Čkalovsk (Alalidnan agj)

Čkalovsk
Чкаловск

Lidnanznam	Flag
Valdkund	Venäma
Eläjiden lugu (2021)	11,535 ristitud
Pind	7 km²
Telefonkod	+7−83 160-xx-xxx
Avtokod	52, 152
Aigvö	UTC+3 (MSK+0)

Čkalovsk (ven.: Чка́ловск) om Venäman lidn Alalidnan agjan päivlaskmas. Se om Čkalovskan lidnümbrikon (vhesai 2015 — rajonan) administrativine keskuz da pala.

Istorii

Eländpunkt mainitase ezmäižen kerdan 12. voz'sadal kuti Vasilöva Slabad (ven.: Василёва Слобода) Jurii I Pit'kkäded-ruhtinasen Vasil'ko-poigan-sodavejan nimen mödhe. Panihe slabadan alust Vasil'kon käskön mödhe kuti varalidnuz Gorodecan täht Volgan vastrandal. Vspäi 1764 Vasilövo oli ekonomižeks žiloks. Läz 25 astiinikoiden edheotandad radoi siš 19. voz'sadan keskes. Laivanlikund madalzdujadme jogedme ližadui, i vl 1883 sauvoškanzihe žilos kohenduzedheotandoid jogen pohjan süvendusen laivišton täht.

Udesnimitihe žilod vn 1937 elokus sündnuden žilho Vasilii Čkalov-lendajan kanzannimen mödhe hänen lendusen jäl'ghe Pohjoižnaban kal't Amerikannoks. Čkalovskan pala putui upotamižen zonha Gor'kijan GES:an sauvondan aigan 1950-nzil vozil, ka udessaudihe erasid-se pertid i laivansauvomižen tegint udel sijal. Žilo sai lidnan statusad vl 1955.

Čkalovsk šingotase verfil, «Polöt»-tegimel (tarkoiktad metalližed tegesed ladimiden, avtoiden i raudten täht), omblendfabrikal i elektromehanižel tegimel, mugažo šampanj-vinan tegim radab.

Geografijan andmused

Čkalovskan lidnümbrikon sijaduz agjas vn 2008 kartal

Lidn sijadase ümbrikon pohjoižpäivnouzmas, Volgan oiktal randal (Gor'kijan vezivaradim) i langenijal sihe Sanaht-jogen hural randal (ven.: Санахта 28 km pitte), 100 m ü.m.t. keskmäižel korktusel.

Matkad Ivanovon agjan röunhasai om kümne kilometrad pohjoižhe orhal, Alauz'lidnan keskushesai om 67 km suvipäivnouzmha orhal vai 103 km avtotedme. Lähembaižed lidnad oma Gorodec 20 km suvipäivnouzmha orhal vai 50 km avtotedme, Zavolžje (lähembaine raudtestancii) 17 km suvipäivnouzmha-suvhe orhal vai 39 km avtotedme, i Pučež (Ivanovon agj) 25 km pohjoižhe orhal vai 44 km avtotedme.

Vll 2004−2015 lidn oli rajonan lidnankundaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 12 368 ristitud, lidnümbrikon viž ühesandest, vn 2021 — 11 535 ristitud. Kaik 11 569 eläjad oli lidnas vl 2017. Kaikiš suremb lidnan ristitišt oli läz 15 tuhad eläjid vll 1989−1998 (15 100 rist. vl 1996).

Ortodoksižen hristanuskondan kaks' pühäpertid oma avaitud lidnas: ph. Anastasija-sol'menpätajan jumalanpert' (1995) i Sündun Eläbzdusen časoun'. Niiden ližaks kaks' jumalanpertid ei ole kaičenus.

Lapsiden opendusen aluzkundad oma seičeme nimitadud i nomeruidud päivkodid (nomer 4, 7..10, 17, 20), kaks' keskškolad (nomer 4 i 5), škol-internat, lapsiden sädamižen pert', čomamahtoiden škol, lapsiden da norišton sportškol. Čkalovskan transportan i informacižtehnologijoiden tehnikum om lidnan professionaližen opendusen aluzkundaks.

Galerei

• 
  Lämoipalonvastaine palakund (2012)
• 
  Sündun Eläbzdusen časoun', vn 2015 nägu
• 
  V.P. Čkalovan lendimiden memorialine angar vl 2011
• 
  Kul'turan da sportan keskuz i Čkalovan muštnik (2011)
• 
  Čkalovskan avtostancii vl 2012

Irdkosketused

• Lidnan da lidnümbrikon oficialine sait (chkalovsk.nobl.ru). (ven.)
• Lidnan enččen municipalitetan sait (chkalovsk.narod.ru). (ven.) (edel 2015. vot)