Sarov

Sarov
Саров
	Lidnanznam;
Valdkund	Venäma
Eläjiden lugu (2025)	93,493 ristitud
Pind	249 km²
Pämez'	Aleksandr Tihonov; (sügüz'ku 2015—)
Telefonkod	+7−83 130-xx-xxx
Avtokod	52, 152
Aigvö	UTC+3 (MSK+0)

Sarov (ven.: Саро́в, erz.: Саров ош, tot.: Сарыкылыч) om Venäman sauptud lidn da lidnümbrik Alalidnan agjan suviröunan Mordovijanke päivlaskmas. Se om alištunu Alalidnan agjan tobmudele, agjan nellänz' lidn eläjiden lugun mödhe.

Istorii

Ende mordvinalaižiden i totarlaižiden-mišariden Sarovan lidneihut läz 44 ga pindanke oli olmas lidnan sijas. Ezimeletaden, panihe sidä mantazole 13. voz'sadan ezmäižes poles. Nügüdläižen eländpunktan aluz om pandud vl 1706 kuti Sarovan jumalankodi, vl 1906 oigetihe sen 200-vottušt jubilejad. Vll 1925−1927 sauptihe jumalankodid da anttihe pidamha türmatud mehid. Vn 1947 heinkuspäi Sarov-žilo oli alištunu nevondkundaližele tobmudele oikti šingotamha südäitukuižid šlibakoid. Kändihe žilod sauptud Kremlöv-lidnaks vn 1954 17. päiväl keväz'kud. Vll 1960−1966 nimitihe Arzamas-75, vhesai 1994 — Arzamas-16. Vspäi 1995 lidn nimitase nügüdläižikš.

Sarov šingotase Venäman eksperimentaližen fizikan tedoinstitutal da sen tegimil, mugažo savičuntegim radab.

Geografijan andmused

Lidn sijadase Satis-jogen randoil (ven.: Са́тис 89 km pitte, Okan oigedpol'ne bassein), 150..170 m korktusil, 160 m ü.m.t. keskmäižel korktusel. Om ümbärtud kaičendzonal. Sarovk-jogi (ven.: Саровка 22 km pitte) lankteb Satisha huralpäi lidnan keskuzpalas. Mordovijan valdkundaline londuseline kel'dtaho levitase vides kilometras suvhe lidnaspäi.

Matkad Alauz'lidnhasai om 161 km pohjoižhe orhal, 184 km avtotedme vai raudtedme. Lähembaižed lidnad om Pervomaisk 31 km päivnouzmha orhal, 38 km avtotedme vai raudtedme, i Temnikov (Mordovii) 35 km suvhe orhal vai 46 km avtotedme.

Sarov-raudtestancii radab «Alauz'lidn — Saransk»-keskustan 55-kilometrižen sarakon ühteks kahtes lopstancijaspäi (toine om Pervomaisk) lidnan suvipalas.

Sarov om lidnümbrikon üks'jäižeks eländpunktaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 92 047 ristitud, vn 2021 — 93 357 ristitud. Kaik 95 065 eläjad oli lidnas vl 2017. Kaikiš suremb lidnan ristitišt oli 96 052 eläjad vl 2020.

Rahvahad (2010): venälaižed — 95,9 %, mordvinalaižed — 1,7 %, ukrainalaižed — 1,2 %, toižed rahvahad — 1,2 %.

Ortodoksižen hristanuskondan Sarovan mez'jumalankodi^[1] (Pühän Jumalanmaman Emäganpäivän päjumalanpert' i seičeme jumalanpertid) i koume jumalanpertid sen irdpoles oma avaitud lidnas.

Lapsiden opendusen aluzkundad oma päivkodid, keskškolad, lapsiden da norišton kaks' sportškolad («Junior» i «Ikar»). Professionaližen opendusen aluzkundad oma Sarovan fiziž-tehnine institut — «MIFI»-tedoiduzkeskusen filial i politehnine tehnikum^[2], Sarovan medicinine kolledž^[3] mugažo.

Galerei

Sarovan atombomban muzejas
Sarovan tedomehiden pert' (2015)
Sarovan mez'jumalankodi, kellčuhunduz, vn 2014 nägu
Sarovan mez'jumalankodi, ph. Serafim Sarovalaižen jumalanpert', vn 2015 nägu
Jumalanpert' carin rodun himoitusiden tirpajiden oiktastuseks, vn 2020 nägu
Pühäpert' valatandastjanke vezišton randal, vn 2006 nägu
Stomatologine poliklinik (2015)
«Plaza»-torguindkeskuz (2012)

Homaičendad

Irdkosketused

Sarov Vikiaitas

	Alalidnan agjan lidnad
	Alauz'lidn \| Arzamas \| Balahn \| Bogorodsk \| Bor \| Čkalovsk \| Dzeržinsk \| Gorbatov \| Gorodec \| Knäginino \| Kstovo \| Kulebaki \| Liskovo \| Lukojanov \| Navašino \| Pavlovo \| Perevoz \| Pervomaisk \| Sarov \| Semönov \| Sergač \| Šahunj \| Zavolžje \| Uren' \| Vetlug \| Viks \| Volodarsk \| Vorsm

[1] Sarovan pühäpertid sobory.ru-saital. (ven.)

[2] Sarovan fiziž-tehnižen institutan da sen politehnikuman sait (sarfti.ru). (ven.)

[3] Sarovan medicinižen kolledžan sait (smkfmba-sar.ru). (ven.)

[1]

[2]

[3]