Bogorodsk

Bogorodsk
Богородск

Lidnanznam
Valdkund	Venäma
Eläjiden lugu (2025)	33,818 ristitud
Pind	39,22 km²
Telefonkod	+7−83 170-xx-xxx
Avtokod	52, 152
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Bogorodsk (ven.: Богоро́дск) om Venäman lidn Alalidnan agjan keskuzpalan päivlaskmas. Se om Alauz'lidnan suvipäivnouzmaine ezilidn, Bogorodskan ümbrikon (edel vn 2020 semendkud — rajonan) administrativine keskuz, mülüb sihe.

Istorii

Edel 12. voz'sadad muromalaižed, mordvinalaižed i marilaižed oliba enambuses lidnan sijas. Eländpunkt mainitase ezmäižen kerdan vn 1561 Venäman Grigorii Zabolotskii-kirjutelijan ümbrikirjutandas kuti Bogorodskoje-žilo, nimitihe Pühän Jumalanmaman pühäpertin mödhe. Žilo oli tetab kuti Bogorodičnoje i Bogorodickoje mugažo. Vl 1614 Mihail Födorovič-car' andoi žilod ühesanke külänke Kuz'ma Minin-bajarile «Moskvan puhtastandas» i radnikoičendas. Žilo eli londuseližen nahkasižen torhuden ümbriradmižen keskuseks 17. voz'sadaspäi. Se sai lidnan statusad nügüdläiženke nimitusenke vl 1923.

Bogorodsk šingotase nahkantegimel, nahkasižen galanterejan edheotandal, pälembaižiden naižsobiden omblendfabrikal, meblin, kengiden i konditerižiden tegesiden fabrikoil. Trass avtovoibuižiden täht (Alalidnan rengaz, NRing) om saudud i avaitud lidnas vl 2010.

Geografijan andmused

Bogorodskan ümbrikon sijaduz agjas vn 2008 kartal

Lidn sijadase ümbrikon lodehes, 130 m ü.m.t. keskmäižel korktusel. Severz'-se jogid augotadas lidnan territorijal, ned mülüdas Okan oigedpol'žhe basseinha. Raudtestancii om Koževennoje «Alauz'lidn — Pavlovo»-jonol. «Alauz'lidn — Murom»-avtote om lidnan suviröunaks.

Matkad Alauz'lidnan röunhasai om vižtoštkümne kilometrad pohjoižpäivnouzmha orhal, 20 km avtotedme vai raudtedme, keskushesai — 39 km orhal vai 44 km avtotedme. Toižed lähembaižed lidnad oma Vorsm 20 km suvipäivlaskmha orhal, 23 km avtotedme vai raudtedme, Volodarsk 22 km lodeheze orhal, 72 km avtotedme vai raudtedme, i Dzeržinsk 15 km pohjoižhe orhal, 44 km avtotedme vai raudtedme.

Tobmuz

Bogorodsk oli lidnankundan üks'jäižeks eländpunktaks edel sen tühjitust vodele 2021.

Lidnan jäl'gmäine pämez' om Andrei Rezväkov (sügüz'ku 2015 — 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 35 499 ristitud, rajonan pol', vn 2021 — 35 068 ristitud. Kaik 34 388 eläjad oli lidnas vl 2017. Kaikiš suremb lidnan ristitišt oli 37..38 tuhad eläjid vll 1979−1999 (38 401 ristitud vl 1989).

Rahvahad (2010): venälaižed — 97,8 %, toižed rahvahad — 2,2 %.

Ortodoksižen hristanuskondan kuz' pühäpertid oma avaitud lidnas: koume jumalanpertid i koume časounäd.

Lapsiden opendusen aluzkundad oma üks'toštkümne nimitadud i nomeruidud päivkodid (nomer 1..5, 7, 10, 14, 15, 18, 19), viž keskškolad (nomer 1, 3, 4, 6, 7), škol nomer 8, muzikškol, čomamahtoiden škol. Professionaližen opendusen aluzkund om Bogorodskan politehnine tehnikum, mugažo Alalidnan medicinižen kolledžan Bogorodskan filial radab lidnas.

Galerei

• 
  Lidnan i ümbrikon tobmuden sauvuz (2012)
• 
  Pühän Jumalanmaman Katken jumalanpert', vn 2020 nägu
• 
  Pühän Jumalanmaman Emäganpäivän jumalanpert', vn 2020 nägu
• 
  Keskškol nomer 3 (2012)
• 
  Fontan i ofissauvuz (2014, V. Golovastikov-torgovanan istorine pert')
• 
  Koževennoje-päraudtestancijan sauvuz vl 2010

Irdkosketused

• Bogorodskan municipaližen ümbrikon tobmuden sait (bogorodsk.nobl.ru). (ven.)