Šahunj

Šahunj
Шахунья

Lidnanznam	Flag
Valdkund	Venäma
Eläjiden lugu (2021)	17,626 ristitud
Pind	25 km²
Pämez'	Roman Košelev (reduku 2015—)
Telefonkod	+7−83 152-xx-xxx
Avtokod	52, 152
Aigvö	UTC+3 (MSK+0)

Šahunj (ven.: Шаху́нья) om Venäman lidn Alalidnan agjan pohjoižpäivnouzmas. Se om Šahunjan lidnümbrikon (edel vn 2011 kül'mkud — rajonan) administrativine keskuz da pala.

Istorii

Ende marilaižed eliba enambuses lidnan tahondas. Eländpunktan aluz om pandud mecoiden i soiden sijha vl 1921 kuti žilo Šahunj-raudtestancijanno sauvomha da holitamha «Alauz'lidn — Kotel'nič»-raudtekeskustad koumes kilometras pohjoižpäivnouzmha ühtennimižes Šahunj-küläspäi (om olmas nügüd'-ki). Saudihe puruvedimdepod vodele 1928. Vspäi 1933 kätihe radnikžilod rajonan keskuseks. Žilo sai lidnan statusad vn 1943 27. päiväl redukud.

Šahunj šingotase maidtegimel, raudten edheotandoil (koume depod), mecanümbriradmižen sarakol (nell' edheotandad), omblendan fabrikal (vspäi 2020) i poimetišiden edheotandal.

Geografijan andmused

Šahunjan lidnümbrikon sijaduz agjas vn 2008 kartal

Lidn sijadase ümbrikon päivnouzmas, 152 m ü.m.t. keskmäižel korktusel. Černušk (Čornai)-jogi da sen pened Kopan'- i Samarih-ližajoged jokstas lidnadme suvespäi pohjoižhe (Vetlugan i Volgan hurapol'ne bassein).

Matkad Kirovan agjan röunhasai om kaks'kümne kilometrad suvipäivnouzmha, Alauz'lidnhasai om 218 km suvipäivlaskmha orhal, 263 km avtotedme vai raudtedme. Lähembaižed lidnad oma Jaransk (Kirovan agj) 86 km päivnouzmha-suvipäivnouzmha orhal vai 101 km avtotedme, Uren' 54 km päivlaskmha-suvipäivlaskmha orhal, 57 km avtotedme vai raudtedme, i Vetlug 54 km lodeheze orhal vai 66 km avtotedme.

«Alauz'lidn — Kirov»-raudtekeskust jagab lidnad poleti, «Alauz'lidn — Kirov»-mante ümbärdab lidnad suvipäivlaskmaspäi.

Klimat om ven kontinentaline, il'man lämuz voib vajehtadas lujas päivesen aigan. Voden keskmäine lämuz om +2,8 C°, kezakun-elokun +16,2..+17,6 C°, tal'vkun-uhokun −11,4..−13,3 C°. Ekstremumad oma +36,7 C° (heinku, eloku) i −48,2 C° (tal'vku). Kezaaigan minimum om −2,7 C°, tal'vaigan maksimum om +6,2 C° (tal'vku). Ei voi panda halad heinkus vaiše (minimum om +1,6 C°). Paneb sadegid 577 mm vodes, enamba kezakus-redukus (54..67 mm kus), vähemba vilukus-uhokus (28..31 mm kus). Voden keskmäine relätivine nepsuz om 78 %. Mahuz kül'mehtub 180 santimetrhasai, minimaline lugustuzlämuz projektiruindan täht om −32 C°.

Eläjad

Vn 2010 Venäman rahvahanlugemižen mödhe lidnan eläjiden lugu oli 20 921 ristitud, lidnümbrikon viž ühesandest, vn 2021 — 17 626 ristitud. Kaik 20 183 eläjad oli lidnas vl 2017. Kaikiš suremb lidnan ristitišt oli enamba 23 tuhad eläjid vll 1996−2001 (23 600 rist. vl 2000).

Rahvahad (2010): venälaižed — 96,2 %, totarlaižed — 1,2 %, toižed rahvahad — 2,6 %.

Ortodoksižen hristanuskondan nell' pühäpertid oma kaičenus i saudud lidnas: Jumalanmaman Katken jumalanpert' (1994) i koume časounäd.

Lapsiden opendusen aluzkundad oma seičeme nimitadud i nomeruidud päivkodid (nomer 2, 3, 5, 35, 41, 147 i Zvözdočka «tähthaine»), koume keskškolad (nomer 1, 2 i 14), gimnazii A.S. Puškinan nimed, školanirdpol'žen radon Perspektiva-keskuz (viž palakundad lidnas i koume ümbrikon žiloiš), muzikškol, čomamahtoine škol, fizkul'turižen «Atlant»-tervehtamižkompleksan sportškol. Šahunjan agrarižen industrijan kolledž om lidnan professionaližen opendusen aluzkundaks.

Galerei

• 
  Lidnan da sen ümbrikon tobmuden sauvuz (vn 2010 olend)
• 
  Lidnan läžundkodin kertläžundoiden palakund, vn 2015 nägu
• 
  Keskuzline universaline lauk vl 2014
• 
  Lidnan kul'turkeskuz (2011)
• 
  Šahunjan avtostancii raudtenno vl 2013

Irdkosketused

• Šahunjan lidnümbrikon tobmuden sait (shahadm.nobl.ru). (ven.)