Semönov (lidn)

Semönov
Семёнов

Lidnanznam
Valdkund	Venäma
Eläjiden lugu (2021)	25,075 ristitud
Pind	14 km²
Telefonkod	+7−83 162-xx-xxx
Avtokod	52, 152
Aigvö	UTC+3 (MSK+0)

Semönov (ven.: Семёнов) om Venäman lidn Alalidnan agjan pohjoižpalas. Se om Semönovan lidnümbrikon administrativine keskuz (edel vn 2010 tal'vkud — rajonan), mülüb sihe.

Istorii

Ende marilaižed oliba enambuses lidnan sijas. Eländpunktan aluz om pandud 17. voz'sadan augotišes kuti vanhuskolaižiden külä. Mainitaškanzihe kirjutadud purtkiš vspäi 1644 (Semönovskoje-žilut, ven.: селишко Семёновское), vl 1717 — Semönovo-žilo. Sai makundan lidnan statusad vl 1779 nügüdläiženke nimitusenke. Toihe ajaden Semönovha luzikoid i toižid puižid tegesid (kandičud, kokarid, kehkrad burakod), čomitihe i mujutihe niid lidnas, sid' oigetihe Alalidnan jarmankha. Lidn oli Venäman üks'jäine sija lestoukiden tehmiženke 19. voz'sadal.

Semönov šingotase valamiž-mehanižel tegimel (torvarmatur), hohloman čomitandan edheotandal i sijaližen čomitandan fabrikal (mebel', bobaižed, suvenirad, oigetas tavaroid verhiže-ki maihe), vähäžiruižiden pertiden tegimel, turizmal, mugažo faneran tegim, maidtegim i kombisötken edheotand ratas lidnas.

Geografijan andmused

Semönovan lidnümbrikon sijaduz agjas vn 2008 kartal

Lidn sijadase ümbrikon keskuzpalan suvipäivlaskmas, Sanoht-jogen hural randal tobjimalaz (ven.: Санохта 29 km pitte, Volgan hurapol'ne bassein), 110 m ü.m.t. keskmäižel korktusel. Sanoht lankteb Kerženec-jogehe, kudamb jokseb vides..kümnes kilometras päivnouzmha lidnaspäi. «Alauz'lidn — Kirov»-avtote ümbärdab lidnad lodehespäi. Semönov-raudtestancii radab «Alauz'lidn — Kotel'nič»-keskustal.

Matkad Alauz'lidnhasai om vižkümne ühesa kilometrad suvipäivlaskmha orhal, 78 km avtotedme vai raudtedme. Toižed lähembaižed lidnad oma Bor 57 km suvipäivlaskmha orhal, 69 km avtotel vai 63 km raudtel, Gorodec 64 km päivlaskmha orhal vai 73 km avtotedme, i Uren' 108 km pohjoižpäivnouzmha orhal, 135 km avtotedme vai raudtedme.

Eläjad

Vn 2010 Venäman rahvahanlugemižen mödhe lidnan eläjiden lugu oli 24 473 ristitud, lidnümbrikon pol', vn 2021 — 25 075 ristitud. Kaik 24 536 eläjad oli lidnas vl 2017. Kaikiš suremb lidnan ristitišt oli enamba 26 tuhad eläjid vll 1989−2001 (26 600 ristitud vll 1992 i 2000).

Rahvahad (2010): venälaižed — 98,2 %, toižed rahvahad — 1,8 %.

Ortodoksižen hristanuskondan koume jumalanpertid oma avaitud lidnas: ph. Vladimiran, Kaikiden pühämehiden i vanhuskolaižiden Mikulai-čudonsädajan.

Lapsiden opendusen aluzkundad oma ühesa nimitadud i nomeruidud päivkodid (nomer 2, 4..11), nell' keskškolad (nomer 1..4), licei A.S. Puškinan nimed, ortodoksižen hristanuskondan gimnazii ph. Luka-apostolan nimed, ehtal'ne škol, lapsiden sädamižen keskuz, muzikškol I.T. Šesterikovan nimed, čomamahtoine škol, «Olimp»-sportškol. Semönovan industrialiž-čomamahtoline tehnikum om lidnan professionaližen opendusen aluzkundaks.

Galerei

• 
  Lidnümbrikon käskuzkundan sauvuz (2008)
• 
  Kaikiden pühämehiden jumalanpert', vn 2021 nägu
• 
  Käzitöiden jarmank pätorgul vl 2014
• 
  Lidnümbrikon kul'turkeskuz (2008, ende Sündun Voznesenjan päjumalanpert')
• 
  Semönov-päraudtestancijan sauvuz vl 2016

Irdkosketused

• Lidnan da sen ümbrikon tobmuden sait (semenov.nobl.ru) i sen vanh versii (semenov.nnov.ru, om täuttud vn 2022 keväz'kuhusai). (ven.)