Vetlug (lidn)

Vetlug
Ветлуга

Lidnanznam
Valdkund	Venäma
Eläjiden lugu (2021)	8,528 ristitud
Pind	18,22 km²
Pämez'	Vladimir Guščin (sügüz'ku 2015—)
Telefonkod	+7−83 150-xx-xxx
Avtokod	52, 152
Aigvö	UTC+3 (MSK+0)

Vetlug (ven.: Ветлу́га, lod. mar.: Юр, Вӫтлӓ, nitmar.: Юр) om Venäman Alalidnan agjan lidnankund i kaikiš pohjoižemb lidn. Se om Vetlugan rajonan administrativine keskuz.

Istorii

Eländpunktan aluz om pandud marilaižil 13. voz'sadal, oli varmitadud vl 1285. Lidn oli anastadud Galičun ruhtinasiden sodavägil vl 1468, hö paniba lidnad mantazole, i Juran ristitišt oli pen' pit'kan aigan. Kazvataškanzi 17. voz'sadan augotišes tošti kuti Venäman sirdnikoiden Voskresenskii pagast, sid' Voskresenskoje-žilo. Nimitihe 18. voz'sadan zavodindaspäi Ülävoskresenie-žiloks (ven.: село Верхнее Воскресение), se sai makundan lidnan statusad nügüdläiženke nimenke vl 1778, nimituz jogen mödhe.

Vetlug šingotase standartatoman mašiništon tegimel (järedad metalltegesed), mecan varhapanendal i sömtegimištol (leibtegim, mineralveziden tegim, likörvintegim).

Geografijan andmused

Lidn sijadase rajonan päivnouzmas, Vetlug-jogen keskjoksmusen oiktal korktal randal (lod. mar.: Вӫтлӓ, nitmar.: Вӱтла, Volgan hura ližajogi), 110 m ü.m.t. keskmäižel korktusel. «Uren' — Kotlas»-avtote läbitab lidnan päivnouzmašt palad, om saudud pidust' amušt tarabošsijad. Matkad Kostroman agjhasai om 12 km lodeheze, Alauz'lidnhasai om 200 km suvipäivlaskmha orhal vai 245 km avtotedme. Lähembaižed lidnad oma Šahunj 54 km päivnouzmha-suvipäivnouzmha orhal vai 66 km avtotedme, Uren' 43 km suvhe vai 46 km avtotedme, Šarj (Kostroman agj) 60 km pohjoižhe orhal vai 74 km avtotedme, kaikes koumes lidnas om raudtestancijoid.

Vetlug om lidnankundan üks'jäine eländpunkt.

Eläjad

Vn 2010 Venäman rahvahanlugemižen mödhe lidnan eläjiden lugu oli 8 954 ristitud, rajonan koume videndest. Kaikiš suremb lidnan ristitišt oli enamba 10 tuhad eläjid vl 1959 i vll 1979−2001 (10 400 rist. vl 1998).

Professionaližen opendusen aluzkundad oma Vetlugan mecagrotehnine tehnikum i Alalidnan medicinižen kolledžan Vetlugan filial.

Galerei

• 
  Lidnan kirjišt (2013)
• 
  Pühän Stroican päjumalanpert' (1805), vn 2013 nägu
• 
  Ph. Jekaterinan jumalanpert', vn 2013 nägu
• 
  Torguindrividen pala vl 2013
• 
  Vetlugan mecagrotehnine tehnikum (2013)

Irdkosketused

• Lidnankundan lehtpoled rajonan oficialižel omsu-nnov.ru-saital. (ven.)