Volodarsk

Vikipedii-späi
Volodarsk
Володарск
 Lidnanznam
 Flag
Valdkund Venäma
Eläjiden lugu (2021) 9,705 ristitud
Pind 24,97 km²
Volodarsk Володарск
Pämez' Sergei Savel'jev
(viluku 2023—)
Telefonkod +7−83 136-xx-xxx
Avtokod 52, 152
Aigvö UTC+3 (MSK+0)


Volodarsk (ven.: Волода́рск) om Venäman lidn Alalidnan agjan päivlaskmas. Se om Volodarskan ümbrikon (edel vn 2022 semendkud — rajonan) administrativine keskuz da pala.

Istorii[vajehta | vajehtada tekst]

Nügüdläižen eländpunktan aluz om pandud vl 1920 kuti Volodari-žilo (ven.: Волода́ры) Miski-žilon i viden külän ühtištusel. Kätihe radnikžiloks vn 1932 uhokus da mülütihe sihe kuz' eländpunktad ližaks, niiden kesken Rusked Seim (ven.: Красная Сейма). Radnikžilo sai lidnan statusad vl 1956, udesnimitihe Venäman imperijan revolücižen likundan V. Volodarskii-ühtnikan psevdoniman mödhe.

Volodarsk šingotase sömtegimištol (jauhkombinat[1], lindfabrik), erazvuiččiden kanghiden fabrikal[2], betonan i raudbetontegesiden pästandal[3].

Geografijan andmused[vajehta | vajehtada tekst]

Lidn sijadase rajonan suvipäivnouzmas, Okanjogen hural randpolel, kudes kilometras pohjoižhe jogespäi, 75 m ü.m.t. keskmäižel korktusel.

Seim-stancii (ven.: Сейма) radab «Alauz'lidn — Kovrov»-raudtekeskustal. Matkad Alauz'lidnan röunhasai om 34 km päivnouzmha orhal, 40 km avtotedme vai raudtedme, keskushesai — 51 km orhal vai 62 km avtotedme. Lähembaižed lidnad oma Dzeržinsk 12 km päivnouzmha orhal vai kaikil teil, Bogorodsk 22 km suvipäivnouzmha orhal vai 72 km avtotedme, Vorsm i Pavlovo 25 km suvhe orhal vai 85..90 km avtotedme, Gorbatov 13 km suvipäivlaskmha orhal vai 117 km avtotedme, Gorohovec (Vladimiran agj) 25 km päivlaskmha orhal, 40 km avtotedme vai raudtedme.

Tobmuz[vajehta | vajehtada tekst]

Volodarsk oli lidnankundan üks'jäižeks eländpunktaks. Lidnankundan pind oli 88,64 km². Se om kätud ümbrikon territorialižeks palakundaks vn 2022 semendkuspäi.

Jäl'gmäine lidnankundan pämez' (Duman ezimez') oli Igor' Krivonogov, radoi vll 2010−2022, koli vn 2023 uhokus. Lidnankundan Administracijan jäl'gmäine pämez' om Vladimir Kočemajev (keväz'ku 2016 — kezaku 2023). Se Administracii om likvidiruidud vn 2023 kezakule. Nügüd'aigan territorialižen palakundan pämez' vajehti händast.

Eläjad[vajehta | vajehtada tekst]

Vn 2010 Venäman rahvahanlugemižen mödhe lidnan eläjiden lugu oli 9 928 ristitud, rajonan kudendez, vn 2021 — 9 705 ristitud. Kaik 10 021 eläjad oli lidnas vl 2017. Kaikiš suremb lidnan ristitišt oli 13 195 eläjad vl 1959.

Ortodoksižen hristanuskondan Jumalanmaman Blagoveššenjan jumalanpert'[4] om kaičenus i avaitud, se om saudud vl 1816.

Lähembaižed professionaližen opendusen aluzkundad sijadasoiš Dzeržinsk-lidnas.

Galerei[vajehta | vajehtada tekst]

Homaičendad[vajehta | vajehtada tekst]

  1. Volodarskan jauhkombinatan sait (mkvolod.com). (ven.)
  2. Lidnan kangazfabrikan sait (fabrikatex.ru). (ven.)
  3. Lidnan betonan edheotandan sait (prombeton-s.ru). (ven.)
  4. Volodarskan pühäpertid sobory.ru-saital. (ven.)

Irdkosketused[vajehta | vajehtada tekst]



Alalidnan agjan lidnad
Alauz'lidn | Arzamas | Balahn | Bogorodsk | Bor | Čkalovsk | Dzeržinsk | Gorbatov | Gorodec | Knäginino | Kstovo | Kulebaki | Liskovo | Lukojanov | Navašino | Pavlovo | Perevoz | Pervomaisk | Sarov | Semönov | Sergač | Šahunj | Zavolžje | Uren' | Vetlug | Viks | Volodarsk | Vorsm