton Sudogodec-sportškol. Professionaližen opendusen aluzkundad ratas lähembaižiš lidnoiš.

Transport

Reisavtobusad ühtenzoittas lidnad lähižidenke eländpunktoidenke.

Ende raudtesarak «Kovrov — Murom»-keskustan Volosatai-stancijaspäi lopihe lidnas. Vl 2006 se oli likvidiruidud «Sudogd — Nerudnai»-keskustal.

Galerei

• 
  Lidnan administracijan sauvuz i kodirandantedištandmuzei (2007)
• 
  Ph. Jekaterinan päjumalanpert', vn 2017 nägu
• 
  Torguindkeskuz vl 2011
• 
  Kul'turan da joudan «Rodina»-keskuz (2019, Kodima)
• 
  Memorial ühtnenuzile Surhe sodaha Sudogdan eläjile (2019)

Irdkosketused

• Lidnan sijaližen tobmuden aluzkundoiden oficialine sait (sudogdagorod.ru). (ven.)